Vüsal Ələkbərovun həbsdən azad edilməsi ilə bağlı vəsatəti hakimlər tərəfindən qəbul edilmədi

Bakı Hərbi Məhkəməsində sahibkarlara hədə-qorxu gəlməkdə, onların külli miqdarda əmlakını ələ keçirməkdə ittiham olunan ləğv edilmiş Milli Təhlükəsizlik Nazirliyi İstintaq Baş İdarəsi 2-ci

istintaq şöbəsinin rəisi Vüsal Ələkbərovun cinayət işi üzrə məhkəmə prosesi keçirilib.

Hakim Siyavuş Hacıyevin sədrlik etdiyi proses təyin edilmiş vaxtdan bir qədər gec başlayıb. Hakim bildirib ki, təqsirləndirilən şəxsin məhkəməyə gec gətirilməsi ilə bağlı proses gec başlayıb. Hakim təqsirləndirilən şəxsin məhkəməyə gec gətirilməsinin səbəbini konvoyun rəisindən soruşub. Təqsirləndirilən şəxslərin məhkəməyə gətirən məsul şəxs bildirib ki, yolların buz bağlaması ilə bağlı təqsirləndirilən Vüsal Ələkbərov məhkəməyə gec gətirilib.



Daha sonra hakim təqsirləndirilən şəxs vəkillərindən biri Cahangir Cavadova etiraz edib-etməməsi ilə bağlı maraqlanıb. Vüsal Ələkbərov vəkilinə etiraz etməyib.

Nizami Kazımovun hüquqşünası bildirib ki, Cahangir Cavadov təqsirləndirilən Vüsal Ələkbərovu müdafiə edə bilməz. Onun sözlərinə görə, 2008-ci ildə Nizami Kazımov həbs olunan zaman Cahangir Cavadov onun müdafiəçisi olub. Nizami Kazımovun özü də bu faktı təsdiqləyib.

Hakim deyib ki, hazırkı mərhələdə Cahangir Cavadov məhkəmədə iştirak etmir: “Belə olan halda vəkilin özü-özünə də etiraz etmək hüququ var. Qanunla vəkil özünə etiraz verməlidir. Vəkil növbəti məhkəməyə gələndə, biz bu məsələyə qayıdarıq”.

Vüsal Ələkbərov qeyd edib ki, Cahangir Cavadov Nizami Kazımovun müdafiəçisi olub: “Onu da qeyd edim ki, bu cinayət işində adı keçən zərərçəkmişlər 613 saylı cinayət işində zərərçəkmiş olublar. Məndə həmin cinayət işinin aparan istintaq

qrupunun rəhbəri olmuşam. Belə çıxır ki, həmin işə rəhbərlik edən şəxs bu işdə təqsirləndirilən ola bilər, zərərçəkmişlər zərərçəkmiş kimi tanına bilər, amma başqa işdə vəkil çıxan şəxs bu işdə çıxa bilməz. Mən vəkilimdən imtina etmirəm”.

Hakim deyib ki, bu işə qanunla nəzərdə tutulmuş qaydada baxılır və obyektiv, hərtərəfli məhkəmə araşdırması aparılır: “Bizim əsas qanunlarımız Konstitusiyamızda yazılıb, orada yazılanlar bizim üçün əsasdır. Amma Konstitusiyamızla yanaşı digər qanunlarımız da var. Cinayət-Prosessual Məcəlləsində bütün qaydalar qeyd olunub. Cinayət-Prosessual Məcəlləsində olan müvafiq maddələrə uyğun işimizi görürük. Biz vəkilin prosesdə iştirak edib-etməməsinə, həmçinin təqsirləndirilən şəxsi müdafiə etməsi məsələsinə növbəti məhkəmə iclaslarında baxılacaq”.

Daha sonra Vüsal Ələkbərov həbs qərarının ev dustaqlığı ilə əvəz edilməsi barədə vəsatət verib: “Bundan əvvəldə mən belə bir vəsatətlə çıxış etmişəm. Amma məhkəmə həmin vəsatəti təmin etmədi və bildirdi ki, zərərçəkmişlər aqressivdir, mənim azadlıqda olmam təhlükə yarada bilər. Amma bu düzgün deyil. Mənim azadlıqda olmam onların xeyrinə olacaq. Bunu əminliklə deyirəm. Mənim azadlığa buraxılmağıma zərərçəkmişlər etiraz etmir”.



Bu zaman zərərçəkmiş Namil Rzayev təqsirləndirilən şəxsə replikası sərt formada olub: “Burada camaatın adından danışma. Camaatı razı sal, səndən şiakyətimiz olmasın, nəyəsə də narazı olmayaq”.

Dövlət ittihamçısı Vüqar Quliyev vəsatətin əsassız olduğunu bildirib və təmin edilməməsini xahiş edib. Zərərçəkmiş Nizami

Kazımov deyib ki, dəymiş ziyan ödənilmədiyi halda Vüsal Ələkbərovun azadlığa buraxılmasından söhbət gedə bilməz: “Pullarımız ödənilsin, onun da azadlığa buraxılması barədə vəsatəti təmin edilsin. Əks halda, biz onun azadlığa buraxılması ilə razı deyilik”.

Hüseyn Səfərov da əsas dəymiş ziyanın ödənilməsini istəyib: “Vüsal Ələkbərov caamatın pulunu ödəsin, ondan heç kim narazı qalmayacaq. Dəymiş ziyan ödəniləndən sonra bura heç kimi zorla belə gətirə biləməzlər”.

Elşən Mədətov da zərərçəkmişlərin xeyrinə işin həll edilməsini, bundan sonra Vüsal Ələkbərovun azadlığa buraxılması məsələsinə baxılmasının mümkün olduğunu deyib: “Bizim obtektimiz, evimiz satılıb. Biz burada pullarımızı tələb edirik. Vüsal Ələkbərovun da həbs edilməsini istəmirik. Biz özümüz həbs olunmamaq üçün Vüsal Ələkbərova pul vermişik. İndi də Vüsal Ələkbərov dəymiş ziyanı ödəməlidir ki, onu həbs edən azad etsinlər”.

Namil Rzayev yenə də çıxış edərək bildirib ki, Vüsal Ələkbərov aldığı pulların az miqdarı özünə çatıb: “Vüsal Ələkbərov pulları kimə verib, ondan da tələb etsin. Getsin Eldar Mahmudovdan, Mövlam Şıxəliyevdən tələb etsin, bizim pulumuzu gətirsin. Əks təqdirdə vəsatəti təmin edilməsin”.

Təqsirləndirilən şəxsin vəkilləri də müdafiə etdiyi şəxsin vəsatətinin təmin edilməsini istəyib. Vəkillər qeyd edib ki, məhkəmə artıq 4-5-ci prosesdir davam edir: “Əvvəlki proseslərdən fərqli olaraq zərərçəkmişlərin münasibətləri Vüsal Ələkbərova qarşı yumşalmağa başlayıb. Zərərçəkmişlər də ziyanını

ödənilməsini istəyirlər. Vüsal Ələkbərovun da barəsində seçilmiş həbs qətimkan tədbirinin dəyişdirilməsi zərərçəkmişlərin xeyrinə olacaq. Zərərin ödənilməsi həlli müsbət nəticə verəcək”.

Daha sonra hakimlər Vüsal Ələkbərovun barəsində seçilmiş həbs qətimkan tədbirinin ev dustaqlığı ilə əvəz edilməsi barədə vəsatəti təmin edilməyib.

Sonra prosesdə zərərçəkmişlər Nizami Kazımov və Hüseyn Səfərovun epizodları üzrə şahidlər ifadə veriblər. Proses əvvəldən axıra gərgin keçib. Zərərçəkmişlərlə təqsirləndirilən şəxsin vəkillərinin bir-birlərinə qarşı ittihamedici ifadələri işin gedişini daha da gərginləşdirib. Hüseyn Səfərov zərərçəkdiyini, amma burada təqsirləndirilən şəxsin vəkilləri tərəfindən təhqir olunduğunu bildirib.

Hakim tərəfləri sakitləşdirəndən sonra “Çanaqqala” restoranın sahibi Tahir Əbdülqasimov və onun oğlu Samir ifadə veriblər. Tahir Əbdülqasımov Nizami Kazımovun qızını oğluna alıb və quda olduqlarını, 2008-ci ildə Nizami Kazımovun həbs edilməsindən, onun həbsdən azad edilməsi üçün 1 milyon dolların Vüsal Ələkbərova verməsindən danışıb.

Aslan
gundemxeber.az