Rayon İcra Hakimiyyəti vəkil Ramiz Zeynalovun açıqladığı və istinadla verdiyimiz faktlara görə qəzeti yalançılıqda ittiham edir

RİH açıqlama vermək və vəkildən sübutları istəmək yerinə mediaya təzyiq göstərir

Paytaxtın Xəzər Rayon İcra Hakimiyyəti “Gündəm-Xəbər” qəzetini məhkəmə ilə təhdid edir. Qəzetimizin 09.02.2017-ci il tarixli sayında və saat 21:25-də saytımızda “MTN bandasının Xəzər əməliyyətında sensasion gizlinlər“ başlıqlı məqalə dərc olunub.

Yazıda Xəzərin icra hakimi Gülağa İslamovun sərəncamı ilə Eldar Mahmudova və Akif Çovdarova, o cümlədən Rabitə Nazirliyindəki vəzifəlilərə hansı ərazilərin bağışlandığı öz əksini tapıb.

Xəzər RİH məqalədəki iddialar və vəkil Ramiz Zeynalovun dedikləri ilə bağlı münasibət bildirmək, ən azından təkzib vermək yerinə qəzeti məhkəmə ilə hədələyir.

Redaksiyamızın elektron poçtuna göndərilən məktubda deyilir ki, heç bir təsdiqi olmayan yalan faktlara əsaslanmış məqalənizin dərhal saytdan götürülməsini tələb edirik. Əks halda müxbir və sayt məhkəməyə veriləcək.

Əvvəla, Xəzər RİH-nin mətbuat xidməti redaksiyamıza məqalədəki məqamlarla bağlı press-reliz yollamalı yaxud açıqlama verməliydi. Bu, qəbul olunmuş jurnalistika prinsipidir.

Ən yaxşı halda təkzib mətni yollamaq olardı. Ancaq Xəzər rayon icra hakimi Gülağa İslamovun əməkdaşları yazını çıxarmağı tələb edir və əks halda məhkəmə ilə qorxudur.

Qarşı tərəf kimi mövqe bildirməyən RİH dərhal hüquqi müstəviyə keçid edir. Halbuki, məhkəməyə üz tutmaq onların hüququdur. Sadəcə, məqaləni diqqətlə oxumaq lazım idi.

Çünki yazıda açıqlanan faktlar məhz mətbuatda yayılmış xəbərlərə istinadla və ən əsası hüququ bilən, hüquqşünas olan, vəkil fəaliyyəti ilə məşğul olan Ramiz Zeynalovun irihəcmli məqaləsi əsasında hazırlanıb.

Vəkilin sadaladığı faktlar mətbuatda yayılıb və “Gündəm-Xəbər” qəzeti ona istinadla mətni hazırlayıb.

Bu halda hüquqi məsuliyyəti daşıyan da vəkildir. Bu günə kimi Xəzər rayon icra başçısı R.Zeynalovun yaydığı siyahıya reaksiya verməyib, ayrı-ayrı saytlardan xahiş-minnətlə həmin faktları ört-basdır etdirib.

Elə ki, qəzetimizdə bu məqamlar işıq üzü görür, dərhal məhkəmə ilə hədələyir. Hərçənd, redaksiyamıza təkzib məktubu göndərmək mümkündür və ya açıqlama vermək olar. Görünür, bunu Xəzər RİH-ə xatırlatmaq lazım imiş.

Üstəlik, bu gün dövlətin müvafiq orqanları mətbuatı yazıları saytlardan silməkdə qınayır, onların bu hərəkətini reketçilik adlandırır.

Biz isə bunların hamısından uzaq olaraq, icra hakimiyyətinə məsləhət görərdik ki, məqalədə razılaşmadığı məqamlarla bağlı elə haqqında yazı dərc olunan ünvanda mövqeyini bildirsin.

Qeyd edək ki, vəkil Ramiz Zeynalovun açıqladığı faktlar bütövlükdə Eldar Mahmudovun niyə məhz Bakının Xəzər rayonunda daha çox mülklərə sahiblənməsini aydınlaşdırıb.

Məlum olur ki, G.İslamov imzaladığı qanunsuz sərəncamlarla E.Mahmudova torpaqlar, restoranlar, ərazilər ənam verib. R.Zeynalov yazıb ki, 2010-cu ildə Türkan qəsəbəsində 8 hektar torpaq sahəsi var imiş.

Xəzər RİH Türkan qəsəbəsi üzrə nümayəndəsi Rahib Babayev və İlham İslamov tərəfindən hasara alınmış və İHB Gülağa İslamov tərəfindən Eldar Mahmudova hədiyyə edilib.

2013-cü ildə aeroport şossesində yerləşən “Azpetrol” yanacaqdoldurma məntəqəsinin arxasında 10 hektar torpaq sahəsi də icra hakimiyyəti başçısı G.İslamovun qanunsuz sərəncamı ilə E.Mahmudovun əmisi oğlu Yaşar Mahmudova verilib, ərazi hasarlanıb və restoran kompleksi inşa edilməkdədir.

Vəkil yazıb ki, Gülağa İslamov rayonun Mərdəkan qəsəbəsində yerləşən unikal Dendrari parkının və ona bitişik Kurortlar Şurasının balansında olan “Abşeron sanatoriyası”nın torpaq sahələrinə aid 5 hektarlıq sahəni qanunazidd olaraq, 2008-ci il tarixli sərəncamı ilə sabiq nazir Eldar Mahmudova fərdi yaşayış evi inşa etmək üçün ayırıb.

Vəkil isə məktubda daha müdhiş faktlar açıqlayıb. 2011 -ci ildə Buzovna qəsəbə sakini Əzizağa Murtuzayevə məxsus, Qala yolunun solunda “Qala bazar” restoran kompleksi ilə bir cərgədə icra başçısı G.İslamova məxsus pivə zavodu ilə üzbəüz yerləşən, ƏMDK-nın balansında olan 0,40 hektar torpaq sahəsi olan 127 saylı yanacaqdoldurma stansiyası (YDS) qanunsuz olaraq E.Mahmudova verilib.

2015-in may ayında Akif Çovdarov quldur dəstəsi ilə birlikdə Xəzər RİH-ə gələrək, icra hakimiyyəti ilə “Azİmport” MMC arasında bağlanmış podrat müqavilələrini, Forma №2 və görülən işlərin təhvil-təslim aktlarını götürərək külli miqdarda yeyintiləri müəyyən edib. Bunun müqabilində icra başçısı G.İslamovdan 5 milyon manat rüşvət alıb.

Xəzər RİH-nin İctimai-Siyasi Humanitar Məsələr Şöbəsinin müdiri Gülbala Qurbanov o zaman mətbuata deyib ki, Gülağa İslamov PA-ya çağırılıb, məsələ həllini tapıb.

R.Zeynalov müraciətində Zirə qəsəbəsində eks-nazirə və onun məmurlarına hədiyyə edilən obyektləri də sıralayıb. Zirə qəsəbəsi:

1. G.İslamov 2013-cü ildə Zirə qəsəbəsində - qoruğa gedən yolda 15 hektar torpaq sahəsini qanunsuz sərəncamı ilə Əli Əsədova və şəriki "TV Musa ləqəbli" Musa Süleymanova verib. Həmin sahədə mənimsənilmiş pul hesabına zavod inşa edilib və dənizin içinə körpü salınıb.

2. A.Çovdarova isə Zirə qəsəbəsində 10 hektar torpaq sahəsi ayrılıb. Vəkil iddia edir ki, bu torpaq sahəsi Xəzər RİH başçısı tərəfindən 2011-2012-ci illərdə ayrılıb, hasarı isə icra başçısının tapşırığı ilə Zirənin bələdiyyə sədri Firuz Rzayevin hesabına çəkdirilib.

R.Zeynalov müraciətində həmçinin qeyd edir ki, 2004-cü ildən 2011-ci ilə qədər MTN-in Xəzər rayon şöbəsinin rəisi vəzifəsində sabiq nazir E.Mahmudova ən yaxın adamlardan biri olan nardaranlı Həsən Ağayevdir.

Vəkilin bu faktları açıqlaması və bizim hüquqşünasa istinadla bu məlumatları tirajlamağımızda hansı dezinformasiya, əsassız və yalançılıq varsa, buyurub münasibət bildirsinlər, əgər şər-böhtandırsa vəkili də məhkəməyə versinlər.

Hər halda hörmətli vəkilin əlində tutarlı sübutları var. “Gündəm-Xəbər” qəzetinin isə nə Xəzər RİH-ə, nə də başqa dövlət strukturlarına qarşı qərəzi var.

Bir mətbu orqan olaraq oxucular və ictimaiyyət üçün əhəmiyyətli olan faktları, problemləri işıqlandırırıq. Xəzər RİH-in də, digər qurumların da mövqeyini çap etməyə hər zaman hazırıq.

Rafiq Qara
gundemxeber.az