Rafiq Dadaşov: “Kənd qəbristanlığıdakı yaşıllıqların məhvinə, deməli “icazə razılaşması” Rəfayıl Tahirovun “kabinet”ində həll olunub ki, bu cür addımlar da atılıb”
Ətraf mühitdə əmələ gələn hər bir olay zaman-zaman diqqətimizi cəlb etdiyindən, bu gün də bir mətbu orqan olaraq ekoloji sahədə yaşananları ictimailəşdirməyi, hər kəsi baş verənlərlə bağlı məlumatlandırmağı, sanki əsas vəzifə borclarımızdan biri hesab etmişik. Belə bir səbəblər üzündəndir ki, ölkəmizin müxtəlif regionlarından sakinlərin “Gündəm Xəbər”ə ünvanladıqları şikayət məktublarının ardı-arası kəsilmir və çox zaman onlar, ekoloji sahəyə cavabdehlik daşıyan vəzifə sahiblərini ittiham etməkdən də çəkinmirlər. Belə bir vəzifə sahiblərindən biri də, ETSN-nin 1 saylı Ərazi Ekologiya və Təbii Sərvətlər şöbəsində müdir əvəzi vəzifəni daşıyan Rəfayıl Tahirovdur ki, bu şəxsi Lənkəran rayonu Vilvan kənd sakinləri Dadaşov Rafiq Salam oğlu və Fərziyev Bəxtiyar Paşa oğlu, redaksiyamıza ünvanladıqları şikayət məktublarında daha çox ittiham edirlər. Onlar ünvanladıqları şikayət ərizələrində qeyd etmişdilər ki, “ekologi tarazlığın qorunmasına cavabdehlik daşıyan Rəfayıl Tahirov, hələ bir müddət bundan əvvəl iştahasını cilovlaya bilmədiyindən, məhz kəndimizin 200-300 illik tarixi olan qədimi qəbristanlığıdakı yaşılllıqlara “qənim kəsildi”. Düzdür, ona məqsədini həyata keçirməkdə Vilvan kənd icra nümayəndəsi Hikmət Abbasov və kəndimizin bələdiyyə sədri Hafizə xanım Quliyeva da, müəyyən mənada dəstək olublar. Çünki, hər iki vəzifə sahibi kəndimizin belə bir problemlərinə də cavabdehlik daşıyırlar”. Adı çəkilən kənd sakinlərinin redaksiyamıza ünvanladıqları şikayət ərizələrini əsas tutaraq, “Gündəm Xəbər” qəzetinin 03-05 fevral 2017-ci il tarixli sayının 6-cı səhifəsində “Lənkəranda “yaşıl soyqrım” davam etdirilir” başlıqlı tənqidi açıqlama dərc etdik. Düzdür, açıqlamanın dərci ciddi rezonans doğurdu və müəyyən müzakirələrə də səbəb oldu.
Maraqlı hal o oldu ki, açıqlamanın dərcindən sonra 1 saylı Ərazi Ekologiya və Təbii Sərvətlər şöbəsinin rəhbərliyi özünü müdafiə etməyə, daha dəqiq desək “sudan quru çıxmağa” çalışır və redaksiyamızın elektron poçtuna hazırladıqları mövqelərini də göndərir. Hətta, adı çəkilən qurumun rəhbərliyi göndərdikləri mövqelərini dərc etməyi də xahiş edir. Bəli, bu cür yanaşmaya təbii baxmaq lazımdır və KİV haqqında Qanuna görə, bir redaksiya olaraq qarşı tərəfi dinləməyə və mövqelərini dərc etməyə də borcluyuq. Amma, məsələnin digər maraqlı tərəfləri var. Çünki, 1 saylı Ərazi Ekologiya və Təbii Sərvətlər şöbəsinin rəhbərliyi tərəfindən redaksiyamızın elektron poçtuna göndərilən mövqedə qeyd olunur ki, “sözügedən qəbirstanlıqda təmizlik işləri apararkən, ağacları kəsən Lənkəran rayonu Vilvan kənd sakini Əliyev Şamil Şərafət oğlu barəsində qanunamüvafiq qaydada protokol tərtib edilərək, şöbənin 18 yanvar 2017-ci il tarixli qərarı əsasında inzibati məsuliyyətə cəlb edilmişdir”. Bu cür mövqe açıqlaması onu söyləməyə əsas verir ki, cənab Rəfayıl Tahirov təqribən 2 ha ərazisi olan Vilvan kənd qəbristanlığında həyata keçirilmiş “yaşıl soyqrım”a, hansısa formada don geyindirmək istəyir. Məgər kənd qəbristanlığı ərazisində boy atan və təqribən 50-150 il ömrü olan ağacları yerli-dibli kəsib götürmək, təmizlik işlərinin aparılması deməkdir? Bundan əlavə, təqribən 13-15 nəfər şəxsi cəlb etməklə, “URAL” markalı yük maşınına doğranmış ağacları yükləmək, məgər adı çəkilən kənd qəbristanlığıda təmizlik işlərinin aparılması deməkdir? Bəlkə də, cənab Rəfayıl Tahirovun prizmasından baxdıqda, kimlərsə bu cür addımların atılmasına təmizlik işlərinin aparılması kimi də yanaşa bilər. Amma, bizim bilib dərk etdiyimiz bir həqiqət var ki, o da qəbristanlıq ərazisində təmizlik işləri aparılır dedikdə, məhz ərazinin lazımsız alaq otlarından, qurumuş ağaclardan, müəyyən vasitələr səbəbindən ərazidə olan kağız parçalarından və digər zird-zibillərdən təmizlənməsi nəzərdə tutulur. Yəqin ki, bizim bilib dərk etdiyimizi hər kəs təsdiqləyər və Vilvan kənd qəbristanlığında ağacların yerli-dibli kəsilib götürülməsini, tam əksəriyyət “soyqrım harayı” kimi də qiymətləndirər.



Əlavə olaraq onu da bildirək ki, məqalə çapa hazırlanarkən əməkdaşımızın Vilvan kənd sakinləri Dadaşov Rafiq Salam oğlu və Fərziyev Bəxtiyar Paşa oğlu ilə əlaqə saxlaması, bəzi mətləblərə aydınlıq gətirməyə də imkan verdi. Belə ki, şikayətçi kənd sakinləri yaşanan problemə haqda onu da bildirdilər ki, “əgər kənd sakinlərindən kimsə hansısa ağacı icazəsiz kəsərsə, o halda 1 saylı Ərazi Ekologiya və Təbii Sərvətlər şöbəsinin əməkdaşları tərəfindən yüksək məbləğdə cərimələnərlər. Qaldı ki, kənd qəbristanlığıdakı yaşıllıqların məhvinə, deməli “icazə razılaşması” Rəfayıl Tahirovun “kabinet”ində həll olunub ki, bu cür addımlar da atılıb. Qəbristanlıqda təmizlik işləri aparılıb və “Vilvan kənd sakini Əliyev Şamil Şərafət oğlu barəsində qanunamüvafiq qaydada protokol tərtib edilərək şöbənin 18 yanvar 2017-ci il tarixli qərarı əsasında inzibati məsuliyyətə cəlb edilib” deyə verilmiş cavab, birbaşa ağ-yalandan başqa bir şey deyil. Çünki dəqiq məlumatım var ki, yaşanan problem ictimailəşdikdən sonra Rəfayıl Tahirov özünü müdafiə etməyə çalışıb və Vilvan kənd sakini Şamil Əliyevlə danışaraq “problemi üzərinə götür, mən sənə sonrakı vaxtlarda lazımi dəstək olacağam” deyə, onu razı sala bilir. Bu cür addımlar atmaqla o, hələlik “çulunu sudan çıxartmağa” qabil olub”. Bəli, bu cür cavabları dinlədikcə o qənaətə gəldik ki, cənab Hüseyn Bağırovun etibar etdiyi, hətta geniş səlahiyyət verdiyi Rəfayıl Tahirov, bu gün etibarsız vəzifə sahiblərindən biri hesab olunur. Çünki, heç cür inana bilmərik ki, birbaşa ekologiyamızın varlığına cavabdehlik daşıyan Ekologiya və Təbii Sərvətlər Naziri cənab Hüseyn Bağırov, 1 saylı Ərazi Ekologiya və Təbii Sərvətlər Şöbəsinə Rəfayıl Tahirovu müdir əvəzi təyin edərkən, bu şəxsə “ekologiyanı məhv et” deyə tapşırıqlarını versin.
Hörmətli oxucular! Yuxarıda qeyd etdiyimiz kimi “Gündəm Xəbər” qəzetinin 03-05 fevral 2017-ci il tarixli sayının 6-cı səhifəsində “Lənkəranda “yaşıl soyqrım” davam etdirilir” başlıqlı tənqidi açıqlamanın işıq üzü görməsindən sonra, 1 saylı Ekologiya və Təbii Sərvətlər Şöbəsinin rəhbərliyi redaksiyamızın elektron poçtuna hazırladıqları mövqelərini göndərdi və onu dərc etməyimizi də xahiş edib. Odur ki, qarşı tərəfin göndərdiyi açıqlamanın nöqtəsinə, vergülünə toxunmadan olduğu kimi dərc edirik. Açıqlamanı oxuyun və həm qeyd etdiklərimizi, həm də şəkillərdə gördüklərinizi müzakirə edib, yekun qərara gəlin. Daha yaxşı olar ki, ümumi qənaətinizi redaksiyamıza da çatdırasınız.




Qarşı tərəf:
İnternet səhifənizdə “Lənkəranda “yaşıl soyqrım” davam edir” məqaləsi ilə əlaqədar diqqətinizə çatdırırıq ki, Lənkəran rayonu Vilvan kənd sakinləri Dadaşov Rafiq Saleh oğlu və Fərziyev Bəxtiyar Paşa oğlunun “kənd qəbirstanlığında ağacların kəsilməsi” ilə bağlı Ekologiya və Təbii Sərvətlər Nazirliyinə 23 dekabr 2016-cı il tarixdə daxil olmuş şikayət ərizəsi 1 saylı Ekologiya və Təbii Sərvətlər Şöbəsinin əməkdaşları tərəfindən şikayətçilərin iştirakı ilə yerində araşdırılmış və sözügedən qəbirstanlıqda təmizlik işləri apararkən ağacları kəsən Lənkəran rayonu Vilvan kənd sakini Əliyev Şamil Şərafət oğlu barəsində qanunamüvafiq qaydada protokol tərtib edilərək şöbənin 18 yanvar 2017-ci il tarixli qərarı əsasında inzibati məsuliyyətə cəlb edilmişdir. Sözügedən ərazi əməkdaşlarımız tərəfindən nəzarətə götürülmüşdür.
Xahiş edirik ki, bizim mövqeyimizi də öz internet səhifənizdə dərc edəsiniz.
Hörmətlə, 1 saylı Ekologiya və Təbii Sərvətlər Şöbəsinin rəhbərliyi





Mirzə