Baxmayaraq ki, adı çəkilən müəssisə, ölkəmizdə bu ad altında faliyyət göstərən yeganə sağlamlıq müəssəsidir

Respublikamızın müxtəlif bölgələrində fəaliyyət göstərən və yaş həddindən asılı olmayaraq birbaşa hər kəsin sağlamlığının təmin olunması ilə məşğul olan sanatoriyalarda yaradılan şəraitin varlığı, göstərilən xidmətin keyfiyyəti və s. daim diqqət mərkəzində duran məsələlərdən biri olub. Çox zaman elə hallar da olub ki, müxtəlif ünvanlarda fəaliyyət göstərilən sanatoriyaların fəaliyyətləri olduqca qənaətbəxş hesab olunub və tam əksəriyyət tərəfindən lazımınca da qiymətləndirilib. Amma, Bakı şəhəri, Xətai rayonu ərazisində fəaliyyət göstərən 4 saylı Uşaq Vərəm Sanatoriyasının bərbad durumu, sanki bu gün həyacan təbili çalmağa tam əsaslar verir. Düzdür, adı çəkilən sanatoriyanın yarıtmaz fəaliyyəti haqda xeyli məlumatlara malik olsaq da, ilk əvvəl söylənilənlərə o qədər də inanmırdıq. Amma, atalar demişkən” yüz eşitməkdənsə bircə dəfə görmək yaxşıdır” deyimini əsas tutub, hələ bir neçə gün bundan əvvəl adı çəkilən ünvana üz tutduq və gözlərimizlə gördüklərimiz sanki bizi dəhşətə də gətirdi. Çünki, 4 saylı Uşaq Vərəm Sanatoriyasının ümumi görünüşü, həyət-bacasının olduqca natəmizliyi, ümumilikdə bərbad halda olması və s. sanki bizi 17-ci,18-əsrlərin müharibələrində əmələ gələn hansısa xarabazarlığa aparıb çıxarırdı.



Məhz, belə bir səbəblər üzündəndir ki, bu gün adı çəkilən vərəm sanatoriyası ilə bağlı ayrı-ayrı KİV-də silsilə tənqidi açıqlamalar dərc olunur, yaşanan problemlərin varlığı hər kəsin diqqətinə də çatdırılır. Məsələn, bir neçə gün bundan əvvəl adının çəkilməsini istəmədiyimiz media qurumlarından birində, şikayətçi Fatimə Kərimovanın üz-üzə qaldığı problemlərdən bəhs olunur və adı çəkilən müəssisə rəhbərliyinin yarıtmaz iş fəaliyyəti kəskin tənqid də olunurdu. Çünki, şikayətçi xanım verdiyi açıqlamasında qeyd edib ki, “hələ bir müddət bundan əvvəl məcburiyyət qarşısında qaldığımdan, övladım Kərimzadə Zəhra Ömər qızını 4 saylı Uşaq Vərəm Sanatoriyasına yerləşdirdim. Düzdür ilk əvvəl adı çəkilən ünvana inamım böyük olduğundan, məhz belə bir addımı atmağa qərar verdim. Amma, günlər keçdikcə yanıldığımı başa düşdüm. Baxmayaraq ki, adı çəkilən müəssisə, ölkəmizdə bu ad altında faliyyət göstərən yeganə sağlamlıq müəssəsidir. Ona da diqqət yetirmək lazımdır ki, bu vərəm sanatoriyasında lazımi şərait olmadığından, övladımı hər həftənin şənbə və bazar günləri evə yuyundurmağa aparırdım. Çünki, həm şəraitsizlik, həm baxımsızlır, həm də digər neqativ halların varlığı, övladımı adı çəkilən müəssisədə saxlamağa imkan vermədi və çox keçmədi ki, onu oradan çıxartmağa da məcbur oldum. Atdığım addımdan bu gün də peşiman deyiləm. Hələ bunlar azmış kimi, adı çəkilən sanatoriyadan övladımı çıxartmazdan əvvəl, gözlərimlə gördüklərim sanki məni dəhşətə gətirdi və teztələsik addımlarımı atmağa da vadar oldum. Çünki rastlaşdığım mənzərələrdən biri də, adı çəkilən müəssisədə olarkən vərəm dispanserinə yerləşdirilmiş uşaqların bir otağa doldurularaq giriş qapılarının bağlanması və onların təlim-tərbiyəsinə, qidalanmalarına, təmizlik işlərinə cavabdehlik daşıyanların isə, başqa bir otaqda yemək-içmək məclisi qurmaları idi. Hələ bəzi uşaqların koridorlarda sürünmələrini gördükdə isə, lap dəhşətə gəldim. O halda bilib başa düşdüm ki, 4 saylı Uşaq Vərəm Sanatoriyasında çalışanları uşaqların taleyi deyil, məz qurub-düzdükləri yemək-içmək məclisləri düşündürür”.



Bəli, bütün bunlar yuxarıda qeyd etdiyimiz kimi, sanki həyacan təbili çalmağa əsaslar da verir. Belə bir səbəblər üzündən də, hələ bir neçə gün bundan əvvəl adı çəkilən ünvanda olmağımız, bir daha yaddaşımızı təzələməyə imkan verdi. Çünki, gördüklərimiz mənzərəni gözlərimiz önünə gətirdikcə, sanki başqa xəyallara daldıq. Bu gün də inana bilmirik ki, biz adı çəkilən vərəm dispanserində olmuşuq. Məhz, ona görə belə bir düşüncəyə sahibik ki, həmin ünvan sanki hansısa xarabazarlığı xatırladır. Yalnız adı çəkilən ünvanda divardan asılmış “4 saylı Uşaq Vərəm Sanatoriyası” lövhəsini gördükdə, o halda dərk etdik ki, biz adı hallanan ünvandayıq.



Vərəm sanatoriyasına aid binanın qəzalı vəziyyətdə olması da, ümumiyyətlə bir çox mətləblərdən xəbər verirdi. Hələ bu azmış kimi, yaxınlıqda yaşayan sakinlərin onlara məxsus avtomobillərini dispanserin həyətində saxlamaları, yəni ərazidən sanki “Avtodayanacaq” kimi istifadə etmələri, bəzi şübhələrin baş qaldırmasına da səbəb olur. Bütün bunlar onu söyləməyə əsas verir ki, Bakı şəhəri, Xətai rayonu ərazisində fəaliyyət göstərən 4 saylı Uşaq Vərəm Sanatoriyasında anarxiya baş alıb getməkdədir.
Hörmətli oxucular! Bakı şəhəri, Xətai rayonu ərazisində fəaliyyət göstərən 4 saylı Uşaq Vərəm Sanatoriyasından əldə etdiyimiz çəklişlərə, adı çəkilən müəssisənin ümumi görünüşünə diqqət yetirdikdə o qənaətə gəlirik ki, adı çəkilən müəssisəyə rəhbərlik edən Fəridə xanımın yarıtmaz idarəçiliyi, bu gün də saysız-hesabsız problemlərin əmələ gəlməsinə səbəb olmaqdadır. Çünki, adı çəkilən vərəm sanatoriyası sanki müalicə müəssisəsi deyil, müxtəlif xəstəliklərin daşıyıcısı olan bir ünvandır.
P.S. Bu yöndə araşdırmalarımızı davam etdirib, növbəti saylarımızda çoxsaylı oxucularımızı daha ətraflı məlumatlandırmağa çalışacağıq. Qarşı tərəfin də mövqeyini dinləyə bilərik.



Mirzə