Deməli, Oqtay Məsmalıyev saxtakar əməllərə meylli şəxs olduğundan, onun gömrük sahəsində qalıb çalışması məqsədəuyğun hesab olunmur

DSMF-nun Ağstafa rayon şöbəsinə rəhbərlik edən Oqtay müəllimin atdığı addımların əmələ gətirdiyi fəsadlar, deyəsən yavaş-yavaş rayon ərazisindən kənar ərazilərə də yayılmaqdadır. Bu haqda məlumatları “Gündəm Xəbər”ə çatdıran mənbə bildirir ki, rəhbərlik etdiyi quruma sanki gəlir mənbəyi kimi baxan Oqtay müəllim, bu gün Ağstafada ən imkanlı vəzifə sahiblərindən biri hesab olunur. Belə bir səbəb üzündəndir ki, bu gün o, rayon ərazisində arıçılıq təsərrüfatı ilə də məşğul olur və hər il bu sahədən külli miqdarda gəlir də əldə edir.
Uzun illər ərzində adı çəkilən şöbəyə rəhbərlik edən Oqtay Məsmalıyev, bu gün maraqlarını təmin etməkdən, hansısa məqsədinə nail olmaqdan ötəri istənilən vasitədən istifadə edir və heç bir halda da çəkinmir. Onun qol qoyduğu əməllər içərisində, daha çox təqaüdlərin saxta yollarla artırılması olur. Bu şəxs DSMF-nin Ağstafa rayon şöbəsinə müdir vəzifəsini daşımazdan əvvəl, Tovuz Gömrük İdarəsində növbə rəisi vəzifəsini daşıyıb. Əldə etdiyimiz səhih məlumatlara görə, o, vaxtilə gömrük idarəsində bir çox saxtakarlıqlara yol verdiyi üçün, daşıdığı vəzifəsinə “əlvida” deməli olur. Deməli, Oqtay Məsmalıyev saxtakar əməllərə meylli şəxs olduğundan, onu gömrük sahəsində saxlamırlar. Düzdür, onun keçmiş tarixçəsinin bugünkü işinə istisi, soyuğu olmasa da, amma, bu gün ona qarşı bəslənilən münasibətin formalaşmasında daha önəm daşıyır.
Məlumatlı mənbənin iddiasına görə Oqtay müəllimin Bakı şəhərinin “İnqilab” küçəsində iki təmtəraqlı mənzili, hətta Avropa ölkələrindən birində şəxsi evinin olduğu da bildirilir. Çatdırılan məlumatda o da vurğulanır ki, DSMF Ağstaşa şöbəsinə rəhbərlik edən şəxslə bəzi idarə, müəssisə, təşkilat rəhbərlərinin aralarında əldə olunan razılaşmaya əsasən, rəsmi sənədlərdə həmin müəssisədə işləyən işçilərin sayı real saydan xeyli az göstərilir. Bu azaltma faktı, məhz həmin qurumların rəhbərliyini sosial müdafiə fonduna olan ödənişlər üzrə xərclərin böyük bir hissəsindən azad edir. Belə bir yollarla “qənaət” olunan məbləğin tən yarısı, nəğd şəkildə Oqtay Məsmalıyevə çatdırılır. Daha ətraflı növbəti saylarımızda.
Qarşı tərəfin də münasibətini dinləməyə hazırıq.

Mirzə