Vüqar Rəşidov Azərbaycanı tərk etsə də, bu gün o, bəzi şəxslərin siyasi mühacir adı altında ölkəmizi tərk etmələrinə şərait yaratdığı da iddia olunur

Bir müstəqil mətbu orqan olaraq “Gündəm Xəbər” qəzetinin səhifələrində daim sosial əhəmiyyət kəsb edən məsələ və problemlərlə bağlı açıqlamalar dərc etdikcə, redaksiyamızın ünvanına yerlərdən çoxsaylı oxucu məktubları ünvanlanır və onların ictimailəşdirilməsi də xahiş olunur. Bir neçə gün bundan əvvəl yəqin ki, əksəriyyət üçün də maraq kəsb edə biləcək mövzunun “Gündəm Xəbər”ə göndərilməsi, sözün həqiqi mənasında bizim də diqqətimizi cəlb etdi. Belə ki, göndərilən açıqlamada vaxtilə MTN-nin əməkdaşı olmuş və etdiyi dələduzluq əməllərinə görə Nəsimi rayon Polis İdarəsində barəsində cinayət işi açılmış, eyni zamanda heç bir müxalif siyasi partiyanın üzvü olmadan ölkəmizi tərk edərək Latviya dövlətindən sığınacaq almış Vüqar Rəşidov adlı şəxsin əməllərindən bəhs olunur. “Gündəm Xəbər”ə daxil olan açıqlamada qeyd olunur ki, bu şəxs Latviyada yaşasa da, hal-hazırda Azərbaycanda saxta viza sənədləri düzüb-qoşmaqla məşğul olur və belə bir yolla da fəaliyyətini davam etdirməkdədir. Riqada oturub saxta viza biznesini idarə edən Vüqar Rəşidova, bu gün Bakıda və digər ünvanlarda yaşayan ayrı-ayrı şəxslərin də lazımınca dəstək verdikləri bildirilir. Həmin şəxslərdən vaxtilə “Favorit” restoranında çalışmış atası Rəşidov Rəşid Vahab oğlunun, əslən Laçın rayonunun Hacıxanlı kəndindən olan və hal-hazırda isə, Bakı şəhərinin Binəqədi rayonu ərazisində yaşayan Hümbətov Namiq Zakir oğlunun, Mətləb adlı başqa bir şəxsin, eyni zamanda Namiq Hümbətovun yaxın qohumu olan və Latviyada təhsilini davam etdirən Nicat Novruzov adlı tələbənin də, Vüqar Rəşidova lazımınca dəstək verdiyi bildirilir.
Çatdırılan açıqlamada o da qeyd olunur ki, Vüqar Rəşidova saxta viza biznesini yaşatmaqda köməklik edənlərin fəaliyyətləri haqda, yerli hüquq-mühafizə orqanı əməkdaşları məlumatlı olsalar da, nədənsə onlarla bağlı hər hansı tədbirlər görülmür. O halda sual oluna bilər ki, qanunsuz yolla fəaliyyət göstərən belə bir dəstənin üzvlərini kimlər müdafiə edirlər? Yaxud da, Rəşid Rəşidovun və digərlərinin fəaliyyətlərini araşdırmaq üçün, onların harada olmalarını dəqiqləşdirmək mümkün deyilsə, bəs xaricə getmələrinə kimlər şərait yaradıblar? Bu cür yanaşmaların varlığı da, əslində böyük şübhələrin əmələ gəlməsinə səbəb olmaqdadır.
Usandırıcı hal odur ki, Vüqar Rəşidovun rəhbərliyi ilə düzülüb-qoşulan saxta viza biznesi əməliyyatında, üstüstə ayrı-ayrı şəxslərdən 20 min avrodon çox pul da alındığı bildirilir. Hələ bu azmış kimi, əlavə bir neçə nəfərə xarici ölkələrdə işləmək və xəstələrini müalicə etdirmək adı altında saxta viza verilir. Həmin şəxslərdən biri isə, məhz qonşu Güncüstan Respublikasının aidiyyəti qurumları tərəfindən saxlanılaraq 6000 lari cərimə olunduğu da bildirilir.
Vüqar Rəşidov Azərbaycanı tərk etsə də, bu gün o, bəzi şəxslərin siyasi mühacir adı altında ölkəmizi tərk etmələrinə şərait yaratdığı da iddia olunur.
Diqqəti cəlb edən hal odur ki, aldadılan şəxslər ilk əvvəl viza almaq məqsədilə pulları Vüqar Rəşidovun atası Rəşid Rəşidovun “Unibank”ın Əcəmi filialında açılan AZ44UBAZ0723945464102USD001-dollar və AZ89UBAZ07239454641020EUR001-avro hesabına köçürürlər. Vüqar Rəşidov Bakıdakı əlaqələndiriciləri vasitəsilə lazımi məlumatları əldə etdikdən sonra, o, köçürülən pulların Riqaya transfer olunmasına da nail olur. Belə bir yolla da, adı çəkilən şəxslər aldadılırlar. Təəssüf doğuran hal odur ki, baş verən olaylarla bağlı zərərçəkən şəxslərdən bəziləri Bakı şəhər Baş Polis İdarəsinə müraciət etsələr də, qol qoyulan qanunsuzluqlarla bağlı toplanmış iş materialları Binəqədi rayon Polis İdarəsinə göndərilir. Verilən məlumatda o da bildirilir ki, toplanmış iş materialları hal-hazırda Binəqədi RPİ-nin əməkdaşı Elgiz Məmmədovun icraatındadır. Adı çəkilən qurumda isə, problemi araşdırmaq əvəzinə, məhz “dondurmaq”la məşğul olurlar.
“Gündəm Xəbər”ə belə bir açıqlama daxil olduqdan sonra, saxta viza biznesinə dəstək verənlərdən biri Namiq Hümbətovla, 07 mart 2017-ci il tarixdə saat 15:50 radələrində əlaqə saxladıqda, ilk olaraq o, sadalananların yalan olduğunu bildirsə də, az sonra baş verənləri təsdiqlədi. Hətta, o, onu da bildirdi ki, “mənim funksiyam Vüqar Rəşidovun tapşırığını yerinə yetirmək olub. Çünki, mən ayrı-ayrı şəxslərdən pulları almışam və Rəşid Rəşidovun adına açılmış hesab nömrələrinə də köçürmüşəm” deməklə kifayətləndi. Baş verənləri analiz etdikdə, biz də müəyyən mənada olub-keçənlərdən xəbərdar ola bildik.
Faciə odur ki, bu cür saxta viza biznesi ilə məşğul olan, ayrı-ayrı şəxslərə “torba tikən” Vüqar Rəşidov, “Qazeta Analitik İnformasiya Mərkəzi”nin rəhbəri olaraq edaletsizlik.com saytında dərc etdirdiyi “Sevinc Babayevanın ölümündə Fuad Ələsgərovun əl izləri” adlı məqaləsində, məhz Prezident Administrasiyası Hüquq-Mühafizə Orqanları ilə İş Şöbəsinin müdiri Fuad Ələsgərovu əsassız olaraq ittiham edir və onu “mafiya babası” olmaqda da qınayır. Bu şəxs dərc etdirdiyi məqaləsində onu da vurğulayır ki, guya Fuad Ələsgərov PA-nın rəhbəri Ramiz Mehdiyevin birbaşa göstərişləri ilə hərəkət edir və 2010-cu ildən başlayaraq, Azərbaycanda orqan transplatasiyası əməliyyatlarının başında da durur. Bu cür açıqlamaları oxuyub olduqca təəssüf hissi keçirdik. Şər-böhtan xarakterli ittihamlarla ictimaiyyəti çaşdırmağa çalışan Vüqar Rəşidova isə onu bildirmək istəyirik ki, Latviyada gizlənib Azərbaycanın siyasi rəhbərliyində təmsil olunan nüfuzlu şəxslər barəsində əsassız ittihamlar səsləndirmək, heç kimə heç zaman başucalığı gətirməyəcək. Bu cür əsası olmayan açıqlamaların dərci qarşı tərəfi deyil, məhz ittihamı səsləndirən tərəfi zərbə altında da qoyacaq. Saxta viza biznesi ilə məşğul olub ayrı-ayrı şəxslərin başına “corab toxuyan” bir kimsədən, bəyəm bundan artıq nəsə gözləmək olar? Düşünürük ki, yox! Yaxşı olar ki, ölkəmizin nüfuzlu vəzifə sahiblərini ittiham etməkdənsə, əsassız açıqlamalar dərc etməkdənsə, qanunsuz addımlardan daşınmaq daha yaxşıdır. Maraqlıdır ki, ölkəmizin nüfuzlu vəzifə sahibi olan şəxslərlə bağlı ağır ittiham səsləndirənlər, bu gün də azadlıqda olduqlarından sərbəst fəaliyyətlərini davam etdirməkdədirlər. Belə olan halda görəsən onları himayə edənlər kimlərdirlər? Odur ki, bir qədər düşünmək, bir qədər də götür-qoy etmək gərəkdir. Araşdırmamız davam edir. Açıqlamada adı çəkilən hər kəsin də mövqeyini dərc edə bilərik.
Mövzunu diqqətdə saxlayacağıq.

Cəfər