Bütün bunlardan sonra biz belə bir qənaətə gəldik ki, qəzetimizin elektron poçtuna göndərilən məktub, hansısa qərəzli qruplaşmanın düzüb-qoşduğu və heç də həqiqəti əks etdirməyən açıqlama imiş



Sentyabr ayının birinci ongünlüyündə qəzetimizin elektron poçtuna, Sabunçu Telefon Qovşağında işləyən bir qrup xanımlar adından şikayət məktubu daxil olmuşdu. Həmin gün qəzetimizin əməkdaşı daxil olan məktubu, bəlkə də özü üçün əhəmiyyət kəsb edən mövzulardan biri hesab etmiş və rəhbərliyin başqa bir tədbirdə iştirak etməsi səbəbindən, açıqlamanın işıq üzü görməsinə səbəb olmuşdur. Məqalənin dərcindən sonra açıqlamanın məzmununa diqqət yetirdikdə o da məlum olurdu ki, elektron poçtumuza məktub göndərən şəxs və yaxud da şəxslər, qovşağın rəisi Nəriman Salmanova qarşı olduqca qərəzli mövqe tutmuş və onunla bir növ düşmənçilik etdikləri çirkin niyyətlərini də ortaya qoymuşdular. Əməkdaşımızın günahı ucbatından məqalənin işıq üzü görməsinə baxmayaraq, qərara aldıq ki, bu yöndə araşdırmalarımızı davam etdirək və əsl həqiqətləri də ortaya çıxarmağa çalışaq. Bir məqamı da xüsusilə qeyd etmək istəyirik ki, “Gündəm Xəbər” qəzeti olaraq gündəlik çoxsaylı oxucularımızdan məktublar alırıq. Ünvanlanan hər bir məktubda, daha çox sosial problemlərin varlığından, məmur özbaşınalıqlarından, ədalətsiz məhkəmə qərarlarından, süründürməçilik amillərinin tüğyan etməsindən və digər olaylardan bəhs olunur. Düzdür, bir mətbu orqan olaraq daim çalışırıq ki, oxucularımızın hər bir probleminin ictimailəşdirilməsinə də nail ola bilək. Məqsədimiz, “Gündəm Xəbər” qəzeti ilə çoxsaylı oxucu auditoriyası arasında əlaqələri qoruyub saxlamaq olur. Çünki, tam əksəriyyət təsdiq edə bilər ki, bugünkü gündə “Gündəm Xəbər” qəzeti, qəzet bazarına daxil olan və oxucuları tərəfindən oxunan qəzetlərdən biridir. Sabunçu Telefon Qovşağının rəisi Nəriman Salmanov haqda göndərilən açıqlama da, bu səpkili məktublardan biri olub. Elə ki, qəzetimizin 11-17 sentyabr 2015-ci il tarixli sayında “Telefon qovşağının rəisi haqqında şok iddialar” başlıqlı məqalə işıq üzü gördü, çox keçmədi ki, daxil olan məlumatlar əsasında müxtəlif yollarla araşdırmalar aparmağa başladıq. Yəni, ilk öncə əməkdaşlarımızdan birini qeyd olunan ünvana ezam etdik ki, sadalanan faktlarla bağlı lazımi araşdırmalar aparıb, redaksiya rəhbərliyinə dəqiq məlumatları çatdıra bilsin. Əməkdaşımızın Sabunçu Telefon Qovşağında olması və qovşaq rəhbərliyinin xəbəri olmadan apardığı araşdırmalar, bütün qaranlıq məsələlərə tam aydınlıq gətirməyə imkan verir. Çünki, qovşağın təqribən 29 nəfər qadın işçisi ilə söhbəti zamanı, onların hər biri işıq üzü görən məqaləyə qəti etiraz etdiklərini bildirirlər. Hətta, onu da vurğulayılar ki, “biz neçə illərdir ki, bu qovşaqda işləyirik və Nəriman müəllim də bizə rəhbərlik edib. Ötən illər ərzində ondan hansısa pislik görməmişik, nalayiq söz danışdığını belə eşitməmişik. Arzu edərdik ki, hər bir vəzifə sahibi Nəriman müəllim kimi insani xarakterə, yüksək əxlaqi dəyərə malik bir şəxs olsun. Çünki, ondan hər zaman nümunəvi davranış, xalqımızın əxlaqına uyğun yanaşma da görmüşük. Bu belə olduğu halda, işıq üzü görən məqalədəki açıqlamaları olduqca pisləyirik, onu qərəzli, əsası olmayan açıqlama hesab edirik” deyirlər. O halda istər əməkdaşımız, istərsə də redaksiya rəhbərliyi əksər mətləblərdən məlumatlı ola bildi ki, göndərimiş məktub həqiqəti əks etdirməyən bir açıqlama imiş. Hətta, bu yöndə aparılan araşdırmalar azmış kimi, bəzi KİV nümayəndələrinin də Nəriman müəllimin hansı xarakterə, hansı düşüncə tərzinə malik vəzifə sahibi olması haqda danışdıqlarını dinlədikcə, məqalənin dərcinə sözün həqiqi mənasında, redaksiya rəhbərliyi olaraq biz də təəssüfləndik. Çünki bilib başa düşdük ki, rəhbərlik etdiyi kollektivinin qayğısına qalan, hər bir işçisinin problemini öz problemi hesab edən və lazım gəldikdə onların problemlərinin həllinə köməklik edən, sadə təbiətli olması ilə əksər vəzifə sahiblərindən fərqlənən bu şəxsə qarşı aparılan oyun qaydaları, hansısa qərəzli qruplaşmanın düzüb-qoşduğu mərkli planlardan biridir. Çünki, sadalanan faktlar aparılan araşdırmalar zamanı, heç vəhclə öz təsdiqini tapmır. Onu da qeyd edək ki, Nəriman Salmanov haqda dərc olunan açıqlama, həmin gün redaksiya rəhbərliyinin Bakı şəhərindən kənarda keçirilən tədbirdə iştirakı və verilən tapşırıqlara redaksiya əməkdaşının səhlənkar yanaşması səbəbindən işıq üzü görmüşdü. Əməkdaşımızın bəlkə də məsuliyyətsizliyi ucbatından işıq üzü görən məqalə, son olaraq onun daşıdığı vəzifəsindən uzaqlaşdırılmasına və əldə edə biləcəyi qonararının verilməməsinə səbəb oldu.

“Gündəm Xəbər”