Amma, adları çəkilən vəzifə sahiblərinin bu cür əməllərə qol qoymaları bir daha onu söyləməyə əsas verir ki, onlar bu gün də ölkə rəhbərinin vermiş olduğu tapşırıqlara açıq-aydın “meydan oxumaq”dadırlar
Son vaxtlar bəzi media qurumlarında gündəmi zəbt edən mövzulardan biri də, 2012-ci ildən 2016-cı ilin fevral ayına qədər olan dövr ərzində Nərimanov rayon İcra Hakimiyyətinin başçısı Abdin Fərzəliyevin, Az. Gözdən Əlillər Cəmiyyətinin sədri Səmyar Abdullayevin, Bakı şəhər İcra Hakimiyyəti Aparatının rəhbəri Rasim Quliyevin və adı çəkilən rayonda vaxtilə vəzifə sahibi olan bir neçə şəxsin, hətta heç bir vəzifə sahibi olmayanların əlbir olaraq, təqribən 160 nəfərə yaxın şəxsə mənzil verəcəkləri adı ilə aldatmalarıdır. Yəqin ki, əlaqədar dövlət orqanları ilə bərabər bir çox vəzifə sahibi olan şəxslər, hətta ictimaiyyət nümayəndələri də yaşanan problemin mahiyyəti haqda, bu günədək lazımi məlumatları əldə ediblər. “Gündəm Xəbər” olaraq hələ ötən saylarımızda belə bir mövzuya toxunub, problemin mahiyyətini çoxsaylı oxucularımızın və rəsmi dövlət orqanlarının diqqətinə də çatdırmışdıq. Dərc olunan açıqlamalarda onu da qeyd etmişdik ki, adları hallanan vəzifə sahiblərinin 160 nəfəri müəyyən yollarla aldatmaları və bunun nəticəsi olaraq 8 (səkkiz) milyon pulu ələ keçirmələri, olduqca böyük bir cinayət hadisəsidir. Baxmayaraq ki, ölkə rəhbəri hansı şəxsi rəhbər vəzifəyə təyin edirsə “gedin əhali ilə işləməyi bacarın, sakinlərin problemləri ilə məşğul olun” deyə lazımi tapşırıqlarını da verir. Amma, adları çəkilən vəzifə sahiblərinin bu cür əməllərə qol qoymaları bir daha onu söyləməyə əsas verir ki, onlar bu gün də ölkə rəhbərinin vermiş olduğu tapşırıqlara açıq-aydın “meydan oxumaq”dadırlar.
Bütün bunlara baxmayaraq təkrar bu mövzuya qayıtmağa qərar verdik ki, problemin mahiyyəti haqda məlumatı olmayan hər kəs, baş verənlərdən daha ətraflı xəbərdar ola bilsinlər. Belə ki, 2012-ci ildən başlayaraq Az.GƏC-nin balansında olan ərazidə, yəni Bakı şəhəri, Nərimanov rayonu, F.Yusifov küçəsi-40 ünvanında gözdən əlil olanlara 12 mərtəbəli 132 mənzilli yaşayış evinin tikintisinə başlanılır. Həmin vaxtdan adları hallanan şəxslər “Gözdən əlillərin fiziki cəhətdən sağlam insanlardan təcrid edilməməsi və onların cəmiyyətə inteqrasiyasına köməklik göstərilməsi” adı altında, ölkəmizin müxtəlif regionlarından olan 160 nəfərə yaxın sakini aldatmağa başlayırlar. Aldadılan şəxslərə bildirilir ki, “inşa olunacaq binanın 1-ci, 2-ci, 3-cü və 4-cü mərtəbələri gözdən əlillərə, yuxarı mərtəbələri isə, aztəminatlı ailələrə veriləcək”.
Onu da vurğulayaq ki, vəzifə sahibi olanlar əvvəlcə 160 nəfəri əvvəl qeydiyyatda olduqları ünvanlardan qeydiyyatdan çıxarır və rayonun F.X.Xoyski küçəsi, 123A ünvanında yerləşən Az.GƏC-yə məxsus yataqxanaya verilmiş arayışlar əsasında qeydiyyata alırlar. Hətta sakinlər yataqxanaya qeydiyyata alınarkən, yataqxanadakı otaqların ümumi ölçüsünün nə qədər olmasına belə məhəl qoyulmur. Atılan belə bir addımlardan sonra sakinlərin mənzil növbəliliyinə götürülməkləri barədə nəinki tələb olunan sənədlər, hətta ərizələri belə olmadan, yalnız şəxsiyyət vəsiqəsi əsasında sərəncamlar verilir və və sosial vəziyyətləri ağır olan insanlardan pulların alınması, məhz Məzahir Nəsibov adlı şəxsə həvalə olunur. Belə bir yolla da, ötən illər ərzində sakinlərdən üst-üstə 8 (səkkiz) milyon pul da ala bilirlər.
Daha bir faciə o odur ki, mənzil növbəliliyinə götürülmələri barədə verilmiş qanunsuz sərəncamlardan sonrakı tarixlərdə, məmurlar tərəfindən sərəncamların əsası olaraq kütləvi saxta dövlət sənədləri hazırlanmış, o cümlədən əlil olmayan şəxslər qanunsuz olaraq əlil kimi də göstərilmişlər. Bundan əlavə, sakinlərin mənzil növbələrinə götürülmələri haqda verilmiş sərəncamlarla, onların əsaslarını təşkil edən sənədlər arasında kütləvi uyğunsuzluq halları da olmuşdur. Belə ki, imtiyazı olmayan şəxslər Bakı şəhərində mənzil növbəsinə götürülərkən 7 (yeddi) il daimi qeydiyyat müddəti tələb olunduğu halda, böyük bir cinayətə imza atan şəxslər isə, qanunun belə bir tələbinə heç cür əməl etməmişlər. Yəni, adları hallanan vəzifə sahibləri aldadılan şəxsləri “tezbazar” bir-beş gün müddətində mənzil növbəsinə götürürlər. Belə az müddətdə mənzil növbəsinə götürülmək isə, qanunvericilikdə imtiyazlı vətəndaşlara (o cümlədən əlillərə) şamil olunur. Bu cür qanunsuzluqlara qol qoyanların əməlləri sanki “Piramida” formasında olur və ələ keçirilən “haqq-hesab”ların daha çoxu, məhz “Piramida”nın zirvəsində duran şəxslər tərəfindən ələ keçirilir. Ümumilikdə götürdükdə adları çəkilən vəzifə sahiblərinin belə bir əməllərə qol qoymalarında başlıca məqsəd, məhz külli miqdarda “haqq-hesab”ı ələ keçirmək olub. Baş verənləri təhlil etdikdə isə onu da müəyyən etmək olur ki, bu cür əməl sahibləri böyük bir “korrupsiya cinayəti”nə imza atmışlar və 160 nəfərə yaxın sakini də çıxılmaz duruma salmışlar. Xoşagəlməz hal odur ki, baş verən olaylarla bağlı “Gündəm Xəbər”in ötən saylarında bir neçə dəfə açıqlama dərc edib, aidiyyəti qurumlara müraciətlər etsək də, ötən müddət ərzində hər hansı əsaslı cavab əldə edə bilməmişik. Yalnız bir neçə instansiyadan əldə etdiyimiz cavablar o olub ki, “problemin araşdırılması üçün ünvanladığınız məktub Baş Prokurorluğa göndərilmişdir” deyə cavab verilib. Baş Prokurorluqdan isə, aparılmış və yaxud da aparılması nəzərdə tutulmuş addımlarla bağlı heç bir cavab verilmir.
Digər diqqəti cəlb edən olaylardan biri isə, olmazın duruma salınan şikayətçi sakinlərdən bəzilərinin bir neçə gün bundan əvvəl Bakı şəhər Baş Polis İdarəsinə dəvət olunmaları və onlara adı çəkilən qurumda etinasız yanaşmanın varlığıdır. Belə ki, şikayətçi sakinlər “Gündəm Xəbər”in əməkdaşına bildirirlər ki, “düzdür, bizi BŞBPİ-nə dəvət etdilər, amma lazımınca dinləmədilər. Elə ki, adı çəkilən qurumun səlahiyyətlisi ayaqüstü etdiyimiz söhbət zamanı dəqiqləşdirə bildi ki, şikayətin motivini Nərimanov rayon İcra Hakimiyyətinin başçısı Abdin Fərzəliyevin, Az. Gözdən Əlillər Cəmiyyətinin sədri Səmyar Abdullayevin, Bakı şəhər İcra Hakimiyyəti Aparatının rəhbəri vəzifəsini daşıyan Rasim Quliyevin və adı çəkilən rayonda vaxtilə vəzifə sahibi olan bir neçə nəfər şəxsin, hətta heç bir vəzifə sahibi olmayanların əlbir olaraq 160 nəfərə yaxın sakini aldatmaları durur, o halda həmin şəxsin cavabı o oldu ki, “problemlə bağlı Nərimanov RPİ-də cinayət işi açılıb, indi siz gedin, lazım gələrsə dəvət edəcəyik” deməklə, problemin varlığına bu cür yanaşmasını ortaya qoydu. Biz də çoxdan xəbərdarıq ki, təqribən doqquz ay bundan əvvəl Nərimanov RPİ-də başlanan cinayət işi, sırf baş verən olayla bağlı deyil, yalnız Məzahir Nəsibov adlı şəxsin dələduzluq əməllərinə qol qoyması ilə bağlı açılıb. Hal-hazırda xaricdə yaşayan və bəzi xəbər portallarına canlı açıqlamalarını danışan Məzahir Nəsibov bildirir ki, “bəli, sadalanan olaylar həqiqətdir və mən də vaxtilə oynanılan oyunların oyunçusu olmuşam. Günahım ondadır ki, mən adları hallanan vəzifə sahiblərinin tapşırıqları əsasında hərəkət etmişəm və çoxsaylı imkansız sakinlərdən pulları alıb da, həmin şəxslərə çatdırmışam”. Bu cür açıqlamalar onu söyləməyə əsas verir ki, cinayət işi Məzahir Nəsibovla deyil, əslində onu belə bir yollara təhrik edənlərlə bağlı açılmalıdır”.
Şikayətçi sakinlərin bu cür açıqlamalarını dinlədikcə o qənaətə də gəlirik ki, 160 nəfərə yaxın sakini olmazın dərdə salan vəzifə sahiblər ilə bağlı, artıq əməli addımlar atılmasının zamanı çatıb. Düşündürücü hal odur ki, belə bir addımlar hansısa şəxs və ya şəxslər tərəfindən atılardısa, atılan addımlara müəyyən mənada don da geyindirmək olardı. Amma, Nərimanov rayonuna rəhbərlik edən bir şəxsdən və digər vəzifə sahibi olanlardan bu cür addımların atılması, sanki hər kəsi şoka salacaq addımlardır. Bu gün gəldiyimiz qənaət isə ondan ibarətdir ki, yaşanan olay ictimailəşdikcə aidiyyəti qurumların, xüsusilə də ölkə rəhbəri cənab İlham Əliyevin, birinci vitse-prezident Mehriban xanım Əliyevanın və digər səlahiyyət sahiblərinin problemlə bağlı yanaşmalarında ümidverici anlar baş verəcək.
Çünki, bir neçə vəzifə sahibinin atdıqları bu cür iyrənc əməllər, nəinki 160 nəfərə yaxın şəxsin içgüzar nüfuzuna, hətta dövlətimizin nüfuzuna da müəyyən mənada xələl gətirən addımlardır.
Onu da vurğulayaq ki, baş verənlərlə bağlı şikayətçi sakinlərin 500-dən çox ərizə və müraciətləri Azərbaycan Respublikasının Prezidentinə, Mehriban xanım Əliyevaya, Milli Məclisinin rəhbərliyinə və onun müvafiq struktur bölmələrinə, deputat blokunun hər bir üzvünə, ali və yüksək səviyyəli müvafiq icra və hüquq-mühafizə orqanlarının rəhbərlərinə, onların müvafiq struktur bölmələrinə, Prezident Administrasiyasının, Baş Prokurorluğun, Milli Məslisin qarşısında keçirdikləri qısamüddətli mədəni piketlərə, Prezident Administrasiyasının müvafiq qurumlarının, Bakı şəhər İcra Hakimiyyəti başçısının qəbullarında olmalarına baxmayaraq, bu gün də hakimiyyətdə təmsil olunan dövlət məmurlarının bir-biri ilə sıx əlaqədə olmaları, bu günə qədər acınacaqlı korrupsiya faktı barəsində hər hansı tədbirin görülməsinə imkan verməmişdir. Əksinə qanunsuz əməlləri ilə fəaliyyət göstərən və yuxarıda adları çəkilən məmurlara yüksək səviyyəli dövlət məmurları tərəfindən şəbəkə halında himayədarlıq olunduğundan, sosial vəziyyətləri ağır olan sakinlərin pullları üzərində baş vermiş mütəşəkkül korrupsiya və dələduzluq əməllərinə göz yumulur, sanki sakinlərə qarşı şər-böhtan kompaniyası da təşkil olunur.
Problemin varlığını diqqətdə saxlayacağıq. Araşdırmalarımız davam edəcək. Açıqlamada adı çəkilən hər kəsin mövqeyini dinləyə bilərik.

Cəfər