Sosial vəziyyətləri çətin durumda olan insanlardan pulların alınması üçün, ilk öncə “işbaz” olaraq Məzahir Nəsibov adlı şəxs müəyyənləşdirilir

2005-ci ilin dekabr ayından Abdin Fərzəliyevin icra başçısı olduğu Nərimanov rayonunda yaşanan və həddi-hüdudu bilinməyən çoxsaylı problemlərin varlığı, təkcə bu gün deyil, hələ ötən illər ərzində də müzakirə olunan məsələlər olub. Problemin əmələ gəlməsinə müəyyən hallarda həyata keçirilən yarıtmaz idarəçilik səbəb olubsa, əksər hallarda isə, rəhbərliyin ayrı-ayrı vəzifə sahibləri ilə qurduğu işbirliyi və qol qoyduğu çoxsaylı qanunsuzluqlar əsas rol oynayıb. Bu gün rayon ərazisində yaşanan və çoxsaylı sakinlərin aldadılması ilə nəticələnən addım da, məhz Abdin Fərzəliyevin və digər vəzifə sahiblərinin adları ilə bağlanan fırıldaq əməlidir. Belə ki, “Gündəm Xəbər”in redaksiyasına üz tutan Mübariz Hacıyev adlı şəxs, təqribən 107 nəfər sakinin imzaladığı müraciəti redaksiyamıza təqdim edərək bildirdi ki, “Bakı şəhəri Nərimanov rayon İcra Hakimiyyətinin (RİH) başçısı Abdin Fərzəliyevin və Azərbaycan Gözdən Əlillər Cəmiyyətinin (Az. GƏC) sədri Səmyar Abdullayevin təşkilatçılığı ilə, müxtəlif təbəqələrdən olan korrupsiyalaşmış dövlət məmurları tərəfindən mütəşəkkil korrupsiya və dələduzluq yolu ilə, respublikanın ayrı-ayrı regionlarından 160-a yaxın sosial vəziyyətləri çətin durumda olan ailələrin (yəni bizlərin) 8 (səkkiz) milyon manat məbləğində pulları mənimsənilmişdir.



Baş verən korrupsiya və dələduzluq “PİRAMİDA” formasında təşkil olunmuş və “PİRAMİDA”nın üzvləri Nərimanov RİH-in başçısı, Nərimanov RİH-in müvafiq qurumları, Nərimanov RPİ-in müvafiq qurumu, Az.GƏC-in sədri və GƏC-in müvafiq qurumu, Bakı şəhər İcra Hakimiyyətinin başçısı aparatının müvafiq qurumları və s. olmuşlar. Dələduzluq əməllərinə qol qoyanlar sosial vəziyyətləri çətin olan ailələr üzərində korrupsiya və dələduzluq əməllərini həyata keçirmək üçün, “Gözdən əlillərin fiziki cəhətdən sağlam insanlardan təcrid edilməməsi və cəmiyyətə inteqrasiyasına köməklik göstərilməsi” və “Sosial vəziyyətləri çətin olan ailələrin mənzillə təmin edilməsi” adı altında, təqribən 160-a yaxın ailəni Nərimanov rayonu, F.X.Xoyski küçəsi, 123A ünvanında yerləşən Az.GƏC-nə məxsus yataqxanaya qeydiyyata almış və Nərimanov RİH-in başçısı Abdin Fərzəliyevin sərəncamları ilə, aldadılan şəxslər mənzil növbəsinə də götürmüşlər. Belə bir çirkin əməllərini həyata keçirmək üçün, Nərimanov rayonu ərazisində gözdən əlillərə məxsus ərazidə-F.Yusifov küçəsi-40 ünvanında yeni tikilən 12 mərtəbəli 132 mənzilli binanı alət etmişlər. Bu məqsədlə sosial vəziyyətləri çətin olan insanlardan pulların alınması üçün, ilk öncə “işbaz” olaraq Məzahir Nəsibov adlı şəxs müəyyənləşdirilir və adı çəkilən şəxs də, bu məsələ üzrə onların “makler”ləri olmuşdur. Sonradan məlum olmuşdur ki, Nərimanov RİH-in başçısı Abdin Fərzəliyevin və GƏC-in sədri Səmyar Abdullayevin təşkilatçılığı və birbaşa icraçılığı ilə müxtəlif təbəqələrdən olan dövlət məmurları tərəfindən, dövlət qulluğu vəzifələrindən sui-istifadə edilərək, Azərbaycan Respublikasının müvafiq normativ-hüquqi akt və sənədlərinin tələbləri pozulmaqla, saxta dövlət sənədləri hazırlanmış və bizlər qanunsuz olaraq qeydiyyata və Bakı şəhər İcra Hakimiyyətinin başçısı aparatının rəhbəri Rasim Quliyevin razılığı ilə sağlam insanlar olduğumuz halda, əlil kimi mənzil növbəsinə götürülmüşük. Belə ki, ilk öncə onlar qeyd olunan addımlarını atmışlar.




• Respublikanın müxtəlif regionlarından olan 160-a yaxın sağlam insanlar yaşadıqları ünvanlardan qeydiyyatdan çıxarılıb, GƏC-in yataqxanasına qeydiyyata alınmış və yataqxananın yaşayış sahəsinin imkan vermədiyi də nəzərə alınmamışdır.

• Bizim kütləvi olaraq mənzil növbəliliyinə götürülməyimiz barədə nəinki tələb olunan sənədlər, hətta ərizəmiz olmadan belə, yalnız şəxsiyyət vəsiqəsi əsasında sərəncamlar verilmişdir.

• Hər birimiz ümumi növbəlilik siyahısına daxil edilməklə, mənzil növbəsinə götürülməyimiz barədə verilmış sərəncamlarla, onun əsaslarını təşkil edən sənədlər arasında ziddiyyətlər mövcud olmuşdur.

• Sərəncamlarda ümumi növbəlilik siyahısı əsasında mənzil növbəsinə götürülməyimizə baxmayaraq, sonradan sərəncamların əsası kimi sənədlər imtiyazlı mənzil növbəsi üçün hazırlanmışdır.

• Mənzil növbəsi üçün sərəncamlardan sonra məmurların özləri tərəfindən kütləvi olaraq, qeyd olunan sərəncamların əsasını təşkil edən saxta sənədlər hazırlanmışdır.

• Ümumi növbəlilik siyahısına daxil edilməklə mənzil növbəsinə götürülən vətəndaşlardan 7 il daimi qeydiyyat müddəti tələb olunduğu halda, sərəncamlarda həmin müddət nəzərə alınmamışdır. Bu baxımdan qanunvericilikdə müddət nəzərə alınmamaqla mənzil növbəsinə götürülməsi imtiyazlı vətəndaşlara (o cümlədən əlillərə) şamil olunur (faktiki müddət 1-5 gün olmuşdur);

• Əlil olmayan 160-a yaxın hər bir şəxs, məmurlar tərəfindən mənzil növbəsi üçün hazırlanan sənədlərdə qanunsuz olaraq müxtəlif formalarda əlil kimi gösərilmişdir.



• Korrupsiya əməlləri aşkarlandıqdan sonra, Abdin Fərzəliyev özünün və korrupsiyanın gücünü nümayiş etdirmək üçün, bizə heç bir məlumat verilmədən və əvvəlki qeydiyyatlarımız bərpa olunmadan, Az.GƏC-in yataqxanasından vətəndaşlıq qeydiyyatlarımızı ləğv etdirmişdir və s. Bununla da bizlərə təqdim olunmuş şəxsiyyət vəsiqələri və sərəncamlar, yalnız və yalnız bizim kimi imkansız şəxslərin pullarına sahib olmaq məqsədi daşımışdır. Dövlət məmurlarının bizlərə qarşı korrupsiya və dələduzluq halları tərəfimizdən aşkarlanarkən, onlar öz əməllərini ört-basdır etmək, bizlərdən alınmış pullara sahib olmaq məqsədilə, hazırlanmış bütün sənədləri, o cümlədən vətəndaşlıq qeydiyyatlarımızı ləğv etmiş, ev vermək üçün bizlərlə birbaşa pul əlaqəsində olan Nəsibov Məzahir Dursun oğlunu təzyiq edərək, onu Azərbaycan Respublikasını tərk etməyə məcbur etmişlər (məqsəd: şahidi yox etmək).. Hal-hazırda Nərimanov RİH-in başçısı Abidin Fərzəliyevin və Az.GƏC-in sədri Səmyar Abdullayevin ideoloqu, təşkilatçısı və birbaşa icraçısı olduqları mütəşəkkil korrupsiya və dələduzluq əməllərini, onların "işbaz"ı Məzahir Nəsibovun üzərinə yönəltməklə və külli miqdarda pullarımıza tam sahib olmaq məqsədilə, Məzahir Nəsibovun barəsində 09.07.2016-cı il tarixdə Nərimanov rayon prokurorluğunda CM-nin dələduzluq maddəsi ilə cinayət işi açdırmışlar. Baş vermiş cinayətə müvafiq cinayət işinin açılmadığı barədə çoxlu sayda yazılı və şifahi müraciətlərimizə baxılmır, hətta dələduzluq maddəsi ilə açılmış cinayət işi üzrə də heç bir iş aparılmır. Baş Prokurorluq isə, bizim müraciətlərimizlə bağlı səlahiyyətli dövlət orqanlarının müraciətlərinə nəinki göz yumur, hətta Nərimanov rayon prokurorluğunun və RPİ-in qeyri obyektivliyini, fəaliyyətsizliyini müdafiə etməklə, adı çəkilən korrupsiya əməlinə və korrupsionerlərin fəaliyyətlərinə rəvac verir. Bununla da Nərimanov RİH-in başçısı Abdin Fərzəliyevin və Az.GƏC-in sədri Səmyar Abdullayevin təşkilatçılığı ilə həyata keçirilən mütəşəkkil korrupsiya və dələduzluq nəticəsində əlimizdən alınan 8 (səkkiz) milyon manat pulumuzun qaytarılmasından “həyasızcasına” imtina edilir. Baş verənlərlə bağlı ortaya çoxsaylı suallar da çıxır



• Dövlət məmurları tərəfindən 160-a yaxın əlil (o cümlədən gözdən əlil) olmayan insanlara ev verilməsi adı ilə, Az.GƏC-in yataqxanasına qeydiyyata alınması və ev növbəliliyinə götürülməsi, sonradan sənədlərin ləğv edilməsi, dövlət məmurlarının qanunsuz və saxtakarlığını təsdiq etmirmi?

• Dövlət məmurları tərəfindən əsassız və saxta sənədlərin hazırlanmasına, normativ hüquqi akt və sənədlərin tələbləri pozulmaqla, qanunsuz qərarların qəbul edilməsinə təsir edən amil, məhz korrupsiya amili deyilmi?



• Yuxarıda qeyd olunan bu və ya digər faktlar 160-a yaxın kasıb ailədən alınan 8 (səkkiz) milyon manat pula tam sahib olmaq məqsədi daşımırmı? Bu baxımdan hesab edirik ki, QANUNUN ALİLİYİNİN və ƏDALƏTİN bərpa olunması naminə, yuxarıda göstərilənlərə hər hansı məmur səviyyəsində yox, səlahiyyətli hüquq-mühafizə orqanı tərəfindən qanuni, obyektiv qiymət verilməlidir. Evlərini, torpaqlarını satıb, banklardan kredit götürüb, qohum-əqrabadan borc pul alıb ev sahibi olmaq istəyənlər, Nərimanov RİH-in başçısı Abdin Fərzəliyevin və Az.GƏC-nin sədri Səmyar Abdullayevin mütəşəkkül korrupsiya və dələduzluq əməllərinin qurbanına çevrilmişlər. Aldadılan ailələr acınacaqlı və ağır şəraitlərdə, qohum-əqraba yanında, kirayələrdə yaşayır və XXI əsrdə hüquqsuz, müdafiəsiz insanlara da çevrilmişik. Göstərilənlər barədə 500-dən çox Azərbaycan Respublikasının Prezidentinə, Milli Məclisinin rəhbərliyinə və müvafiq strukturlara, deputatlardan tam əksəriyyətinə, ali və yüksək səviyyəli müvafiq icra və hüquq mühafizə orqanlarının rəhbərlərinə, onların müvafiq struktur bölmələrinə olan müraciətlərimizə (hətta 02.11.2016-cı il tarixdə Baş prokurorluğun və 15.11.2016-cı il tarixdə Milli Məslisin qarşısında keçirdiyimiz qısamüddətli mədəni piketlərə) baxmayaraq, hakimiyyətdə təmsil olunan dövlət məmurlarının bir-biri ilə sıx əlaqələri olduğu üçün, bu günə qədər heç bir tədbir görülməmişdir. Əksinə qanunsuz əməlləri ilə fəaliyyət göstərən məmurlara, yüksək səviyyəli məmurlar tərəfindən himayədarlıq olunmuş, sosial vəziyyətləri çətin olan insanların pulu üzərində baş vermiş dövlət məmurlarının mütəşəkkül korrupsiya və dələduzluq faktlarına göz yumulmuşdur. Bütün bunlar haqda onu bildiririk ki,



• hakimiyyətdə təmsil olunan məmurlar, korrupsiya və məmur dələduzluğunu inkar edirlər;

• prokurorluq belə bir faktlar üzrə araşdırma aparmır;

• polis korrupsiya qurbanlarını təhdid edir, korrupsioner və dələduz məmurları qoruyur;

• korrupsioner və dələduz məmurlar, korrupsiya qurbanları barədə içtimaiyyətdə mənfi rəy, «yaramaz obraz» formalaşdırır;

• korrupsiya «qanun», korrupsioner «ədalətli» hökmdardır;

• korrupsiya qurbanları acınacaqlı həyat tərzi ilə sağalmaz xəstəliklərə tutulur, intihar vəziyyətinə çatdırılır və s. korrupsionerlərin naminə həyatla vidalaşır. Əlavə olaraq, onu da nəzərinizə çatdırırıq ki, korrupsionerlərin hegemonluqlarının, qanunsuzluqlarının, ədalətsizliklərinin və digər halların nəticəsi olaraq, biz digər ölkələrin prezidentlərinə, səfirliklərinə və beynəlxalq qurumlara müraciət etməyə məcbur olduq. Bu belə davam edərsə, biz ən azından hüquqlarımızın bərpası, o cümlədən korrupsiyanın bizi saldığı səfil həyatından qurtarmaq üçün, Azərbaycanda peşəkar və mütəşəkkil formada korrupsiyalaşmış dövlət məmurlarına qarşı, daha geniş məfhumda və miqyasda xarici ölkələrdə etirazımızı davam etdirmək məcburiyyətindəyik. Hal-hazırda ortalıqda qalan ailələrin Sizlərə böyük inamı və ehtiyacı var. Odur ki, yazıb sizdən xahiş edirik ki, dövlət məmurlarının qanunsuz hərəkətlərini, belə bir qanunsuz hərəkətlərin ört-basdır edilməsində, məhz onların bir-birlərinə yardım etmələrini içtimailəşdirəsiniz”. İşıq üzü görən açıqlama təqribən 2012-2013-cü illərdən getgələ salınan, verdikləri pulları hələ də geri qaytarılmayan və bu gün də haqlı mübarizə yolundan dönməyən çoxsaylı sakinlərin müraciətləri əsasında dərc olunub. İnanırıq ki, açıqlamanın dərci aidiyyəti qurumların nəzər-diqqətini problemin varlığına yönəldəcək və həlli istiqamətində müəyyən addımlar da atılacaq. Mövzu olduqca aktuallıq kəsb etdiyindən, növbəti saylarımızda çoxsaylı oxucularımızı, yaşananlarla bağlı daha ətraflı məlumatlandırmağa çalışacağıq. Odur ki, bizi izləməyi unutmayın. “Gündəm Xəbər” olaraq məqalədə adı çəkilən hər kəsin mövqeyini dinləyə bilərik.

Cəfər
gundemxeber.az