Belə olan halda sual edirik ki, peşəkar yazara ərsəyə gətirilmiş mövzunu oğurlayıb özününküləşdirmək yaraşarmı?

Son vaxtlar bəzi xəbər portallarının əməkdaşları, hətta rəhbər şəxsləri belə “Gündəm Xəbər”in ərsəyə gətirdiyi bir çox məqalələri özününküləşdirməklə, özlərini media aləminin “kapitanı” hesab etməkdən belə çəkinmirlər. Problemin kökündə nələr dayanır və qarşı tərəflərin bilərəkdən oğurluq etmələrinə səbəb nə olur? Bu yöndə müəyyən araşdırmalar apardıqda o da məlum olur ki, “mən də xəbər portalının rəhbəriyəm” deyə özünü ictimaiyyətə bu cür təqdim edən, amma bəzi məsələlərdə elementar təsəvvürə malik olmayanlar, uzun illərdir ki, belə bir yolun yolçularıdırlar. O halda sual oluna bilər ki, “Gündəm Xəbər”in yaradıcı əməkdaşlarının ərsəyə gətirdiyi açıqlamaların çoxunu oğurlamaq yolu tutanları, belə bir yoldan necə çəkindirmək olar? Düzdür, problemin varlığı müəyyən mənada xoşagəlməz ab-hava yaratsa da, düşünürük ki, onun da həlli yolları mümkündür.
Onu da vurğulayaq ki, hələlik adlarını çəkmək istəmədiyimiz xəbər portallarının əməkdaşları mövzu oğurluğunu həyata keçirərkən, heç bir halda mənbə olaraq “Gündəm Xəbər”ə istinad etmirlər. Yalnız ərsəyə gətirdiyimiz açıqlamaların başlıqlarını dəyişməklə, bəzən də dəyişməyi unutmaqla oxşar addımlarını atırlar. Bu yolla həmin şəxslər öz adları ətrafında ictimai fikir formalaşdırmağa çalışırlar ki, guya onlar araşdırmaçı jurnalistlərdirlər, peşəkar media nümayəndələridirlər. Belə olan halda sual edirik ki, peşəkar yazara ərsəyə gətirilmiş mövzunu oğurlayıb özününküləşdirmək yaraşarmı? Əsla yox! Deməli hər kəsdə abır-həya olmalıdır ki, bu cür addımları atmasın. Abırsızlardan isə, nəinki mövzu oğurluğunu etməyi, hətta digər addımları atmalarını da gözləmək olar.
Sonda onu da qeyd edək ki, “Gündəm Xəbər”in ərsəyə gətirdiyi bir çox məqalələri özününküləşdirməklə oğurluq edənlər, əslində atdıqları addımları ilə nəyə qabil olduqlarını da ortaya qoyurlar. Bu da onu söyləməyə əsas verir ki, kiminsə əqli məhsulunu oğurlamaq, öz adına çıxmaq, sağlam düşüncə sahiblərinə deyil, xəstə təfəkkürə malik olanlara məxsus addımlardır.
P.S. Problemin varlığı aktuallıq kəsb etdiyindən mövzunu diqqətdə saxlayacağıq. Daha çox zərurət yarandığı halda isə, “Gündəm Xəbər”in ərsəyə gətirdiyi mövzulardan bəzilərini oğurlayanların kmiliyini, xəbər portallarının adlarını geniş ictimaiyyətə bəyan da edəcəyik.

“Gündəm Xəbər”