Belə bir hallar yolverilməz olsa da, təssüflər olsun ki, hal-hazırda bu cür xoşagəlməz olaylar mövcuddur və GDU-nu da ağuşuna alıb

Deyirlər ki, dünya praktikasında bir neçə biznes sahəsi var ki, onların içərisində ən gəlir gətirənlərindən biri də söz alveridi. Yəni, necə "söz? " Sözdü də, dedin nəsə qazanarsan? Onlar da, yəni xaricdə yaşayanları nəzərdə tuturam, deyə bilmərəm ki, bizlərdə bu əksər hallarda gopalogiya olur. Bizləri və sizləri deyə bilmərəm, amma hal-hazırda GDU-da gedən proseslər elə həmin söz alverindən başqa nəyəsə oxşamır. Təbii ki, hər sahədə olduğu kimi, təhsil sahəsində, əsasən də ali təhsil ocaqlarında korrupsiya və rüşvətxorluq, neqativ hallar yoxdur desək, yəqin ki, yalan danışmış olarıq. Oxucu dərhal bizim səmimiliyimizə şübhə ilə yanaşar. Hətta, həmin neqativ halları təhlil, yaxud da tənqid edəndə, belə insanların şəxsi (haşiyəyə çıxaraq belə bir sözün üzərinə gəlirəm, şəxsi həyat sözü artıq elə bu məhfumun toxunulmazlığından xəbər verir. Gəlin qanun çərçivəsində danışaq. Kiminsə şəxsi əmlakı oğurlandıqda oğruya azadlıqdan uzun illər məhrumetmə cəzası verilir, amma kiminsə şəxsi həyatını müzakirə edənlərə cəza növü şamil olmadığından danışanların sayı günü-gündən çoxalır. Hətta, iş o yerə gəlib çatıb ki, bu kimi məsələlərə soyuqqanlılıqla qulaq asıb hərdən fikir söyləmədən biganəlik nümayiş etdiririk). Desəm ki, çox qəribə bir zaman kəsiyindəyik, yəqin ki, yanlışlıq olmaz. İllər öncəyə qayıdaraq sovetlər dönəmini xatirimizdə canlandıraq. Ataların belə bir zərb-məsəli var ki, sağlığında "kor Fatma, öləndə badam gözlüm". Heç kimə sirr deyil ki, sovetlər dönəmində qanunların aliliyinin varlığını tez-tez dilimizə gətirsək də, o illərdə yaşayanlar bilirlər ki, TQDK fəaliyyət göstərənə qədər təhsil haqqında danışarkən, ilk öncə ağlımıza təhsil almaq üçün "pul" gəlirdi. Bəs bu gün nələr baş verir? Mətləbdən heç də uzaq düşməyək. Həmin illərdən istər ali, istər orta təhsil ocaqlarında çalışanların başından, deyəsən o illərin dumanı heç cür çəkilə bilmir. Bu gün də təssüflər olsun ki, müəyyən qrup adamlar (üzr istəyirəm heç kimi təhqir etmək istəmirəm) hələ də istəklərinə nail olmaq üçün, mətbuatdan yararlanırlar. Bu faktdır, danılmaz həqiqətdir.
Belə bir neqativ halları görmək, təbii ki, əsl medianın yaralı yeridir. Çünki, bunları sağlam jurnalistika adlandırmaq yersizdir, bu artıq reket jurnalistikanın əsas qoludur. Belə bir hallar yolverilməz olsa da, təssüflər olsun ki, hazırda bu cür xoşagəlməz hallar mövcuddur və GDU-nu da ağuşuna alıb.
Bir müddət öncə xəbər portallarının birində gözüm bir yazıya sataşdı. Yazıda qeyd olunurdu ki, ali təhsil ocaqlarında baş alıb gedən korrupsiya və rüşvət bataqlığından bəhs edən yazıların sayı, səhv etmirəmsə 2016-cı ildə 10 minə çatıb. Dərc olunan yazıların çox hissəsi isə, məhz Gəncə Dövlət Universitetinin payına düşür. Görəsən səbəb nədir ki, adı çəkilən bu təhsil ocağındakı qalmaqallara son verilmir? Doğrudanmı korrupsiya və rüşvətxorluq adı çəkilən təhsil ocağında hədsiz səviyyədə tüğyan edir? Əgər bu belədirsə, nəyə görə GDU haqqında TN-nin rəhbərliyi hər hansı tədbiri görmür?
Artıq uzun illərdir ki, mətbuatda GDU ilə bağlı yazıların ardı-arası kəsilmir. Hətta, bu günlərdə saytların birində GDU-nun kafedra müdirlərindən birinin rektoratlıqda universitetin rektoru Yusif Yusifovun keçirdiyi iclas zamanı hansısa xanım işçiyə qarşı mədəniyyətsiz davranması, xanıma qarşı nalayiq söyüşlər söyməsi barədə kafedrada səsyazısı yayılmışdı. Bu artıq yol verilməz haldır. Çalışdığı təhsil ocağnda alim olmaq deyil, bir kişi olaraq hansısa qadına qarşı rektorun nalayiq davrandığını görən azərbaycanlı kişisinin buna münasibət göstərməməsi, hələ ki, onu işdə, işdən kənar yerlərdə, bir sözlə müzakirə obyektinə çevirmək utanc gətirəcək bir haldır. Mövzudan ayrılmadan deyək ki, səsin montaj olması və ya olmaması barədə mülahizələrimizə qərar vermədən öncə belə bir sual çıxır. Tutaq ki, sayt əməkdaşı adı qeyd olunan kafedra müdirinin səsini montaj edib. O halda ortaya belə bir sual da çıxır ki, həmin sayt əməkdaşının kafedra müdiri ilə nə qərəzçiliyi ola bilər? Nəyə görə universitetdə digərlərinin deyil, məhz onun səsini montaj edərək yayımlayıblar. Hər bir olayın müəyyən səbəbi olmalıdır. Hərhalda bu bizim işimiz olmasa da, bütün zamanlarda jurnalistləri lüzumsuz xəbər yaymaqda günahlandıranlar ola bilər ki, bu məsələdə haqlıdırlar. Səs yazısına gəlincə isə onu deyə bilərik ki, əgər həmin səs yazısı montaj olmuş olsa, yəqin ki, səs sahibi dərhal hüquq-mühafizə orqanlarına müraciət etmiş olar.
Bu gün elə zaman kəsiyindəyik ki, yaşadığımız illər quruculuq, yenidənqurma illərinə təsadüf edir. O baxımdan da bütün sahələrdə olduğu kimi yeni-yeni reformalar keçirilən təhsil sahəsində də, neqativ halların varlığı danılmaz faktdır. Necə deyərlər, iş olan yerdə nöqsan da olar. Amma, hansı nöqsanlar?
GDU ilə bağlı yazılara diqqət yetirib müəyyən araşdırma apardıqdan sonra belə bir nəticəyə gəlmək olar ki, Molla Nəsrəddin demişkən “dava yorğan davasıdır”, yəni dava rektorluq kürsüsü uğrundadır. Görəsən özünü xəstə təxəyyülün məhsulu olaraq bu kürsüdə rektor görmək istəyən kimdir?
İlk öncə onu deyək ki, özünü rektor görmək istəyən şəxs bilməlidir ki, rektor kürsüsünə layiq olanın təyinatını ölkə başçısı verir. Mətbuata dirsəklənib özünü xülyalarda rektor görənin belə bir arzuda olması, ilk öncə onun saxta alim adına yiyələnməsindən başlayıb desək, yəqin ki, yanılmarıq. Əks təqdirdə rektorluq kürsüsündə oturmaq üçün çalışdığı təhsil ocağının ölkə mətbuatında dayanmadan "işıqlanmasını" təşkil edən və ya onun komanda üzvləri bu gün bir vətəndaş, bir alim olaraq adı çəkilən təhsil ocağının korrupsiya, rüşvət, plagiatlıq, elmi nəaliyyətlərin olmaması haqqında deyil, yalnız pul, vəzifə haqqında düşünürlər. Ölkə mətbuatında GDU ilə bağlı dərc olunan əksər məqalələri oxuduqca araşdırmalarımızın nəticəsi bizi belə bir anlama gətirir ki, əksər məqalələrin bir məqsədi, bir hədəfi var ki, o da rektorluq kürsüsü uğrundadır. Hörmətli oxucular! Bu haqda daha geniş açıqlamalarımızı və apardığımız araşdırmaların nəticəsini növbəti saylarımızda sizinlə bölüşməyə çalışacağıq.
"Gündəm Xəbər" redaksiyası olaraq GDU-nun müəllim və tələbə heyyətinin fikir və rəylərini də dinləməyə hazırıq.
P.S. Yeri gəlmişkən onu da nəzərinizə çatdırırıq ki, Gəncə şəhərindən MM seçilən yeganə qadın deputat hal-hazırda GDU-da elm və innovasiyalar üzrə prorektor vəzifəsində çalışır. Görəsən baş verənlərə onun münasibəti necədir? Hərhalda xalqı MM-də təmsil edən xanım deputatın, GDU-da baş verənlərlə bağlı fikri medianı izləyənlər üçün də maraqlı olar.
Ardı var.

Mehriban Əzizqızı