MTN istintaq şöbəsinin rəisi özünə qəsd edəcəyini açıqladı

Eldar Mahmudovun qəbulundan sonra məndən 2 milyon istədilər

Sahibkarlara hədə-qorxu gəlməkdə, onların külli miqdarda əmlakını ələ keçirməkdə ittiham olunan ləğv edilmiş Milli Təhlükəsizlik Nazirliyi İstintaq Baş İdarəsi 2-ci istintaq şöbəsinin rəisi Vüsal Ələkbərovun cinayət işi üzrə məhkəmə prosesi keçirilib. Cinayət işi Bakı Hərbi Məhkəməsində hakim Siyavuş Hacıyevin sədrlik etdiyi prosesdə araşdırılır.

Cinayət işi üzrə şahid qismində ifadə verən iş adamı Arzu Kazımov zərərçəkmişlər Nizami Kazımovun qardaşı, Hüseyn Səfərovun bacsının həyat yoldaşıdır. O, ABU-nun rektoru Elşad Abdullayev video yayandan sonra həbs edilib, Ali Məhkəmənin qərarı ilə sərbəst buraxılıb.

Arzu Kazımov məhkəmədə Vüsal Kazımovun vəsatəti əsasında əlavə şahid qismində dindirilib. O bildirib ki, tarixini xatırlamadığı bir gün MTN-dən ona zəng gəlib: “Zəng edən müstəntiq dedi ki, məni Vüsal Ələkbərov MTN-ə çağırır. Mən MTN-ə gəlməyəcəyimi bildirdim. Bur qədər sonra həmin müstəntiq yenə də zəng vurdu və bildirdi ki, Vüsal Ələkbərovla əlaqə saxlayım. Bundan sonra Vüsal Ələkbərovla əlaqə saxladım. Həmin gün Vüsalla MTN-in binasının arxa hissəsində görüşdük. Mənimlə qardaşım və qaynım barəsində danışdı. Onların həbsdın azad edilməsi üçün hər biri tərəfindən 2 milyon manat ödənilməsini dedi. Bildirdim ki, bizim qohumlarımızın bu qədər pulu yoxdur. Vüsal bir söz demədi və getdi”.

“Eldar müəllim məni qəbul etdi”

İş adamı daha sonra ifadəsində xatırladıb: “Bu söhbətin üstündən iki ay keçdi, fikirləşdim ki, yumuşalarlar, onları sərbəst buraxarlar. Nə cinayət törədiblər ki, bu qədər pul tələb edirlər. Amma onları sərbəst buraxmadılar. Məcbur qalaraq Eldar müəllimin (ləğv edilmiş milli təhlükəsizlik naziri Eldar Mahmudov nəzərdə tutur -red.) köməkçisinə zəng etdim, nazirlə görüşmək istədiyimi bildirdim. Eldar müəllim məni qəbul etdi. Ona dedim ki, qardaşımı və qaynımı tutublar, heç bir günahları yoxdur. Eldar müəllim bildirdi ki, onların işləri araşdırılacaq, lazımı köməklik göstəriləcək”.

Arzu Kazımov qeyd edib ki, bundan sonra MTN-nin baş istintaq idarəsinin rəisi Mövlam Şıxəliyevlə görüşüb: "Xidməti otağında qardaşımın və qaynımın həbsdən azad edilməsi üçün tələb olunan məbləği istədi. Qayıtdım ki, istənilən pulu verən deyilik. Həmin vaxt Vüsal Ələkbərov da orada idi. Sonra mən getdim. Qohumlarıma dedim ki, istənilən puli verməyin, qoy iş kəsinlər, əgər pulu versəz, sizi tanımyacağam. Amma onlara işəridə hansı təzyiqi göstərdilərsə, tələb olunan məbləği verdilər. Bu gün də hər ikisi banklara pul ödəyirlər. Mənim sözümə baxmadılar, bu vəziyyətə düşdülər”.

Şahidin ifadəsinə arayış verən Vüsal Ələkbərov iddia edib ki, Nizami Kazımovdan da, Hüseyn Səfırovdan da pul tələb etməyib: “Onlardan tələb olunan pul zərərçəkmişlərə ödənilməsi ilə bağlı olub. Zərərçəkmişlərə dəymiş ziyan ödəniləndən sonra hər ikisi sərbəst buraxılıb”.

Arzu Kazımov isə Vüsal Ələkbərovun düzgün danışmadığını deyib: “Görüşümüz zaman Vüsal Ələkbərova dedim ki, ikisinin həbsdən azad olunması üçün 500-600 min düzəltməyə bəlkə gücümüz çatar. Bizim iki milyon dollara gücümüz çatmır”.

Vüsal Ələkbərov da şahidi yalan danışmaqda suçlayıb: “Şahid həbsxana həyatı yaşayıb, əziyyət görmüş adamdır. Fikirləşirdim ki, burada düzünü danışar. Həmin vaxt Mövlam müəllim ona deyib ki, zərərçəkmişlərə dəymiş ziyanı ödəyin, həm Nizami Kazımovun, həm də Hüseyn Səfərovun cəza məsələsinə baxıla bilər”.

“MTN-də şərəflə xidmət etmişik”

Bu zaman Arzu Kazımov Vüsal Ələkbərovu və MTN-nin vəzifəli şəxslərini ittiham edib: “Burada ədalətdən danışmaq olar. Hər kəsə məlumdur ki, MTN-də nə işlər görürdüz, nə edirdiz”.

Şahidin bu ifadəsi Vüsal Ələkbərovu özündən çıxarıb: “Biz MTN-də şərəflə xidmət etmişik. Bizim gücümüzə bu gün rahat yaşayırsız. Heç kimə hədə-qorxu gəlməmişik, şər-böhtan atırlar. Şər-böhtana görə burada oturmuşuq. Mənim Arzu Kazımovla ümumiyyətlə görüşüm olmayıb, onu Mövlam müəllimin xidməti otağında görmüşəm. Mövlam müəllim də deyib ki, zərərçəkmişlərə dəymiş ziyan ödənilməlidir. Bundan sonra Nizami Kazımov və Hüseyn Səfərovun həbs qətimkan tədbiri dəyişdirilə bilər”.

“Baş Prokurorluq başımızı yarırdı”

Dövlət ittihamçısının suallarını cavablandıran şahid qeyd edib ki, Eldar Mahmudovla yaxın münasibətinin olması barədə deyilənlər həqiqəti əks etdirmir: “Mənim Eldar Mahmudovla heç bir münasibətim olmayıb. Qardaşıma və qaynıma görə onunla görüşmüşəm. Bu iki şəxsin günahsız olduğunu nazirə çatdırdım. Eldar Mahmudov da dedi ki, qanun çərçivəsində tədbir görüləcək. Bundan sonra Mövlam Şıxəliyevin qəbuluna getdim. Orada iki milyon söhbəti oldu, Vüsal Ələkbərov da orada idi”.

Nizami Kazımov deyib ki, qardaşı Arzu Kazımovun pul sövdələşməsinə gəlməsini MTN-də istəməyiblər: “Vüsal Ələkbərov bildirdi ki, Tahir (Çanaqqala restoranını sahibi və Nizami Kazımovun qudasıdır –red.) gəlsin pul danışıqlarına. Mən də vəkilimlə məlumat göndərdim ki, Arzunu bu işə qatmayın, Tahir görüşlərə gəlsin”.

Vüsal Ələkbərov Nizami Kazımovu da yalan danışmaqda ittiham edib: “Bunlar yalan danışırlar. Zərərçəkmişlərə dəymiş ziyan vardı, aksiya keçirdilər. MTN rəhbərliyi və Baş Prokurorluq başımızı yarırdı ki, zərərçəkmişlərə dəymiş ziyan ödənilsin”.

“Bütün işçilər yetirməm olub”

Daha sonra MTN-in baş istintaq idarəsində, hazırda isə DTX-da müstəntiq işləyən Rövşən Hüseynov ifadə verib. Ona “Texnikabank” ASC-nin sədri Etibar Əliyev və digərlərinin istintaqının aparılması ilə bağlı suallar verilib. O, qeyd edib ki, həmin iş üzrə şahid qismində keçən və hazırkı cinayət işində zərərçəkmiş şəxs qismində tanınmış iş adamı Akif Qurbanovu tanımayıb, onunla əlaqə saxlamasını, MTN-ə çağırılmasını xatırlamır.

Vüsal Ələkbərov qeyd edib ki, rəhbərlik etdiyi istintaq idarəsinin üç müstəntiqi hazırda Bakı Ağır Cinayətlər Məhkəməsinin hakimidir. Bir çox müstəntiq tələbə yetişdirdiyini söyləyən Vüsal Ələkbərov qeyd edib ki, apardığı səs-küylü cinayət işlərinin istintaqını məhkəməyə təqdim edəcək: “Mövlam Şıxəliyev və Nadir Musatafyev polisdən, Təhsin Ağayev isə Bakı Hərbi Məhkəməsində katib vəzifəsindən MTN-ə gəliblər. Bundan başqa, bütün işçilər mənim yetirməm olublar. Bu şahidin özünü də mən yetişdirmişəm, mənim rəhbərlik etdiyim şöbənin işçisi olub”.

Vüsal Ələkbərov bildirib ki, zərərçəkmişlərin qərəzli ifadələri ilə ona ittiham qurulub. Xidməti fəaliyyətindən danışan Vüsal Ələkbərov qeyd edib ki, xidmətdə olduğu müddətdə ona qarşı heç kim şikayətçi olmayıb: “Gördüyüm işlərə görə daim mükafatlandırılmışam. Məhkəmələrdən apardığım işlərlə bağlı rəhbərliyə təşəkkür məktubları, qərarlar gəlib. Buna görə də həmişə rəhbərlik tərəfindən təltif olunmuşam”.

“Pulları Zal Yusifova verdiyini etiraf etdi”

“Texnikabank”ın “Bakı” filialının rəhbəri olmuş Zal Yusifovun barəsində açılmış 613-saylı cinayət işinin istintaqınfan danışan Vüsal Ələkbərov bildirib ki, Zal Yusifovla yanaşı Nizami Kazımov və Hüseyn Səfərovun barəsində də Cinayət Məcəlləsinin 178.3.2-ci (külli miqdarda dələduzluq törətmək) maddəsi ilə cinayət işi başlanıb: “Nizami Kazımov və Hüseyn Səfərov bir qrup vətəndaşdan topladığı pulları Zal Yusifova verib. Zal Yusifov da həmin vəsaitləri bankın balansına köçürmək əvəzinə, öz şəxsi maraqlarına sərf edib. Nizami Kazımov və Hüseyn Səfərov bu vəsaitlərin müqabilində Zal Yusifovdan 6 faiz gəlir götürüblər. Onlar həmin gəlirin 2 faizini əmanətçiyə, qalan 4 faizini isə özlərinə götürüblər”.

Vüsal Ələkbərov qeyd edib ki, həmin dövrdə Nizami Kazımov kürəkəni Samir Nadirliyə məxsus olan 704 min avronu da Zal Yusifova verib: "Nizami Kazımov bu vəsaitlə bağlı Zal Yusifovdan 6 faiz gəlir götürüb. Həmin gəlirin 2 faizini kürəkəninə verib, qalan 4 faizini isə özünə götürüb. Sonradan əlavə gəlir verilmədiyi üçün Samir Nadirli və digər pulu depozitdə olan şəxslər şikayət etməyə başladı. Zal Yusifovun cinayət işi ilə bağlı Nizami Kazımov da məsuliyyətə cılb edildi, barəsində ittiham elan edildi. Məhkımənin qərarı ilə Nizami Kazımovun barəsində həbs qətimkan tədbiri seçildi. İstintaq dövründə Nizami Kazımov mənim tərəfindən dindirilməyib. Onu istintaq şöbəsinin müstəntiqləri dindirib. O, həmin zaman ifadəsində vətəndaşlardan öul topladığını, həmin pulları Zal Yusifova verdiyini etiraf edib. Nizami Kazımovla istintaqdan kənar söhbətim olmayıb”.

“Onlar məndən qisas alırlar”

Vüsal Ələkbərov daha sonra ifadəsində Nizami Kazımovun qardaşı Arzu Kazımovun sabiq milli təhlükəsizlik naziri Eldar Mahmudovun qəbuluna gəlməsindən danışıb: “Mövlam Şıxəliyev mənə zəng vurdu və bildirdi ki, nazirin qəbul otağında bir nəfər var, onu mənim yanıma gətir. Mən də onun gətirməyə getdim. Mövlam Şıxəliyevin otağına gedən zaman bildim ki, bu şəxs Nizami Kazımovun qardaşı Arzudur. O, Nizami Kazımov və Hüseyn Səfərovun həbsdən azad edilməsini istəyib. Mövlam Şıxəliyev də zərərçəkmişlərə dəymiş ziyan ödənildiyi halda qətimkan tədbirinin dəyişdirilməsinə baxılmasının mümkün olduğunu dedi. Bundan sonra Arzu Kazımov getdi. Bir neçə gündən sonra Arzu Kazımov 500 min manat ödəmək imkanlarının olduğunu, qalan ziyanı ödəyə bilməyəcəyini söylədi. Mövlam Şıxəliyev də bildirdi ki, zərərçəkmişlərə dəymiş ziyan ödənilmədiyi halda qətimkan tədbirinin dəyişdirilməsindən söhbət gedə bilməz. Samir Nadirli və digərləri dəymiş ziyanı ödəyəndən sonra Nizami Kazımovun barəsində başqa yerə getməmək barədə qətimkan tədbiri seçildi. Mən hədə-qorxu yolu ilə Nizami Kazımovdan, başqalarından pul tələb etməmişəm. MTN-nin düşdüyü vəziyyətdən istifadə edirlər, mənə böhtan atırlar, bu yolla qazanc əldə etməyə çalışırlar. Onlar məndən qisas alırlar”.

“Mənə sui-qəsd edəcəklər”

Vüsal Ələkbərovun sözlərinə görə, zərərçəkmiş Hüseyn Səfərov da ona böhtan atır: “Zal Yusifovla Namil Rzayev, Elşən Mədətov və digərlərini Hüseyn Səfərov əlaqələndirmişdi. Bütün bunlar 615 saylı cinayət işində öz təsdiqini tapıb. Həmin cinayət işinə baxış keçirilməsə, özümə qəsd edəcəm. Bunun da günahı məhkəmənin üzərində olacaq”. Hakim Vüsal Ələkbərovun bu ifadəsini məhkəməyə şantaj etmək kimi qiymətləndirib. Vüsal Ələkbərov məhkəmənin belə ifadələrlə şantaj etmədiyini deyib.

MTN polkovniki bildirib ki, 615 saylı cinayət işinin tədqiq olmasını istəyir: “Bunun araşdırılmasını istəməyənlər var. Əks halda onlar mənə sui-qəsd edəcəklər”.

“Silahın təzəsini ala bilərəm”

Daha sonra ifadəsini davam etdirən Vüsal Ələkbərov qeyd edib ki, Hüseyn Səfərovun həmin dövrdə dələduzluq əməli tam sübuta yetirilib: “Amma onun xəstəliyi ilə bağlı qətimkan tədbiri dəyişdirilib. Həmin işdə 100-dən çox şikayətçi var idi. Həmin şikayətçilər aksiyalar keçirdilər. Həm prezident aparatından, həm də Baş Prokurorluqdan aksiya keçirən şikayətçilərə dəymiş ziyanın ödənilməsini tələb edirdilər. Buna görə də həm Hüseyn Səfərovun, həm də Nizami Kazımovun barəsində seçilmiş həbs qətimkan tədbirinin dəyişdirildi ki, zərərçəkmişlərə dəymiş ziyan ödənilməsi məqsədi olub”.

Vüsal Ələkbərov ifadəsində Hüseyn Səfərovun ona bağışladığı silahı geri tələb etməsi ilə bağlı ittihama münasibət bildirib: “Hüseyn Səfərovun bağışladığı ov tüfəngi istifadəyə yararsız olub. Buna görə də həmin silahı atmışam. Bu silahla bağlı mənə ittiham vermək lazım deyil. Ona həmin silahın təzəsini ala bilərəm”.

Vüsal Ələkbərov qeyd edib ki, 2009-cu ildə ev növbəsinə dayanıb: “Amma mənə ev verən olmadı. Məcbur qalaraq ipoteka götürərək özümə iki otaqlı ev aldım. 2009-cu ildən 2015-ci ilədək müddətə hər ay maaşımdan 400 manat kredit ödəmişəm”.

15 il cəza alsın, poqonları sökülsün

Vüsal Ələkbərov bildirib ki, Hüseyn Səfərovun həyat yoldaşı 14 nəfər zərərçəkmişə dəymiş ziyanın ödənilməsini təmin edib: “Bundan sonra həmin zərərçəkmişlər istintaqa müraciət edərək ziyanın ödənildiyini bildiriblər. Həmin zərərçəkmişi istintaq qrupunun müstəntiqləri dindirib. Həmin 14 nəfərdən yalnız 6 nəfər, Hüseyn Səfərovun yaxın qophumları olan şəxslər dindirilib. Bizim xeyrimizə olan şəxslər dindirilməyib. Istintaq orqanı həmin zərərçəkmişlərin ifadəsini alan müstəntiqlərində ifadələrini almaqda maraqlı olmayıb”.

İttiham nitqi ilə çıxış edən prokuror Vüsal Ələkbərovun 15 il müddətinə azadlıqdan məhrum edilməsini istəyib. Prokuror həmçinin Vüsal Ələkbərovun hərbi rütbədən məhrum edilməsi barədə qərar qəbul edilməsini istəyib.

Vüsal Ələkbərovun vəkilləri çıxış edib. Vəkilləri qeyd edib ki, verilən ittihamlarda Vüsal Ələkbərovun heç bir günahı yoxdur: “Vüsal Ələkbərova mütəşəkkil dəstə tərkibində ittiham verilib. Amma ittihamda dəstə üzvlərinin adları göstırilməyib. Bütün bunlar ittihamın qurama olduğunu göstərir”.

Vəkillər çıxışlarının sonunda Vüsal Ələkbərovun barəsində bəraət hökmünün çıxarılmasını istəyib. Daha sonra hakim Vüsal Ələkbərova son sözlə çəxış etmək üçün söz verib. Amma o, çıxışa hazır olmadığını çıxışa hazırlaşmaq üçün vaxt istəyib.

Növbəti proses iyunun 16-da davam edəcək.

İstintaq sənədlərinə görə, Vüsal Ələkbərova məxsus olan və həyat yoldaşı Şəhla Ələkbərovanın adına rəsmiləşdirilmiş Səbail rayonu, Badamdar qəsəbəsi, 3-cü yaşayış massivində 0,18 hektar torpaq sahəsi və üzərində yerləşən fərdi yaşayış evi, Yasamal rayonu, Şərifzadə küçəsi, ev 164, mənzil 42 ünvanında yerləşən mənzilinə üzərinə həbs qoyulub.

Üzərinə həbs qoyulan əmlakların ümumi dəyəri 1.277.000 manat dəyərində hesablanıb.

Vüsal Ələkbərov Cinayət Məcəlləsinin 182.3.1, 182.3.2-ci (mütəşəkkil dəstə tərəfindən, külli miqdarda əmlak əldə etmək məqsədi ilə hədə-qorxu gəlmə), 294.3-cü (sübutları saxtalaşdırma, ağır və ya xüsusilə ağır cinayətlər haqqında cinayət işi üzrə sübutları saxtalaşdırma, habelə digər işlər üzrə sübutların saxtalaşdırılması ağır nəticələrə səbəb olma), 311.3.1, 311.3.2, 311.3.3, 311.3.4-cü (qabaqcadan əlbir olan bir qrup şəxs və ya mütəşəkkil dəstə tərəfindən, təkrar, külli miqdarda, hədə-qorxu tətbiq olunmaqla rüşvət alma), 341.2.1 və 341.2.3-cü (bir qrup şəxs tərəfindən, ağır nəticələrə səbəb olmaqla hakimiyyətdən sui-istifadə etmə, hakimiyyət həddini aşma və ya hakimiyyətdən istifadə etməmə) maddələri ilə ittiham edilib.

İttihama görə, təqsirləndirilən şəxs iş adamlarını MTN-ə gətirib, hədə-qorxu yolu ilə onların külli miqdarda pulunu ələ keçirib.

Haci Zeynalov