“Oğlum 11 aydan çoxdur ki, həbs olunub və hal-hazırda Kürdəxanı Təcridxanasında saxlanır”

Yerlərdə sosial problemlərin varlığı ilə bərabər, ayrı-ayrı şəxslərin hüquqlarının pozulması, onlara qarşı atılan bir çox qanunsuzluqların varlığı və s. bu gün hər kəsi daha çox narahat edən məsələlərdəndir. Düzdür, belə bir problemlərin əmələ gəlməsini zəruri edən obyektiv amillərlə bərabər, subyektiv amillərin varlığı da başlıca səbəblərdəndir. Çox zaman isə, hansısa şəxsin ona verilmiş hüquq və səlahiyyətlərin nədən ibarət olması haqda elementar təsəvvürə malik olmaması, vətəndaş hüquqlarının pozulması ilə nəticələnir, bəzən hansısa acı sonluqla da nəticələnir. Belə ki, bu günlərdə “Gündəm Xəbər”in redaksiyasına üz tutan və tək oğul övladı olan Tamerlan Rəsulovun, ötən ilin oktyabr ayında Abşeron RPŞ əməkdaşları tərəfindən qanunsuz həbs olunduğunu iddia edən Kifayət xanım Qədirli bildirir ki, “mən Bakı şəhəri, Xətai rayonu Elçin Əliyev küç. ev-4 ünvanda qeydiyyatda olsam da, faktiki olaraq Bakı şəhəri, Abşeron rayonu Aşağı Güzdək qəsəbəsi S.Ə.Şirvani küçəsi, ev-3 ünvanda yaşayıram. Tək övladım olan 1993-cü il təvəllüdlü Rəsulov Tamerlan Kamil oğlu, 06 oktyabr 2016-cı il tarixdə şəxsi avtomobili ilə işə gedərkən, yol kənarında dayanan iki nəfər şəxs ona yaxınlaşaraq bildirirlər ki, “Abşeron rayonunun “Sevil” masivində iki baş qoyun var, onu Xırdalana apara bilərsənmi?” Oğlum həmin şəxslərlə danışıb razılaşır və onların dedikləri qoyunları Xırdalana aparır. Həmin şəxslər göstərilən xidmətin müqabilində ona 10 manat pul da verirlər.



Tamerlan Rəsulov Xırdalan şəhərindəki marketlərdən birində işlədiyindən, o, hər dəfə işə gedib-gələrkən yolboyu müştəri düşdükcə onları da götürürmüş.
Elə ki, oğlum qoyunları Xırdalanda düşürür və həmin şəxslərdən aralanır, o halda polis əməkdaşları Tamerlana yaxınlaşaraq bildirirlər ki, “sənin gətirdiyin qoyunlar oğurluq heyvanlardır”. Az sonra o da məlum olur ki, Ələkbər Rəsulov, Rusif Mehrəliyev, Eldəniz Cəfərov və Anar Piriyev “Sevil” massivində çobanlıq fəaliyyəti ilə məşğul olan şəxsdən nağd pulla qoyun almaq istəsələr də, çoban onlara qoyun vermir. Belə bir səbəb üzündən də, tərəflər arasında mübahisə düşür. Son anda həmin şəxslər iki baş qoyunu məcburi şəkildə aparırlar. Dərhal qoyun sürüsünə çobanlıq edən şəxs DİN-nin 102 xidmətinə zəng edir və oğluma məxsus avtomobilin nömrəsini qaynar xəttin əməkdaşına bildirir. Oğlum 11 aydan çoxdur ki, həbs olunub və hal-hazırda Kürdəxanı Təcridxanasında saxlanır. Baş verən hadisə ilə bağlı istintaq araşdırmaları Abşeron RPŞ tərəfindən aparılır və ötən müddət ərzində üç dəfə müstəntiq dəyişdirilib. Hal-hazırda iş materialları adı çəkilən qurumun müstəntiqi Yaşar İsgəndərovun icraatındadır və beş nəfərlə bağlı CPM-nin 181.1 maddəsi ilə cinayət işi başlanılıb.
Bu gün zərərçəkmiş şəxs şikayətçi olmadığını bildirir və bu haqda imzasını notarial qaydada təsdiq etdirsə də, hələ ki, oğlumun işində heç bir yenilik yoxdur. Artıq iki aydır ki, Anar Piriyev və Rusif Mehrəliyev adlı şəxslər ev dustaqlığına buraxılıblar və hər iki şəxs, yalnız oğurluq maddəsi ilə ittiham olunurlar. Onu da vurğulayım ki, Anar Piriyev üç dəfə məhkumluq həyatı yaşasa da, o da, iki aydır ki, azadlıqda gəzir. Mənim oğlum isə quldurluq maddəsi ilə ittiham olunur və yaxın günlərdə onunla bağlı toplanmış iş materialları Ağır Cinayətlərə Dair İşlər Üzrə Məhkəməyə göndəriləcək.
Mən baş verənlərlə bağlı, xüsusilə də oğlumun ağır maddə ilə ittiham olunmasını heç cür qəbul edə bilmirəm. Bəyəm, oğlum hansı qatı cinayət işlərində iştirak edib ki, o, quldurluqda ittiham olunur?. Aparılan istintaq işlərinin bitərəfli qaydada aparılması, açıq-aydın şəkildə oğluma qarşı edilən qərəzçilikdən xəbər verir. Ona görə də istərdim ki, adı çəkilən qurumun rəhbərliyi oğlumun işi ilə bağlı istintaq araşdırmalarını aparan müstəntiqi dəyişdirilməsini təmin etsin ki, az-çox şəffaflığı təmin etmək mümkün olsun.
Mən həyat yoldaşımı vaxtsız itirmişəm qadınam və Tamerlan Rəsulov tək övladımdır. Onun 12 aprel 2017-ci il tarixdə ilk övladı dünyaya gəlib. Artıq müəyyən yaş həddinə çatmış bir anayam və övladımın bu cür həbsi, məni olduqca sızıldadır. Odur ki, bir ağsaçlı ana olaraq daxili işlər naziri cənab Ramil Usubovdan dönə-dönə xahiş edirəm ki, övladımın həbsdən azad olunması üçün lazımi köməkliyinizi bizsən əsirgəməyin, məni gözüyaşlı qoymayın. Əgər oğlum qeyd olunan cinayət işlərində iştirak edibsə, o halda mən də onun həbsinə razı olaram”.
Dərc olunan açıqlamada qeyd olunanlar Kifayət xanım Qədirliyə məxsus olduğundan, yaşananlarla bağlı nəsə deyə bilmərik. Sadəcə olaraq istərdik ki, yaşadığımız cəmiyyətdə bir kimsənin haqqına toxunulmasın, hüquqları tapdaqlar altına atılmasın, hər kəsin şərəf və ləyaqəti qanunvericilikdə nəzərdə tutulmuş qaydada qorunsun. O halda haqqa da qovuşa bilərik, ədalət də qələbə çalar. Qarşı tərəfi də dinləyə bilərik.

Rahib
"Gündəm Xəbər"