“Biz bu obyektdə “kliyent”lərlə “görüşürük” və hər 15-20 dəqiqəlik “görüşümüz” zamanı əldə etdiyimiz 20-25 manatın faizini obyekt sahibinə çatdırırıq”

Son vaxtlar “Gündəm Xəbər”in redaksiyasına sakinlər tərəfindən çoxsaylı müraciətlər daxil olur ki, həmin müraciətlərdə onlar daha çox üz-üzə qaldıqları sosial problemlərin varlığından bəhs edib, ictimailəşdirilməsini də xahiş edirlər. Biz də bir media qurumu olaraq sakinlərin ümidlərini, inamlarını doğrultmaq üçün, imkan daxilində əməli addımlarımızı atırıq ki, bizə bəslənən ümidlər heçə enməsin. Düzdür, ünvanlanan müraciətlərdə bir çox sahələrdə yaşanan olaylardan, hətta ailə-məişət məsələlərində əmələ gələn qarşıdurmalardan, fikir ayrılıqlarından və s-dən də bəhs olunur. Məsələn, bir müddət bundan əvvəl “Gündəm Xəbər”in redaksiyasına Naxçıvan Muxtar Respublikası, Şərur rayonu Çərçiboğan kəndində qeydiyyatda olan, hal-hazırda Abşeron rayonu, Saray qəsəbəsi İ.Hüseynov küçəsi ev-53 ünvanda yaşayan Ramazanova Xalidə Məmməd qızı tərəfindən şikayət ərizəsi daxil olmuşdu. Adı çəkilən xanımın ünvanladığı şikayət ərizəsini ilk əvvəl oxuduqca, sanki dəhşətə gəldik. Çünki, Xalidə Ramazanova yazmış olduğu ərizəsində hansısa kənar şəxsləri deyil, birbaşa həyat yoldaşı Habil adlı şəxsin qardaşları olan Mübariz və Qabil Ramazanovları ittiham edərək bildirir ki, “uzun müddətdən bəri üz-üzə qaldığım problemlərlə bağlı dövlət qurumlarına yazdığım şikayətlərimin heç bir nəticəsi olmadığından, son anda həmin problemlərin ictimailəşdirilməsinə qərar verdim. Onu da bildirim ki, mən iki övlad anasıyam və bizim ailə vaxtilə nümunəvi ailələrdən biri hesab olunurdu. Əsl xoşbəxtliyim onda oldu ki, qızımı lazımınca tərbiyə etdim və onun ailə qurmasına da səbəb oldum. İndi bir ana olaraq övladımın xoşbəxtliyini gördükcə sevinirəm, onun adı ilə qürur duyuram.
Digər övladım Vəli Ramazanovun taleyi isə, uzun müddətdir ki, məni sızıldadır. Buna da səbəb, onun azyaşlı vaxtlarından olmazın xəstəliyə düçar olmasıdır. Yəni, onun ödündə şiş (palip) xəstəliyi əmələ gəlib. Buna görə də, oğlumun müalicəsi ilə bağlı bir çox qurumlara müraciətlərimi ünvanlasam da, təəssüf hissi ilə qeyd edim ki, bir kimsə bizə diqqət ayırmadı və dövlət tərəfindən hər hansı müavinətlə də təmin olunmadıq. Bütün bunlar mənim üçün hansısa formada keçici olsa da, ən ağrılı anım isə, vaxtilə hər kəsə nümunə ola biləcək ailəmin dağılması oldu. Belə ki, doğma qayınlarım Mübariz və Qabil Ramazanov qardaşları, hələ bir neçə il bundan əvvəldən başlayaraq mənə qarşı aqressiv mövqedə dayandılar və birbaşa ailəmin dağılmasına da səbəb oldular. Onlar həyat yoldaşım Habili və oğlum Vəli Ramazanovu hiylə işlədərək evimdən aparıb, Bakı-Sumqayıt yolunun üstündə fəaliyyət göstərən “Pəhləvanların obyekti” adı ilə tanınan obyektdə işlətməyə başladılar. Onu da bildirim ki, həmin obyekt Ramazanov qardaşlarına məxsusdur. Hal-hazırda “Pəhləvanların obyekti” adı ilə tanınan obyekt ən böyük əxlaqsızlıq ünvanlarından biri hesab olunur. Çox təəssüflər olsun ki, hüquq-mühafizə orqanı əməkdaşları bu qardaşlara qol qoyduqları çirkin, iyrənc əməllərinə görə, hansısa səbəblər üzündən “qaşın üstə qara var” demirlər. Bu cür yanaşmanın varlığı nəinki məni, hətta tam əksəriyyəti də düşündürməkdədir.

Bundan əlavə onu da bildirim ki, adı çəkilən şəxslər rəhbərlik etdikləri obyektdə oğlumu narkotiklə məşğul omağa vadar edirlər və mənə hədə-qorxu gələrək öldürəcəklərini də bildirirlər. Dəfələrlə elə hallar olub ki, Mübariz və Qabil Ramazanov qardaşları məni şantaj edərək, barəmdə polisə müraciət də etmişlər. Bir neçə dəfə üstümə maşın sürüb öldürməyə cəhd etsələr də, müəyyən səbəblər üzündən cəhdləri baş tutmayıb. Ən dəhşətli hal isə odur ki, işlətdikləri obyekt faşihəxanadır və həmin ünvanda narkomaniya ilə məşğul olurlar. Belə bir eyiblərinə “kor olmaq” əvəzinə, mənim üzümə tüpürürlər. Hətta, bir dəfə yaşadığım mənzilə gəldilər və üstümə silahdan atəş açıb öldürməyə cəhd də etdilər. Baş verənləri yaxınlıqda yaşayan qonşularım da gördülər. Bax budur, Ramazanov qardaşlarının mənə qarşı münasibətləri, mənə qoyduqları hörmət!”
Biz çoxsaylı müraciət müəlliflərindən biri olan Xalidə Ramazanovanın ünvanladığı ərizədə qeyd etdiklərini diqqətlə oxuyub belə bir qənaətə gəldik ki, adı çəkilən obyekt hüquq-mühafizə orqanı ənməkdaşları tərəfindən nəzarətə götürülməli və həmin ünvanda lazımi araşdırmalar da aparılmalıdır. Çünki, şikayətçi xanımın söylədiklərinə əsaslansaq, “Pəhləvanların obyekti” adı ilə tanınan ünvanda nəinki milli-mənəvi dəyərlərimiz tapdaqlar altına atılır, hətta müəyyən yaş həddində olan gənclər narkomaniyaya da sürüklənir.
Bundan əlavə onu da vurğulayaq ki, Xalidə Ramazanovanın redaksiyamıza ünvanladığı şikayət ərizəsini əsas tutaraq, bir neçə gün bundan əvvəl adının çəkilməsini istəmədiyimiz əməkdaşlarımızı qeyd olunan ünvana ezam etdik. Məqsədimiz şikayətçi xanımın sadaladıqlarının həqiqət olub-olmamasını dəqiqləşdirmək idi. Elə ki, əməkdaşlarımız adı çəkilən obyektin həyətində olurlar, o halda qarşılaşdıqları ilk mənzərə sanki onları “valeh edir”. Buna da səbəb, həmin günün axşamçağlarında “Pəhləvanların obyekti” adı ilə tanınan ünvanda təqribən 25-30 nəfər əxlaqsızlıqla məşğul olan 17-28 yaş həddində qadının olması olub. Əməkdaşlarımızın obyektin həyətində əyləşərək pivə içmələrii və baş verənləri kənardan seyr etmələri, onların yaşananlarla bağlı daha məlumatlı olmalarına da səbəb olur. Belə ki, onlar adını dəqiqləşdirə bilmədikləri “xanım”dan iş fəaliyyətlərinin nələrdən ibarət olduğunu soruşduqda, “biz bu obyektdə “kliyent”lərlə “görüşürük” və hər 15-20 dəqiqəlik “görüşümüz” zamanı əldə etdiyimiz 20-25 manatın faizini obyekt sahibinə çatdırırıq. Həmin “xanım” əməkdaşlarımıza onu da təklif edir ki, “istəsəniz görüşə bilərik”, sizə endirim də olacaq. Yəni, “görüşümüz” 20 manat “haqq-hesab”a başa gələcək ki, həmin pulun 6 manatı yer pulu, qalanı mənə çatacaq” dedikdə, əməkdaşlarımız o zaman sadalananların həqiqət olduğunu tam təsdiqləyirlər.

P.S. Növbəti saylarımızda Xalidə Ramazanovanın qeyd etdiyi digər faktlardan da bəhs etməyə çalışacağıq. Odur ki, bizi izləməyi unutmayın. Açıqlamada adı çəkilən hər kəsi dinləyə bilərik.

Aslan
gundemxeber.az