Diqqəti cəlb edən hal odur ki, cənab Şamxal Həşimov 08 iyun 2016-cı il tarixdə imzaladığı cavab məktubunda onu da vurğulayıb ki, “obyektin inşa olunduğu torpaq sahəsi dövlət mülkiyyətinə aid olan torpaq sahəsidir”

“Gündəm Xəbər” qəzeti müstəqil ictimai-siyasi qəzet olaraq, işıq üzü gördüyü illər ərzində daim ictimai həyatımızda əmələ gələn sosial-iqtisadi problemlərin varlığını ictimailəşdirmiş və lazım gəldikdə onların həlli istiqamətində, aidiyyəti qurumlar qarşısında məsələ də qaldırıb. Belə bir səbəblər üzündəndir ki, mütəmadi olaraq sosial problemlərlə üz-üzə qalan sakinlər tərəfindən redaksiyamızın ünvanına çoxsaylı şikayət məktubları ünvanlanır və onların ictimailəşməsini də xahiş edirlər. Ünvanlanan məktublarda sakinlər daha çox məmur özbaşnalığından, süründürməçilik amillərinin tüğyan etməsindən, çoxsaylı sosial problemlərin varlığından və s. bəhs edirlər.



Bir neçə gün bundan öncə Tovuz rayonu Qovlar qəsəbəsi A.Kazımov küç. ev-15 ünvanında yaşayan İsmayılov Yusif İsmayıl oğlu “Gündəm Xəbər”in redaksiyasına ünvanladığı şikayət məktubunda yazır ki, “21 fevral 2007-ci il tarixdə Qovlar qəsəbə bələdiyyəsinə, bələdiyyənin ehtiyat fondundan torpaq sahəsi ayrılması və həmin sahədə fərdi sahibkarlıq fəaliyyəti ilə məşğul olmaq məqsədilə müraciət etdim. Qeyd olunan tarixdə ünvanladığım müraciəti nəzərə alan bələdiyyə rəhbərliyi çox keçmədi ki, bələdiyyənin ehtiyat fondundan, hansı ki, kənd təsərrüfatına faktiki yararsız olan torpaq sahəsindən, yəni qəsəbənin Şəhriyar küçəsinin kənarından (Qovlar-Saratovka yolu) 114.0 kv.m-lik torpaq sahəsi ayırdı. Qovlar qəsəbə bələdiyyəsinin 02 noyabr 2007-ci il tarixdə vermiş olduğu 35/03 saylı qərarına əsasən, bələdiyyənin ehtiyat fondundan ayrılmış torpaq sahəsinə görə “Kapital Bank”ın Tovuz filialına müəyyən edilmiş məbləğdə dövlət rüsumunu da ödədim. Eyni zamanda, ayrılmış torpaq sahəsində obyekt tikdirmək və onun tikintisinə icazə verilməsi üçün, Tovuz rayon İcra Hakimiyyətinə yazılı ərizə ilə də müraciət etdim. Hətta, inşa etdirəcəyim obyektin tikintisi ilə bağlı, layihə planı hazırlatdığımı da bildirdim. Etdiyim müraciətləri nəzərə alan rayon rəhbərliyi, inşa etdirəcəyim obyektin tikintisi ilə bağlı 06 fevral 2011-ci il tarixdə sərəncam da imzaladı.



Elə ki, qəsəbənin Şəhriyar küçəsində inşaasını başa çatdırdığım birmərtəbəli obyektimi daşınmaz əmlakın dövlət reyestrində qeydiyyata aldırmaq istədim ki, gələcəkdə sahibi olduğum obyektimə aid çıxarış da əldə edə bilim. Həmin vaxt adı çəkilən qurumun səlahiyyətliləri ortaya bir çox “əmmalar” qoydular. Yəni, Əmlak Məsələləri Dövlət Komitəsinin Yanında Daşınmaz Əmlakın Dövlət Reyestri Xidmətinin 15 saylı ərazi idarəsinin rəisi cənab Şamxal Həşimov, 08 iyun 2016-cı il tarixdə imzaladığı cavab məktubunda göstərir ki, “tikintisi başa

çatdırılmış obyektin istismara qəbul edilməsi barədə dövlət qəbul komissiyasının aktında, FHN Dövlət Yanğın Nəzarəti Xidmətinin Normativ Əsaslar şöbəsi rəisinin imzalayıb ünvan üzrə göndərdiyi cavab məktubunda, nə rəisin imzası, nə də ki, möhürü yoxdur”. Şamxal Həşimovun verdiyi belə bir cavab olduqca maraqlı və qeyri ciddiliyə kifayət qədər əsas verən bir cavabdır. Çünki, inşa etdirdiyim obyektin yanğın təhlükəsizliyi tələblərinə cavab verməsi barədə, FHN Dövlət Yanğın Nəzarəti Xidmətinin Normativ Əsaslar şöbəsinin rəisi cənab Mehdi Əsgərov, 14 aprel 2016-cı il tarixli məktubuna həm imzasını atmış, həm də tikintisi başa çatdırılmış obyektin yanğın təhlükəsizliyi tələblərinə cavab verilməsi barədə tərtib olunmuş aktda da göstərilmişdir ki, “Yusif İsmayılova məxsus obyektə dair təqdim olunmuş sənədlər araşdırılmış və yerində yanğın-texniki müayinə də keçirilərək müəyyən olunmuşdur ki, obyektdə elektrik qurğularının quraşdırılması qaydalarına tam əməl olunub”.

Diqqəti cəlb edən hal odur ki, cənab Həşimov 08 iyun 2016-cı il tarixdə imzaladığı cavab məktubunda onu da vurğulayıb ki, obyektin inşa olunduğu torpaq sahəsi dövlət mülkiyyətinə aid olan torpaq sahəsidir. Amma, Qovlar qəsəbə bələdiyyəsinin 02 noyabr 2007-ci il tarixdə vermiş olduğu 35/03 saylı qərarına əsasən, qəsəbənin Şəhriyar küçəsində Yusif İsmayılova ayrılmış 114.0 kv.m-lik torpaq sahəsi, bələdiyyənin ehtiyat fonduna aid torpaq sahəsidir. Başqa bir ziddiyyətli an da ondan ibarətdir ki, DƏDRX-i 15 saylı ərazi idarəsinin rəisi obyektin yüksək gərginlikli elektrik xəttinin mühafizə zolağında yerləşdiyini də bildirir. Amma, “Qərb” Regional Enerji Təchizatı və Satışı İdarəsi, Tovuz Elektrik Şəbəkəsinin rəisi cənab Mirzəyev, imzalayıb ünvan üzrə göndərdiyi cavab məktubunda yazır ki, “Qovlar şəhəri Şəhriyar küçəsində Yusif İsmayılova məxsus təkər təmiri sexinin sağ tərəfində, yəni 2 m-yində olan 10kv-luq yüksək gərginlikli elektrik xətləri tam kabelləşdirilmişdir”.

Ayrı-ayrı dövlət qurumları tərəfindən Qovlar şəhəri Şəhriyar küçəsində Yusif İsmayılovun inşa etdirdiyi obyektlə bağlı vermiş olduqları rəyi nəzərə almayan DƏDRX-i 15 saylı ərazi idarəsinin rəisi Şamxal Həşimov, hələ ki, Yusif İsmayılovun inşa etdirdiyi qeyri-yaşayış binası üzərində mülkiyyət hüququnun dövlət reyestrində qeydiyyata alınmasına və obyektə dair çıxarış verilməsinə razı olmur. Amma, o halı da nəzərə almaq lazımdır ki, DƏDRX-i 15 saylı ərazi idarəsinin rəisi 08 iyun 2016-cı il tarixdə imzalayıb ünvan üzrə göndərdiyi imtina məktubuna imzasını atsa da, o da həmin məktuba möhürünü vurmayıb. Belə bir halların varlığı onu söyləməyə əsas verir ki, Tovuz rayonunda bir qurumun təsdiq edib ünvan üzrə göndərdiyi rəyi başqa bir qurumun səlahiyyətlisi inkar edir. Bu da çoxsaylı sosial problemlərin əmələ gəlməsinə, daha çox isə, vətəndaş narazılığının baş qaldırmasına səbəb olur. O halda sual oluna bilər ki, bəzi vəzifə sahiblərinin, o cümlədən DƏDRX-i 15 saylı ərazi idarəsinin rəisi cənab Şamxal Həşimovun, fərdi sahibkarlıq fəaliyyəti ilə məşğul olan Yusif İsmayılovu çıxılmaz duruma salmaqda istəyi nədir? Axı, ölkə rəhbəri cənab İlham Əliyev etdiyi çıxışlarında daim vurğulayır ki, “yerlərdə vəzifə sahibləri sahibkarlıq fəaliyyəti ilə məşğul olanlara şərait yaratmalı, süni maneələri aradan qaldırmağa da çalışmalıdırlar” deyə müvafiq tapşırıqlarını verir. Əgər ölkə rəhbəri tərəfindən hər bir vəzifə sahibinə

belə bir tapşırıq verilirsə, o halda Yusif İsmayılovun düşdüyü duruma nə ad vermək olar?

P.S. Hörmətli oxucular! Bu yöndə araşdırmamız bundan sonra da davam edəcək və əgər problem ədalətli həllini tapmazsa, o halda Yusif Hüseynovun üz-üzə qaldığı problemin varlığı ilə bağlı, növbəti saylarımızda yeni-yeni açıqlamalarla da çıxış etməyə məcbur olacağıq. Qarşı tərəfin də mövqeyini dinləyə bilərik.

Mirzə
gundemxeber.az