Ölkə rəhbərinin bu cür açıqlaması onu söyləməyə əsas verir ki, digər vəzifə sahibləri jurnalistlərin yazdıqları açıqlamalara diqqətlə yanaşmalı və üzərinə düşən vəzifə borclarını da yerinə yetirməlidirlər

“Gündəm Xəbər” qəzetin 24-30 iyul 2017-ci il tarixli sayının 3-cü səhifəsində “İmişli sakini “makler”lik edən şəxsin dələduzluq əməlinin “qurbanı olub” başlıqlı tənqidi açıqlama dərc etmişdik. Açıqlamanın dərcinə səbəb, İmişli rayonunun Rəsullu kəndində qeydiyyatda olan Nuriyev Bəybala Bəyalət oğlu adlı şəxsin redaksiyamıza ərizə ilə müraciət etməsi və 2016-cı ildən üz-üzə qaldığı problemin ictimailəşdirilməsini xahiş etməsi olmuşdur. Bəybala Nuruyev yazmış olduğu ərizəsində qeyd edir ki, “mən 2016-cı ilin avqust ayında əslən Cəlilabad rayonundan olan, hazırda Bakı şəhəri, Sabunçu rayonu Bakıxanov qəsəbəsi Y.Əliyev küçəsində qeydiyyatda olan Osmanov Rəşad Məcid oğlunun dələduzluq əməli ilə üz-üzə qalmışam. İlk öncə onu vurğulayım ki, adı çəkilən şəxs torpaq və ev alqı-satqısı ilə məşğul olduğundan, mən qeyd olunan tarixdə 2 sot torpaq sahəsi almaq məqsədilə ona müraciət etdim. Həmin vaxt Rəşad Osmanov mənə Sabunçu rayonunun Ramana qəsəbəsində sənədi onda olan 6,3 ha-lıq torpaq sahəsini göstərdi və həmin sahədən 2 sot torpaq sahəsini satmağa razı olduğunu da bildirdi. Bu məqsədlə biz, Cəlilabad rayon sakini Səxavət Salmanov tərəfindən Rəşad Osmanova 45 il 10 ay 6 gün müddətinə verilmiş etibarnamədə qeyd olunan 200kvm-lik torpaq sahəsinin alqı-satqısını həyata keçirmək üçün, 24 oktyabr 2016-cı il tarixdə Bakı şəhəri 31 saylı notariat kontorunda olduq və lazımi sənədi də təsdiq etdirdik. Həmin gün ona aldığım 200 kvm-lik torpaq sahəsinə görə 3000 (üç min) manat pul verdim. Bir qədər vaxt keçdikdən sonra torpaq sahəsində ev tikmək qərarına gəldim və tikinti işlərini aparmaq üçün, həmin sahəyə daş, qum və s. tökdüm. Həmin vaxt tanımadığım bir şəxs mənə yaxınıaşıb bildirdi ki, “bu sahə mənimdir, tikinti işlərini dayandır” dedikdə, sanki şoka düşdüm. Bundan əlavə, həmin şəxs Rəşad Osmanovun mənə 3000 (üç min) manat pulun müqabilində satmış olduğu torpaq sahəsinə aid sənədləri də göstərdi. Belə olan halda “mənə satdığın yerin sahibi var” deyə Rəşada iradımı bildirsəm də, o, ona bildirdiyim iradlarıma heç cür əhəmiyyət vermədi. Belə olan təqdirdə adı çəkilən şəxsdən verdiyim pullların geri qaytarmasını təkidlə tələb etdim.

Həmin vaxt xoşagəlməz hal o oldu ki, dələduzluq əməlinə qol qoyaraq məni minbir “oyuna salan” bu şəxs verdiyim pulları geri qaytarmaq, hansısa peşimançalıq hissini keçirmək əvəzinə “məndə pul yoxdur, get kimə istəyirsən şikayətini et” dedikdə, sanki öz-özlüyümdə dəhşətə gəldim. Onun belə bir cavabından sonra anladım ki, “makler”lik işi ilə məşğul olan Rəşad Osmanov, 3 min manat pulu heç də xoşluqla geri qaytarmayacaq. Buna görə də məcbur olub Sabunçu RPİ-nin 12-ci polis bölməsinə ərizə ilə müraciət etdim. Düzdür, bölmədə ərizəmi qəbul etdilər və üz-üzə qaldığım problemin araşdırılması Fərid adlı təhqiqatçıya da həvalə olundu. Artıq ərizəmin qəbul olunduğu vaxtdan təqribən 11-12 aydan çox vaxt keçsə də, təəssüflər olsun ki, bu günə kimi atılan addımlarla bağlı lazımi araşdırma işləri aparılmayıb. Bundan əlavə, baş verən dələduzluq əməli ilə bağlı DİN-nin 102 xidmətinə etdityim müraciətin də, hələ ki, heç bir nəticəsi yoxdur. Hətta, yaxın qohumlarımdan biri probleminin həllinə kömək məqsədilə Sabunçu rayon prokuroru cənab Ceyhun Şirinova yazılı ərizə ilə müraciət etsə də və qeyd olunan problemin araşdırılmasına nəzarət, RPİ rəisinin müavinlərindən birinə tapşırılsa da, verilmiş belə bir tapşırığın da nəticəsi yoxdur.
2016-cı ilin avqust ayından üz-üzə qaldığım problemim araşdırılıb həll olunmadığından, son anda onun ictimailəşdirilməsinə qərar verdim ki, bəlkə o halda problemimin həllinə nail ola bildim. Mən imkansız ailənin üzvüyəm və 3 min manat pulu heç də asanlıqla, yaxud da dələduzluq yolu ilə deyil, məhz alın təri ilə, halal zəhmətimlə qazanmışdım. Belə bir səbəb üzündən də, mən üzümü DİN-nin rəhbərliyində duran vəzifə sahiblərinə tuturam və onlardan problemimin həllinə köməklik etmələrini də xahiş edirəm. Mən hər zaman dövlətimizin təhlükəsizliyinin təmin olunmasında, vətəndaş hüquqlarının qorunmasında birbaşa iştirak edən hüquq-mühafizə orqanı əməkdaşlarına inanmışam, onlara etibar etmişəm. İnanıram ki, mənə qarşı dələduzluq etmiş şəxsin əməllərinin lazımınca araşdırılması üçün, aidiyyəti qurumlar yaxın günlərdə lazımi addımlarını atıb, mənim Konstitusiya ilə qorunan hüquqlarımı bərpa edəcəklər”.

Hörmətli oxucular! Biz bir redaksiya olaraq Bəybala Nuriyevin 2016-cı ilin avqust ayından üz-üzə qaldığı problemin ictimailəşdirilməsinə bir daha qərar verdik. Çünki, adı çəkilən şəxs 24 yaş həddinə çatmış bir gəncdir və belə bir gəncin alın təri ilə qazandığı 3 min manat pulun dələduzluq yolu ilə ələ keçirilməsi və mənimsənilməsi heç bir hüquqa sığmır. Bundan əlavə, həmin gəncin KİV nümayəndələrinin əsaslı şəkildə dərc etdikləri açıqlamaların effekt verəcəyinə hədsiz dərəcə inamı olduğundan, o, bir müddət bundan əvvəl redaksiyamıza müraciət etmişdir. Bəybala Nuriyevdə belə bir inamın əmələ gəlməsini zəruri edən bir çox səbəblər var ki, həmin səbəblər içərisində ən əsası, bu il “Mətbuat günü” ilə bağlı keçirilən görüşdə ölkə rəhbəri cənab İlham Əliyevin jurnalistləri özünün yaxın dostu hesab etməsi olub. Çünki, həmin görüşdə cənab Prezident açıq şəkildə vurğuladı ki, “mən bir çox məlumatları jurnalistlərin dərc etdikləri açıqlamalar vasitəsi ilə əldə edirəm. Azərbaycanda xoşagəlməz halların mövcudluğu barədə mediada kifayət qədər dolğun məlumatlar vardır. Mən bunu alqışlayıram. Xüsusilə, bürokratiya, korrupsiya, rüşvətxorluq, özbaşınalıq, yekəxanalıqla bağlı olan mövzular, araşdırmalar bizim ümumi işimizə dəstək verir”. Yəni, ölkə rəhbərinin bu cür açıqlaması onu söyləməyə əsas verir ki, digər vəzifə sahibləri jurnalistlərin yazdıqları açıqlamalara və həmin açıqlamalarda sadalanan faktlara diqqətlə yanaşmalı, üzərinə düşən vəzifə borclarını lazımınca yerinə yetirməlidirlər. Bəs bu gün nələr baş verir? Biz bir redaksiya olaraq problemin varlığını ictimailəşdiririk, yaşanan olayla bağlı redaksiya tərəfindən aidiyyəti qurumlara məktublar ünvanlayıb problemlərin araşdırılmasını və görülən tədbirlərlə bağlı redaksiyamıza cavab verilməsini də xahiş edirik. Amma, Qanunvericilikdə müəyyən edilmiş müddətdən xeyli vaxt keçsə də, aidiyyəti üzrə ünvanladığımız məktublara cavab belə verilmir. Bu da o anlama gəlir ki, ölkə rəhbəri cənab İlham Əliyevin jurnalistlərə qarşı ortaya qoyduğu yanaşmasını bəzi vəzifə sahibləri lazımınca dəyərləndirmirlər.
Biz bir mətbu orqan olaraq Bəybala Nuriyevə qarşı atılan bu cür addımları pisləyir, problemin qanuni yollarla araşdırılmasına və həllinə cavabdehlik daşıyan qurumlardan, məhz əməli addımlar atmalarını da xahiş edirik. İnanırıq ki, problem çox yaxın vaxtlarda ədalətli həllini tapacaq və 24 yaş həddində olan bir Azərbaycan gəncinin Konstitusiya ilə qorunan hüquqları da təmin olunacaq. Açıqlamada adı çəkilən hər kəsi dinləyə bilərik.
Mövzunu diqqətdə saxlayacağıq.

Rahib Bəxtiyarov