Sabiq nazirin yarımçıq qalmış hesablaşması üçün “X” günü yaxınlaşır: komitə sədri 2018 hakim komandasında olmaya bilər

Həmyerlisini istintaqda ələ vermiş, eks-nazirin həbsindən sonra əmlaklarını qəsb etmiş Həsənovun “ustadına kəm baxanın gözlərinə qan damar” sınağı başlanıb...
Sabiq iqtisadi inkişaf naziri Fərhad Əliyevin qayıdışı bəzi məmurların “dalağını sancdı”.
Həbsdən çıxdıqdan sonra özünü reabilitasiya edən keçmiş nazirə “yaşıl işıq” yandırmağa başlayıblar.
Onun siyasi iqtidarla münasibətlərinin yoluna düşməsi və təzədən etimad qazanması bəzi dairələrin canına vəlvələ salıb.
“Gündəm-Xəbər”in əldə etdiyi məlumata görə, hazırda təşviş içində olan məmurlardan biri F.Əliyevin həmyerlisi, vaxtilə karyera yüksəlişinə dəstək verdiyi, amma həbs olunanda əleyhinə ifadə vermiş Əmlak Məsələləri üzrə Dövlət Komitəsi sədri Kərəm Həsənovdur.
K.Həsənov F.Əliyevin dönüşünü gözləmirdi. Siyasi hakimiyyət daxilindəki islahatçı qanad keçmiş nazirin həbsə qədər etmək istədiyi iqtisadi proqramları reallaşdırmağa ona zəmanət verib.
Əgər vəzifədə olduğu dövrdə F.Əliyev inflyasiya, inhisarçılıq, monopolistlərlə mübarizə aparmasına hasar çəkən qüvvələr var idisə, 2015-ci ildən başlanmış iqtisadi böhrandan sonra sabiq nazirin həyata keçirmək istədiyi sosial-iqtisadi proqramlara ciddi zərurət yaranıb.
Postneft dövrünün başlanması, qeyri-neft sektorunun dirçəldilməsi fonunda keçmiş iqtisadçı nazirə böyük ehtiyac yaranıb.
Doğrudur, Sumqayıt Texnologiyalar Parkı bu müəssissəyə F.Əliyevin rəhbər gətirilməsini təkzib etmişdi.
Amma STP-nin rəhbərliyindəki şəxsin sabiq nazirin adamı olduğu sirr deyil. Yəni mütləq deyil ki, F.Əliyev özü rəsmi post tutsun.
Üstəlik, prezident İlham Əliyevin eks-nazirə münasibətdə körpülərin yenidən bərpa olması, etimad göstərilməsi anti-Fərhad qüvvələrini ciddi şəkildə həyəcanlandırıb.
Və onlardan biri olan komitə sədri Kərəm Həsənov onsuz da itirməkdə olduğu nüfuzu və etimadının F.Əliyevdən sonra sürətlə vəzifəsindən getməsini sürətləndirəcəyi istisna edilmir.
İkinci tərəfdən, K.Həsənov hakimiyyətin yaxasını qurtarmaq istədiyi korrupsiyaya bulaşmış sahələrdən birinə rəhbərlik edir.
Postneft dövrü isə sosial islahatların intensiv icrasını diktə edir. Hökumət neftin bahalaşmayacağını anlamağa başlayıb. Başqa tərəfdən isə sürətlə yoxsullaşan əhalinin sosial və bürokratik əngəlləri aqressiyanı artırır.
Elə əmlak komitəsi də vətəndaşların kütləvi şəkildə narazı olduğu bir sektordur: rüşvət, süründürməçilik, qanunsuzluq, müctəlif maxinasiyalar...
Bu situasiyada F.Əliyevin dönüşü, ona ölkənin iqtisadiyyatını reanimasiyadan çıxarmaq tapşırığının verilməsi əzəli düşmənlərinin tək-tək dənlənməsi ilə müşayiət olunacaq. K.Həsənovun da həmin cərgədə olduğu aydındır.
Həmyerlisinin əleyhinə istintaqa ifadə vermiş, bu “yaxşılığı” hesabına qabağa çəkilmiş komitə sədri yalnız MTN hadisələrində barmağının olması ilə barmağını dişlədi.
K.Həsənovun Eldar Mahmudovla işbirliyinin de-şifrə olunması az qala həbsinə gətirib çıxarırdı.
Yəni, bir yandan həbsdə olan nazirə qarşı verdiyi ifadə hakimiyyət üçün sərfəli olsa da, o bir tərəfdən prezidentə qarşı iş aparmış E.Mahmudov şəbəkəsinin əlinə oynayıb.
Qardaşı Malik Həsənovun da MTN-nin himayəsi altında deputat seçilməsi işləri əməllicə mürəkkəbləşdirib.
Son olaraq Çexiyadakı biznesinin ifşası iqtidarla olan bağları qoparmağa sürətli keçid etdi.
“Gündəm-Xəbər”in əldə etdiyi məlumata görə, K.Həsənovun hakimiyyət yanında vəziyyəti gərgindir.
Komitə rəhbəri bir müddət əvvəl MTN işindən bəzi media emissarları hesabına qurtula bilmişdisə, bu dəfə durum ürəkaçan deyil.
Onun 2018-ci il komandasında yer alacağı gözlənilmir. Seçki ilində hakim komandada ciddi dəyişikliklər planlaşdırılır.
Prezident 7 illik prezidentliyə refreş edilmiş heyətlə getməyi, gərginliyi yüngülləşdirməyi, xalqın narazı olduğu sahələrdə sosial islahatlar aparmağı hədəfləyib.
Belədə bir neçə iri fiqurun başının gedəcəyi şübhəsizdir. Çünki bəzi məmurlar hakimiyyətlə xalq arasında ciddi qarşıdurma yaradacaq qırmızı xətləri keçməyə başlayıblar.
Elə K.Həsənovun fəaliyyəti də bu baxımdan mənfi qiymətləndirilir. Eyni zamanda Ziya Məmmədov kimi ona da etimad azalıb. 2018 komandasında Kərəm Həsənova yer olmadığı iddia edilir.
F.Əliyevin gəlişi bu mənada həm də əhəmiyyətlidir ki, onun təklif edəcəyi sosial-iqtisadi reformalar K.Həsənovun rəhbəri olduğu komitənin ləğvini şərtləndirir.
Artıq Azərbaycanda ən yüksək səviyyədə nəzarətdə saxlanan islahatlar prosesi heç kəsin toxunulmaz olmadığını və dövlət etimadından sui-istifadənin cəzasız qalmadığını təsdiqləyir.
Mətbuat yazır ki, Kərəm Həsənov 1992-ci ildən xarici təşkilatların tələbi və məsləhəti ilə bütün keçmiş SSRİ respublikalarında yaradılmış formal bir qurum olan Anti-inhisar Komitəsində sıradan bir məsləhətçi işləyirdi.
90-cı illərin sonlarında o, sabiq iqtisadi inkişaf nazri Fərhad Əliyevin qardaşı, "Azpetrol” Şirkətinin rəhbəri Rafiq Əliyevlə tanış olur. Kərəm Həsənovun odlu-alovlu çıxışları Rafiq Əliyevin xoşuna gəlir.
K.Həsənov vaxtaşırı uzun illərdir işlədiyi Komitədəki əməkhaqqının azlığından, Yasamalda kirayədə yaşamasından, rayondan yardım olmasa dolanışığının çətinliyindən R.Əliyevə gileylənərək, əlverişli variant olsa həmyerli kimi onun da nəzərə alınmasını xahiş edirdi.
Fərhad Əliyev Dövlət Əmlak naziri təyin olunduqdan sonra R.Əliyev qardaşından K.Həsənovu məsul bir vəzifəyə təyin etməyi xahiş edir.
Qardaşının sözünü eşidən F.Əliyev K.Həsənovu qəbul edir. Onu başdan–ayağa süzdükdən sonra ilk tapşırığını verir: "Əynindəki nimdaş pal-paltarını dəyiş, məmura yaraşan tərzdə geyin…”
Çox keçmir ki K.Həsənov nəinki "əyin başını” həm də həyatını, komandasını dəyişir və açıqdan açığa Fərhad Əliyevin "quyusunu” qazmaqa başlayır, onunla bağl hazırlanan gizli dosyedə əsas şahid kimi rəqib qruplaşmanın bütün təlimatlarını yerinə yetirir.
Bundan əlavə K.Həsənov tərəfindən F.Əliyevin ona məlum olan planları, qohum-əqrabasının, dostlarının adına özəlləşdirdiyi obyektlər, torpaq sahələri, ASC-lərdəki səhm paketləri haqqında məlumatlar həm rəqib qruplaşmaya, həm Prezident Administrasiyasına, həm də mətbuata ötürüldü.
Həsənovun əsas rol aldığı bu kampaniyanın sonunda F.Əliyev həbs olundu. Əmlak Məsələləri Dövlət Komitəsinin sədri Kərəm Həsənov bu günə qədər vəzifədə qalmasını mənəvi cəhətdən həmyerlisinə borcludur.
İqtidar rəhbərliyi məhz komitə sədrinin illər əvvəl göstərdiyi xidmətə görə mükafatlandırıb və vəzifədə saxlayıb.
Hakimiyyət bu yaxşılıqları əsla unutmur, di gəl ki, həmyerlisinə xəyanət etmiş bir şəxsə hakimiyyət daxilində müsbət münasibət yoxdur. Sadəcə, hakimiyyətin idarə olunması prosesində belə lazımdır...
K.Həsənov bu gün həmyerlisi, həbs həyatı yaşamış keçmiş iqtisadi inkişaf naziri Fərhad Əliyevə etdiklərinə görə daxilən əzab çəkirsə, bunu "timsahın göz yaşları” adlandırmaq olar.
Komitə sədri onun bir zamanlar əlindən tutub karyera pilləsində yüksəldən həmyerlisi olan naziri istintaqda ələ verir, dost əlini uzatmış F.Əliyevin biləyindən kəsir.
K.Həsənovun kapital siyahısında Fərhad Əliyevə bağlı əmlaklar da mühüm yer tutur. Belə ki, Kərəm Həsənov Fərhad Əliyevdin təkcə kreslosunu zəbt etməyib.
Fərhad Əliyev həbs olunduqdan sonra Kərəm Həsənov onun nəzarətində olan obyektləri əlindən almağa başladı.
Fərhad Əliyev aid "Mingəçevir Regenerat” ASC, "Mingəçevir Texniki Rezin” ASC, "Bakı Elektroavtomat” ASC, "Siyəzən Broyler” ASC, "Azərbaycan Aliminiumu” ASC, "Daşkəsən Filizsaflaşdırma” ASC, "Azərelektroterm” ASC, "Azərboru "ASC, "Bakıelektrikşəbəkə” ASC, "Sumqayıtelektrikşəbəkə” ASC ilə bağlanmış müqavilələr guya investorlar tərəfindən müqavilə şərtlərinin yerinə yetirilməməsi adı ilə ləğv olundu. Həmin müəssisələrin fəaliyyətinə Kərəm Həsənov birbaşa özü nəzarət edir.
Hazırda bu müəssisələrin gəliri komitənin "katyoluna” ödənilir. Bundan başqa Fərhad Əliyevin respublikanın müxtəlif yerlərində, Bakı şəhərində yaxınlarının adına özəlləşdirdiyi qeyri-yaşayış sahələri əlindən alındı
Dövlət Reyster Xidmətinin rəisi Məhəmməd İmanovu qurban verən Kərəm Həsənov üçün bir həyat kredosu var - silahdaşlarını, ona dəstək verənlər ən dar anda ələ vermək olar, təki kreslosunu itirməsin.
Amma bu dəfə daha sərt sınaq var. Bu dəfə isə qardaşların adı 3 milyardlıq səs-küylü korrupsiya əməliyyatında keçir.
Beynəlxalq araşdırmaçıların ortalığa qoyduğu faktlar göstərir ki, Həsənovlar prezidentə qarşı Qərbdə başlamış kampaniya üçün tutarlı arqumentlər veriblər.
Əgər Həsənovlar Avropada mal-mülk sahibi olmasaydılar, korrupsiya pullarına varlanmasaydılar beynəlxalq dairələrin ölkəmizin imicinə zərbə vuran bu halları tirajlamazdı.
Məlum olduğu kimi, Beynəlxalq araşdırmaçı jurnalistlərdən ibarət Mütəşəkkil Cinayətkarlıq və Korrupsiya Araşdırmaları Layihəsinin (OCCRP) 3 milyardlıq korrupsiya əməliyyatı araşdırmasında diqqətdən kənarda qalan daha bir fiqurun adı keçir.
Çexiyanın Praqa və Marinask Lazne şəhərlərində daşınmaz əmlak və otellər alan tanınmış azərbaycanlılar arasında Dövlət Əmlak Komitəsinin sədri Kərəm Həsənovun qardaşı, deputat Malik Həsənovun da adı var.
Hər iki çex şəhərində bahalı malikanələrə sahiblənmiş komitə sədrinin deputat qardaşının bu pulları hardan əldə etdiyi sirr deyil – millət vəkilinə qadağan edilmiş biznesdən.

Zöhrab Təmrazov
gundemxeber.az