“Axı, bizim də Konstitusiya ilə tənzimlənən vətəndaş hüquqlarımız var və bu hüquqlarımız da qorunmalıdır”

Bir neçə gün bundan əvvəl “Gündəm Xəbər”ə müraciətini ünvanlayan və 17 ildən bir qədər çox müddət ərzində yaşadıqları mənzildən zor gücünə bayıra atılan, açıq-aşkar şəkildə küçələrə salınan, müəyyən hədələrlə üz-üzə qalan Məmmədovagilin ailə üzvlərinin başlarına gətirilən müsibətləri eşidib dinlədikcə, sanki şoka düşdük. O halda öz-özümüzə sual etdik ki, axı bu gün nə qudarlıq, nə də feodalizm dövründə yaşamırıq ki, kim nəyi necə düşünürsə o cür də addımlarını atmalıdır. Bu gün 21-ci əsrdir, yəni sivil dünyanın inkişaf etdiyi, insan hüquq və azadlıqlarının qorunduğu, müdafiə olunduğu bir zamandır. Belə bir dövrdə illər uzunu alın təri ilə zəhmət çəkib, özünə ev-eşik edən bir ailəni bayıra atmaq nə deməkdir? Axı, belə bir addımı atmaq, hansısa ailəni isti yerindən çölə tullamaq nə insanlığa, nə də ki, mənəviyyata sığası məsələ deyil. Amma, Beyləqan rayonu, Birinci Şahsevən kənd sakini, faktiki olaraq Bakı şəhəri, Binəqədi rayonu, Rəsulzadə qəsəbəsi Həsrət Ağamalıyev-3d ünvanda kirayədə yaşamağa məcbur olan Məmmədova Sünbülxanım Firuddin qızı “Gündəm Xəbər”ə bildirir ki, “bizi çölə zorla atanlar nə Allahdan, nə də ki, onun bəndəsindən qoxdular. Başımıza gətirilən müsibətləri, məhz Beyləqan rayonundan yaşadığımız ünvana gələn vəzifə sahibləri hansısa maraqlar əsasında həyata keçirdilər.

Əvvəla onu bildirim ki, mənim həyat yoldaşım Məmmədov Arif İdris oğlu səhhətində əmələ gələn problemlər səbəbindən 1995-ci ildə dünyasını dəyişdi. Baş verən ölüm hadisəsindən sonra himayəmdə qalan dörd qız övladımla birlikdə kəndimizdə yaşasaq da, günlər keçdikcə dolanışıq vəziyyətimiz ağırlaşmağa başladı. Belə olan halda məcburiyyət qarşısında qalıb kənddəki evimizi satdıq və 2000-ci ildə övladlarımla birlikdə Bakı şəhərinə gəldik. Az sonra Bakı şəhəri, Binəqədi rayonu 9-cu mkr-n ərazisində yerləşən və təcili tibbi yardım yarımstansiyasına məxsus ərazidə kənar bir şəxsdən 2500 dollar pula 2 sot torpaq sahəsi aldıq. Onu da bildirim ki, qeyd olunan ərazidə torpaq sahəsi aldığımız vaxt, həmin ərazinin içərisində təqribən 20 kvm həcmində tikili bir ev də var idi. Həmin ildən başlayaraq yaşayış şəraitimizi bir qədər yaxşılaşdırmaq məqsədilə, qeyd olunan ərazidə şəxsi vəsaitimiz hesabına digər tikililər tikdik və 13 oktyabr 2017-ci il tarixədək həmin evlərdə yaşadıq. Qeyd olunan ünvanda uzun illər ərzində yaşamağımıza baxmayaraq, 13 oktyabrdan bir neçə gün əvvəl Beyləqan rayon İcra Hakimiyyətinin başçısı Vaqif Abdullayevin tapşırığı ilə, onun 1-ci müavini Telman Məstanov və Beyləqan rayon Polis Şöbəsinin rəis müavini Taleh müəllim yaşadığımız ünvana gəldilər və illər uzunu halal zəhmətimizin müqabilində tikdiyimiz evlərdən dərhal çıxmağımızı tələb etdilər. Əks halda müvafiq addımlar atacaqlarını bildirdilər. Hətta, bu azmış kimi onlar onu da bildirdilər ki, “bu ölkə rəhbəri cənab İlham Əliyev tərəfindən verilmiş tapşırıqdır, mütləq icra olunmalıdır”.

Onu da vurğulayım ki, 17 ildən bir qədər çox müddət ərzində eyni həyətdəki evdə mən bir qızım və onun övladı ilə, yaşadığımız evdən təqribən 5-6 metr aralı məsafədə olan evdə isə, digər qızım ailə üzvləri ilə birlikdə yaşayırdılar. Ötən illər ərzində qeyd olunan ünvanda birlikdə yaşasaq da, 13 oktyabrdan bir neçə gün əvvəl adlarını çəkdiyim vəzifə sahibləri bizi evimizdən çıxmağa məcbur etməklə bərabər, ölkə rəhbərinin adından da sui-istifadə etdilər. Təəssüf doğuran hal o oldu ki, onlar atdıqları addımlarının müqabilində bizi nə mənzillə təmin etdilər, nə də ki, təqribən 70 kvm-lik sahəsi olan evimizə görə kompensasiya ödədilər. Yalnız evdəki əmlaklarımızın daşınması üçün iki ailəyə cəmi 3 (üç) min manat pul verdilər. Axı, ölkə rəhbəri cənab İlham Əliyev televiziya çıxışı zamanı tapşırmışdı ki, “hər kəs sakinləri yaşadıqları mənzillərdən köçürərkən, onlara məxsus mənzillərin hər kvm-nəgörə bazar qiymətinə münasib kompensasiya ödəməlidirlər”. Ölkə rəhbərinin vermiş olduğu belə bir tapşırığın varlığına baxmayaraq, adı çəkilən vəzifə sahibləri minbir əzab-əziyyətlə ərsəyə gətirdiyimiz evlərdən bizi bayıra atdılar və açıq-aşkar şəkildə cənab Prezidentin vermiş olduğu tapşırığa da əməl etmədilər. İndi biz nə etməliyik, nə müddətə qədər kirayələrdə yaşamalıyıq? Axı, bizim də Konstitusiya ilə tənzimlənən vətəndaş hüquqlarımız var və bu hüquqlarımız da qorunmalıdır. Hazırda mən ağbirçək bir qadınam və qaraciyər serrozu xəstəliyindən olduqca əziyyət çəkirəm. Hər iki qızımın oğul övladları 14-15 yaş həddinə çatıblar ki, onlar bir-iki ildən sonra Vətənimizin əsgərləri olacaqlar. Onu da bildirim ki, ötən illər ərzində yaşadığımız həyətdə digər ailələr də yaşayırdılar ki, onlar da bizim kimi oxşar problemlərlə üz-üzə qaldılar. Yəni, həmin ailələri də vəzifə sahibləri yaşadıqları evlərindən məcburi şəkildə bayıra atdılar və onlara da nə mənzil verdilər, nə də ki, kompensasiya ödədilər”.
Bəli, belə bir hasızlıqları eşitdikcə dəhşətə gəlirik, bu cür addımlarını atan vəzifə sahiblərini, hətta ittiham etməkdən də çəkinmirik. İndi sual oluna bilər ki, yaşadıqları mənzillərini minbir əzab-əziyyətlə ərsəyə gətirən Məmmədovagilin ailə üzvləri bu gün nə etməlidirlər ki, pozulmuş hüquqlarının bərpasına nail ola bilsinlər? Bir tərəfdən ölkə rəhbəri cənab İlham Əliyev müvafiq tapşırıqlarını verir, digər tərəfdən bəzi vəzifə sahibləri, o cümlədən Beyləqan rayon İcra Hakimiyyətinin başçısı Vaqif Abdullayevin 1-ci müavini Telman Məstanov və Beyləqan rayon Polis Şöbəsinin rəis müavini Taleh müəllim verilmiş tapşırıqlara əməl etmirlər. Sözsüz ki, adları çəkilən vəzifə sahibləri onlara verilmiş tapşırıqlar əsasında addımlarını ataraq, Sünbülxanım Məmmədovagilin ailə üzvlərini belə bir haqsızlıqla üz-üzə qoyublar. Təəccüb doğuran hal odur ki, görəsən ölkə rəhbərinin, yəni hər kəs sakinləri yaşadıqları mənzillərdən köçürərkən, onlara məxsus mənzillərin hər kvm-nə görə bazar qiymətinə münasib kompensasiya ödəməlidirlər” deyə vermiş olduğu tapşırıq, adları çəkilən və çəkilməyən vəzifə sahiblərinə aid deyilmi? Aiddirsə, niyə icra olunmur? Aid deyilsə, o halda onlar hansı səlahiyyət sahibidirlər ki, verilmiş tapşırığı icra etmirlər?
Bu yöndə araşdırmamız davam edəcək.

Cəfər
gundemxeber.az