Yəni, reallıq o hal oldu ki, Vergilər Nazirliyinin əməkdaşları verilmiş tapşırıqlara məhəl qoymadan sahibkarları sıxışdırdılar, onlara minbir əngəllər yaratdılar və digər qanunsuz addımlarını atdılar

Bu günlərdə təqribən 18 ilə yaxın müddət ərzində vergilər naziri vəzifəsini daşımış Fazil Məmmədovun qəfil daşıdığı vəzifəsindən uzaqlaşdırılması, açıq-aşkar şəkildə medianın gündəmini zəbt edən, eyni zamanda ayrı-ayrı çevrələrdə daha çox müzakirə olunan mövzulardan birinə də çevrildi. Sözsüz ki, ötən illər ərzində respublikamızın vergi sisteminə rəhbərlik edən bir şəxsin qəfil işindən uzaqlaşdırılması, heç də təəccüb doğurmaya bilməzdi. “Gündəm Xəbər”in əldə etdiyi səhih məlumatlara görə, Fazil Məmmədovun istehfası élan olunmazdan öncə o, həmin günün birinci yarısında nazirlikdə dövlət büdcəsinin proqnoz gəlirlərinin icrası və qarşıda duran vəzifələrə həsr olunmuş kollegiya iclası keçirir və aidiyyəti üzrə müvafiq tapşırıqlarını da verir. Amma, günün ikinci yarısında daşıdığı vəzifəsindən uzaqlaşdırılması barədə mətbuatdan xəbər tuta bilir. Yəni, adı çəkilən şəxs daşıdığı vəzifəsindən uzaqlaşdırılmasını heç də gözləmirmiş. Görünür Fazil Məmmədovun özünün, yaxud da tam əksəriyyətin gözləmədiyi qərarın élan olunması, yəqin ki, adı çəkilən bu şəxsin hansısa səhvi ucbatından olub ki, siyasi rəhbərlik qəfil qərarını élan etməyə vadar olur.
Onu da vurğulayaq ki, uzun illər idi ki, Fazil Məmmədov hakimiyyət elitasının aparıcı simalarından biri hesab olunurdu və “ATA” Holdinq kimi nəhəng bir təsisatı idarə etməklə bərabər, onun idarəçiliyinə çoxsaylı şirkətlər də daxil idi. Bütün bunlardan əlavə, dörd rayonun Binəqədinin, Şəmkirin, İsmayıllının və Gədəbəyin onun təsir dairəsində olması da iddia olunurdu. Deməli, bütün bunlar onu söyləməyə əsas verirdi ki, Fazil Məmmədov hakimiyyət komandasında kifayət qədər təsir imkanı olan imtiyazlı bir nazir idi.
Diqqəti bir məqama da yönəldək ki, bu günə kimi bəzi yüksək çinli vəzifə sahibləri daşıdıqları vəzifələrindən uzaqlaşdırılarkən, ilk əvvəl onların adları ətrafında müəyyən söz-söhbətlər dolaşıb, vəzifə səlahiyyətlərinin müəyyən hissələri əllərindən alınınıb, bir qədər vaxt keçdikdən sonra usə “vurulublar”. Fazil Məmmədovun qəfil “vurulması” isə bir çox versiyaların əmələ gəlməsinə səbəb olur ki, bunlardan da daha çox, adı çəkilən şəxsin maliyyə mənimsəmələrinə qol qoyması ola bilər. Ola bilər ki, atılan belə bir addım siyasi rəhbərliyin birbaşa qəzəbinə tuş gəldiyindən qəfil belə bir qərar verilir.
Amma bəzi nüanslar da var ki, həmin nüanslar Vergilər Nazirinin “vurulmasında” əsas amil ola bilər. Belə ki, son 3-4 il ərzində ölkə rəhbərinin sahibkarlığın inkişaf etdirilməsi ilə bağlı məsələlərə olduqca önəm verməsi, bu sahədə əmələ gələn əngəllərin aradan qaldırılması yöndə lazımi tapşırıqlarını verməsi və digər addımlarını atması danılmaz həqiqətlərdir. Hətta, bu sahə ilə bağlı cənab Prezident tərəfindən bir neçə sərəncam da imzalanıb, sahibkarlıq subyektlərində əsassız yoxlamaların dayandırılması tapşırığı verilib, sahibkarlıq fəaliyyətinin rəsmiləşdirilməsi üçün "bir pəncərə” sistemi də tətbiq olunub. Təəssüf və təccüb doğuran hal o olub ki, ötən müddət ərzində bu kimi məsələlər ölkə rəhbəri tərəfindən daim diqqət mərkəzində saxlansa da, sahibkarlar üçün yaradılan süni əngəllərin əksəriyyəti aradan qaldırılsa da, yaşanan problemlərin çoxu mahiyyətcə dəyişmədi ki, dəyişmədi. Yəni, reallıq o hal oldu ki, Vergilər Nazirliyinin əməkdaşları verilmiş tapşırıqlara məhəl qoymadan, dolayı yollarla olsa belə sahibkarları sıxışdırdılar, onlara minbir əngəllər yaratdılar və digər qanunsuz addımlarını atdılar. Bu yöndə söylədiklərimizi təsdiq etmək üçün, yəqin ki, sosial şəbəkələrdə dərc olunan bir çox açıqlamalara, media qurumlarının apardıqları monitorinqlərin nəticələrinə diqqət yetirmək kifayət edər. Bütün bunlardan sonra belə bir qənaətə gəlmək olur ki, ölkə rəhbəri sahibkarlığın inkişaf etdirilməsində olduqca qərarlıdır. Məhz, buna görədir ki, cənab Prezident yoxlamaların dayandırılması, "bir pəncərə” sisteminin tətbiq olunması, çoxistiqamətli subsidiyaların verilməsi barədə sərəncamlarını imzalayır.
Ümumiyyətlə, sahibkarlıq sahəsi hər bir dövlətin onurğa sütununu təşkil edir. Bu sahə nə qədər çox inkişaf edərsə, deməli dövlətin onurğa sütunu da bir o qədər sağlam olar. Son illər ölkə rəhbəri tərəfindən bu yöndə imzalanan sərəncamlar, atılan bir çox addımlar bir daha onu göstərir ki, cənab Prezidentin əsas məqsədi Vergilər Nazirliyini sahibkarlığa mane olan qurum kimi deyil, məhz sağlam rəqabət mühitinin inkişafına yardım edən bir quruma çevrməkdir. Deməli, adı çəkilən nazirlikdə ciddi islahatların həyata keçirilməsinə ehtiyac duyulduğundan, məhz ölkə rəhbəri zamanında belə bir müdrik addımını atmağa qərar verdi. Bu gün hər kəsi düşündürən hal isə, Vergilər Nazirliyi strukturunda həyata keçiriləcək islahatların kimləri əhatə edəcəyi və sabiq nazirin təsir dairəsində olduğu icra başçılarının gələcək talelərinin varlığıdır.
Bəli, yuxarıda qeyd etdiklərimiz bir daha təsdiq edir ki, bu gün Vergilər Nazirliyində ciddi islahatların həyata keçirilməsinə ciddi ehtiyac duyulur və dövlət başçısı da, məhz islahatların zəruriliyi səbəbindən zamanında addımını atdı. Mikayıl Cabbarovun belə bir strateji sahəyə təyinatının uğurlu olması haqda iddialarla bağlı onu deyə bilərik ki, adı çəkilən şəxsin vergilər sektoruna rəhbər təyin olunması heç də təəccüblü deyil, birbaşa məntiqə əsaslanan addımdır. Yəqin ki, belə bir islahatların həyata keçirilməsində, sabiq təhsil nazirinin rəhbərlik etdiyi sahədə həyata keçirdiyi islahatlar və əldə olunan nəticələr əsas götürülüb.

gundemxeber.az