“İşdən çıxarılmağım, yalnız adımdan yazılmış saxta ərizə əsasında mümkün oldu”

Bu günlərdə redaksiyamıza Bakı şəhəri, Nəsimi rayonu, İmran Qasımov küçəsi ev-34 ünvanda qeydiyyatsız yaşayan Həsənov Saydın Əli oğlu tərəfindən müraciət daxil olub. Müraciət müəllifi yazır ki, “Mən sovet dönəmində müxtəlif rəhbər vəzifələrdə çalışmışam, hətta seçkili orqanlarda da təmsil olunmuşam. Bir sözlə, hər zaman dövlətimizə və xalqımıza xeyr verən insanlardan biri olmuşam. Hal-hazırda isə işsizəm. 22 il bundan öncə üz-üzə qaldığım haqsızlığın, ədalətsizliyin bu gün də ağrı-acısını çəkməkdəyəm. Belə ki, Tərtər rayonunun sabiq icra başçısı Elman Abdullayev və adı çəkilən rayonun Mamırlı kənd ərazi vahidliyi üzrə icra nümayəndəsi Şikar Əliyev, mənə maddi və mənəvi cəhətdən zərər vurublar. Yəni, 1995-ci ildə Elman Abdullayevin tapşırığı əsasında, rayonun Füzuli Qəhrəmanov adına kolxozunun 380 ha sahəsində şəxsi vəsaitim hesabına taxıl səpini həyata keçirdim. Bu günə kimi ona dəfələrlə müraciətlər etsəm də, taxıl səpininə çəkdiyim xərci sabiq icra başçısından ala bilmirəm. Elə ki, vaxt tamam oldu taxıl səpini yekunlaşdı, o halda Elman Abdullayev müavini Fəxrəddin Haqverdiyev vasitəsilə mənə işdən çıxmaq barədə ərizə yazmağı tapşırdı. Belə bir şərtin qarşılığında təkid edib taxıl səpininə xərclədiyim vəsaiti ondan tələb etdim və işdən çıxmaq barədə ərizə də yazmadım. Belə olan halda o, məni susdurmaq məqsədilə 23 noyabr 1995-ci il tarixdə qanunsuz olaraq işdən çıxartdı. Atdığı addımı ilə ürəyi soyumadı, hətta o, məni həbs etdirmək qərarına da gəldi. Bu məqsədlə təsərrüfatın üçillik sənədlərini Tərtər rayon Prokurorluğuna təqdim etdirdi ki, haqqımda nələrisə sübuta yetirə bilsin. Aparılan araşdırmalar zamanı prokurorluq əməkdaşları mənimlə bağlı hər hansı qanunsuzluğu aşkar edə bilmədilər.
Onu da bildirim ki, həmin vaxtlarda nə qədər təzyiqlə, hədə ilə üz-üzə qalsam da, heç bir halda işdən çıxmaq barədə ərizə yazmadım. İşdən çıxarılmağım, yalnız adımdan yazılmış saxta ərizə əsasında mümkün oldu. Bütün bunlardan əlavə, Füzuli Qəhrəmanov adına kolxozun 1995-ci ilə aid sənədləri Elman Abdullayevin göstərişi ilə arxivdən yoxa çıxarıldığından, ortada həmin ilə dair hər hansı sənəd-sübut yoxdur. Həmin ilə dair sənədlər yox edildiyindən, mənə 1995-ci ilə aid pensiya hesablanmayıb. Guya ki, mən həmin il işləməmişəm, hər hansı əmək fəaliyyəti ilə məşğul olmamışam. Bu günə kimi üz-üzə qaldığım haqsızlıqlarla bağlı aidiyyəti qurumlara dəfələrlə müraciətlərimi ünvanlasam da, təəssüflər olsun ki, müraciətlərimə qanuna müvafiq qaydada baxan olmayıb. Bu cür yanaşmanın varlığı da, məni olduqca incidən hallardır”.

Rəsafil