Məhbub Zülfüqarlı: “Saleh Səmədov Xocalı faciəsi qurbanlarının xatirəsinə ucaldılmış postamenti də yerlə-yeskan etdirib”

Hal-hazırda İmişlidə məmur özbaşınalığı o həddə çatıb ki, sakinlər məcbur qaldıqlarından ölkə rəhbəri cənab İlham Əliyevlə bərabər, birinci vitse-prezident Mehriban xanım Əliyevaya, Baş Nazir cənab Artur Rasizadəyə, bir çox nazirlərə və digər vəzifə sahiblərinə aramsız şikayətlərini ünvanlamaqda davam edirlər. Bütün bunlara da başlıca səbəb, yerli vəzifə sahiblərinin daşıdıqları vəzifələrindən sui-istifadə etmələri olur. Prezident keçirdiyi müşavirələrdə daim məmurlara tapşırır ki, “sakinlərlə səmimi rəftar edin, onlara məxsus problemlərin həlli ilə məşğul olun”. Bu yöndə lazımi tapşırıqlar verilsə də, əfsuslar olsun ki, yerlərdə vəzifə sahibləri sakinlərə qarşı təzyiqlərini hələ də artırmaqda davam edirlər. Yəni, kim pulludur, arxalıdır, onu müdafiə edirlər. PA-a ünvanlanan şikayətlər isə, kimlərdən şikayətlər olunubsa araşdırılması üçün həmin vəzifə sahibinə göndərirlər. 08 fevral 2018-ci il tarixdə Bakıdan cənab Prezidentə şikayət ərizəsi göndərdim və qeyd etdim ki, bu gün İmişlidə ikihakimiyyətlilik mövcuddur. Başçı qanunsuz əməllərinə görə kimləri işdən azad edirsə, o halda məmur-oliqarx adı ilə tanınan Saleh Səmədov, qovulmuşları ya öz idarəsinə, şirkətlərinə işə götürür, ya da ki, “Azəriqaz”a, “Azərişıq” ASC-nə və digər strateji obyektlərə yerləşdirir. Bu cür əməlləri, bəlkə də müxalif kəsim heç cür edə bilməz. Məmur-oliqarx vermiş olduğu sifariş nəticəsində hələ bir müddət bundan əvvəl qondarma şahidlərin vasitəsilə, məni məhkəmə sədri və prokurorla olan dostluğundan sui-istifadə edib CPM-nin 147.1-ci maddəsi ilə həbs etdirdi.
Keçirilən məhkəmə prosesləri zamanı məmur-oliqarxla heç bir vəkil müqavilə bağlamadı. O, öz işçisi, sektor müdiri Elnur Tağıyevi özünə nümayəndə seçmişdi. Amma, qanun bu cür addımın atılmasını yasaq etsə də, məhkəmə hakimi bunlara göz yumdu. Mənim nümayəndəm isə hüquq müdafiəçisi Oqtay Güləliyev idi. 06 iyul 2017-ci il tarixdə prosesi elə başa vurdular ki, sanki elə bil bir neçə saatdan sonra “Stolipinə” minməli idim. Həmin gün onlar məni Şüvəlan İT-na yola saldılar, özləri isə bayramı xaricdə qeyd etməyə getdilər. 23 iyun 2017-ci il tarixdə keçirilən məhkəmə prosesində iştirak edən oliqarx ilk çıxışına belə başladı. “Oqtay Güləliyev şərəfli şəxsdir, başa düşə bilmirəm ki, o, bu şərəfsizi niyə müdafiə edir” çıxışına cavabım heç də gecikmədi. Cavab verdim ki, mən sən tərbiyədə, sən səviyyədə deyiləm. 08 fevral 2018-ci il tarixdə Prezident Administrasiyasına ünvanladığım şikayətimin Standartlaşdırma Metrologiya və Patenet üzrə Dövlət Komitəsinə göndərilməsinə heç də təəccüblənmədim. Çünki, bu şəxsi himayə edənlərdən biri də, adı çəkilən komitənin sədri R.Həsənovdur.
Hər bir insanın beş duyğu hissi altıncı duyğunun məhsuludur. Hal-hazırda sakinlər səviyyəsiz və arxalı məmurlardan olduqca narazılıqlarını ifadə edirlər. Ölkədə qanunlar az-çox cəzaçəkmə müəssisələrində işləyir. Məmurların əksəriyyəti oturduqları “kreslo”ları sanki şəxsi mülkiyyətləri hesab edirlər. İmişlidə 30-40 ildir ki, eyni şəxslər daşıdıqları vəzifələrini bu gün daşımaqdadırlar. Əhməd Əhmədzadənin İmişlidəki rəislərinin və digər vəzifəli şəxslərin ciblərində, seyflərində təqribən 50-100 ədəd əmək haqqı kartları var. Onlar sanki avropalılar kimi yaşayırlar, tabeçiliklərində olan şəxslərlə isə, bir növ qul təki davranırlar. Onların əksəriyyətinin də himayəçisi, məhz oliqarx-məmur olan Saleh Səmədov və məhkəmənin sədri Qurban Hacıyevdir.
S.Səmədov İmişlidə “20 Yanvar” şəhidlərinin xatirəsinə ucaldılmış postamenti yerlə yeksan etdirib, ətrafındakı 30-40 illik ağacları kötüyündən çıxartdırıb, strateji əhəmiyyət kəsb edən dəmir yoluna gedən yolu dağıtdırıb və yerində şəxsi uşaq bağçası tikdirib. 1980-cı illərdə dövlətin vəsaitləri hesabına tikilən bağçaları özəlləşdirib, marketlərə çevirib. Məgər “20 Yanvar” şəhidlərinin adlarına salınmış xiyaban bu xalqa lazım deyilmi? Bundan əlavə, adı çəkilən bu şəxs Xocalı faciəsi qurbanlarının xatirəsinə ucaldılmış postamenti də yerlə-yeskan etdirib. Yəqin ki, yaxın vaxtlarda həmin ərazilərdə də marketlər saldıracaq.
23 fevral 2018-ci il tarixdə Xocalı faciəsi RİH-də toplantıya oxşar formada xatırladıldı. Əslində siyasi partiyalar, rayon sakinləri həmin günü hüzn günü kimi qeyd etməli idilər. 1980-cı illərdə inşa olunan kinoteatr da özəlləşdirildiyindən, bu gün həmin kinoteatrdan çayxanaya kimi istifadə olunur. Görəsən bundan sonra İmişli sakinlərinə kinoteatr lazım olmayacaqmı? S.Səmədov sovet dönəmində salınmış hərbi əhəmiyyətli lokotoru da yerlə yeksan etdirib, hərbi-hissənin ərazisini şumlatdırıb, əhalinin örüş sahəsində qiymətli yulğun ağaclarını kötüyündən çıxartdıraraq, həmin ərazidə 18 hektar istixana saldırıb. Görəsən müdafiə naziri cənab Zakir Həsənov bunu görmədimi, eşitmədimi? O halda bu cür fəaliyyət 5-ci kalonun fəaliyyəti kimi hesab olunmalı deyilmi?
Qarabağ şəhidlərinin uyduqları ərazidə şadlıq saray tikdirmək istəyi, rayonun Yalavac kənd sakinləri tərəfindən alındı. 2008-ci ildə Şəhidlər Xiyabanına qarşı edilən haqsızlığı isə, biz QAT-nın sədri Akif Nağı ilə birlikdə aldıq. 28 mart 2016-cı ildə oliqarx S.Səmədov bizim evə gəlmişdi. Həmin vaxt məni zəhərləmişdilər, ona görə də bir ay idi ki, canımla əlləşirdim. Həyətə girən kimi onun ilk kəlməsi belə oldu: “Məhbub Zülfüqarlının evi budurmu? Ev başına uçur, buna görə “borzuluq” edirdin, axırın bu deyilmi?” Bu cür danışıqlarına görə qardaşlarım onu həyətdən qovmaq istədilər, o halda belə bir addım atılmasına imkan vermədim. Qoyun danışsın, özünü biabır etsin, kimliyini göstərsin. Çay süfrəsində əyləşdi və dedi ki, “Şəhidlər Xiyabanı” ərazisində obyekt tikmək istəyimdən sən yazırdın?” Həmin an böyük qardaşım Davud içəri girdi və “Saleh nə əcəb bu həyətə gəlmisən?” deyə ona sual etdi. O, ünvanlanan suala “Məhbub bəyə dəyməyə gəlmişdim” deyərək cavab verdi və 200 manat pul çıxarıb stolun üstünə qoyduqda qardaşım buna qəti etirazını bildirdi.



İndi ölkədən çıxıb getmək istəyirəm, bu bəlkə də mənim sizlərə sonuncu harayım ola bilər. Ölkədən çıxıb getməyimi ona görə istəyirəm ki, qəlbim rahatlıq tapsın, heç olmazsa vicdanım ağrımasın. İndi xahişim odur ki, Ali Məhkəmə İmişli rayon Məhkəməsinin və Apellyasiya Məhkəməsinin qərarlarını ətraflı araşdırsın və ədalətli qərarlar qəbul etsin ki, günahsız məhkumluğum ləğv oluna bilinsin. Qanunun aliliyi naminə ədalətli addımlar atılmasını rica edirəm. Günahsiz şəkildə həbs olunsam da, Apellyasiya Məhkəməsinə yazdığım “şanlı məktub”larıma nə həbsxanada olduğum zaman, nə də ki, azadlıqda olduğum vaxtlarda heç bir cavab əldə edə bilməmişəm. 2017-ci ildə həyatım altüst oldu. Əslində məsuliyyətə S.Səmədov cəlb olunmalı olduğu halda, o, məni məhkəmənin sədri Q.Hacıyevin “qanunları” və sifarişi ilə həbs etdirdi. Ona görə də cənab Prezidentdən xahiş edirəm ki, üzüzə qaldığım problemlərin həllində mənə köməklik etsin. Eyni zamanda şikayətlərimin araşdırılması şikayət etdiklərim şəxslərin üstünə göndərilməməsi üçün, aidiyyatı orqanlara bu yöndə müvafiq göstərişlərini versə, o halda lazımi nəticəni əldə etmək olar.

Məhbub Zülfüqarlı