Müstəqil jurnalist qanunsuzluq və korrupsiya hallarını kəskin tənqid atəşinə tutduğuna görə həbsə düçar oldu

İstəkli dostlar, bu şəkilə diqqətlə baxın və öz yanaşmanıza uyğun lazımi qiymətinizi də verin. Şəkildə gördüyünüz bu şəxs, təqribən bir ay bundan öncə İmişli rayon Məhkəməsinin zalında sifarişlə həbs olunan müstəqil jurnalist Məhbub Zülfuqarlıdır. O, İmişli rayonu ərazisində vəzifə sahibi olan bəzi məmurların özbaşınalıqlarından, baş alıb gedən sosial problemlərin varlığından, qanunsuzluq əməllərinin tüğyan etməsindən və s-lərdən yazdığı tənqidi məqalələrinə görə, çox zaman rayon rəhbərliyi tərəfindən təzyiqlərə, təqiblərə, çoxsaylı hücumlara məruz qalır. Hələ xeyli müddət bundan əvvəl onu şəkildə gördüyünüz qaydada, bəlkə də bir qədər ağır fomada döyərək al-qana boyamışdılar. O, ona qarşı atılan addımlara baxmayaraq haqq yolundan çəkilmədi, mübarizəsini davam etdirdi, bir kimsədən çəkinmədi. Məhbub bəyi bu hala salanlar, son anda onu məhkəmə önünə çıxartdılar və sifarişlə həbsinə qərar da verdirdilər.
Məhbub Zülfüqarlı daim Azərbaycan Respublikasının 1-ci vitse-prezidenti Mehriban xanım Əliyevaya, İmişli rayonunda hökm sürən özbaşınalıqlar, qanunsuzluqlar, korrupsiya və mafiya idarəçiliyi barədə yazdığı açıqlamalarına, tənqidi fikirlərinə və s. görə xeyli müddət bundan əvvəl Standartlaşdırma, Metrologiya və Patent üzrə Dövlət Komitəsinin idarə rəisi, tanınmış oliqarx məmurlardan biri hesab olunan Saleh Səmədov tərəfindən məhkəməyə verilmişdi. Məhz, adı çəkilən oliqarxın iddia tələbi əsasında Məhbub Zülfüqarlı Cinayət Məcəĺləsinin 147.1-ci maddəsi ilə təqsirli bilinərək, məhkəmənin hökmü ilə barəsində 5 ay müddətinə həbs-qəti imkan tədbiri seçildi.
Onu da vurğulayaq ki, İmişli rayon Məhkəməsinin Məhbub Zülfuqarlının həbsi ilə bağlı çıxarmış oldduğu əsassız qərardan bir müddət bundan əvvəl apellyasiya şikayəti verilib. Şikayəti jurnalistin müdafiəsinə qoşulan vəkil Azər Rəsul verib. Vəkil müstəqil jurnalistlə görüşmək üçün, hətta Penitensiar Xidmətin rəhbərliyinə də müraciət edib. Onun yaxın günlərdə Zülfuqarlı ilə görüşəcəyi gözlənilir. Məhbub Zülfuqarlı İmişli rayonunda və digər ərazilərdə hökm sürən qanunsuzluq və korrupsiya hallarını kəskin tənqid atəşinə tutan müstəqil yazarlardan olmaqla bərabər, həm də "Kür' Vətəndaş Cəmiyyətinin fəallarından biri idi.
İstəkli dostlar! Gəlin bu gün şərlənib həbs olunan jurnalistləri, ictimai fəalları, o cümlədən Məhbub Zülfuqarlını da müdafiə edək. Gəlin onları tək qoymayaq!
Mövzunu diqqətdə saxlayacağıq.

Oqtay Gülalıyev
"Gündəm Xəbər"