Artıq xeyli müddətdir ki, Səbail rayonunun Badamdar qəsəbə bələdiyyəsində yaşanan problemlər ciddi söz-söhbətlərə səbəb olmaqdadır.

Buna da əsas səbəb, bələdiyyənin bugünkü sədri Həbib Əsədovla adı çəkilən qurumda vergi şöbəsinə rəhbərlik edən Ramiq Mustafanın “ələlə verərək”, bələdiyyəyə məxsus torpaq sahələrini satmaları və oliqarx vəzifə sahibi olan şəxslərdən birinə də çevrilmələridir. İllər öncədən başlayaraq bu cür çirkin əməllərini həyata keçirən hər iki şəxsin fəaliyyəti araşdırılarsa, yəqin ki, o halda onlarla bağlı lazımi addımların atılması üçün, ortaya kifayət qədər əsaslar çıxar. Əldə etdiyimiz məlumatlara görə, Səbail rayonuna rəhbərlik etmiş əvvəlki icra başçısı hər iki şəxsin əməlləri ilə bağlı lazımınca məlumatlı olsa da, nədənsə o, hər iki şəxs barəsində heç bir addımını atmadı. Elə ki, bir müddət bundan öncə Səbail rayonunda da rəhbərlik dəyişdi, o halda “sular durulmağa” başladı. Yəni, yeni icra başçısı vəzifəsinin icrasına başladıqdan az sonra, Batamdar qəsəbə bələdiyyəsində yaşanan problemləri diqqətdə saxladı və müəyyən addımlar atacağını da bəyan etdi.

Məsələn, əldə etdiyimiz məlumatların birində o da vurğulanır ki, 20 dekabrda günorta saat 16:00 radələrində, qəsəbədəki 236 saylı orta məktəbdə RİH-nin başçısı cənab Vüqar Zeynalovla sakinlər arasında görüş keçirilir. Həmin görüşdə sakinlərlə birlikdə ölkəmiz üçün olduqca strateji əhəmiyyət kəsb edən qurumun bir neçə əməkdaşı və Batamdar qəsəbə bələdiyyəsinin sədri Həbib Əsədov da iştirak edir. Bələdiyyə sədrindən fərqli olaraq, həmin əməkdaşların yaşanan və müzakirə olunan məsələlərlə bağlı xüsusi qeyd apardıqları da söylənilir. Ümumi görüş keçirilərkən icra başçısı bələdiyyə sədrinə “Sənin necə və kimlərlə işlədiyini biz yaxşı bilirik. Heç də fikrləşmə ki, sən seçkili orqana rəhbərlik edirsən” deyir. Keçirilən görüşdə bələdiyyənin digər üzvləri iştirak etsə də, Ramiq Mustafa xaricdə olduğundan o, həmin görüşə qatıla bilmir. Bu şəxsin əməlləri haqda belə bir məlumat əldə etmişik ki, maaş alan şəxslərin bank “kod”u onda olduğundan, hələ də bələdiyyədə çalışanlar əmək haqlaranı ala bilmirlər. Deməli, bu şəxs “kod”u deməlidir ki, həmin şəxslər maaşlarını ala bilsinlər.

Əldə etdiyimiz başqa bir məlumatda o da vurğulanır ki, bir neçə gün bundan öncə icra başçısı qəsəbə icra nümayəndəsini daşıdığı vəzifəsindən uzaqlaşdırır və həmin vəzifəyə Natiq müəllimi təyin edir. Hətta, o, yeni icra nümayəndəsinə qəsəbədaxili problemləri diqqətdə saxlamağı və onların aradan qaldırılması yöndə lazımi addımlar atmasını da tapşırır.
P.S. Batamdar qəsəbə bələdiyyəsində yaşanan problemlərlə bağlı açıqlamanı hazırlayarkən belə bir məlumat da əldə etdik ki, işçiləri əmək haqlarını almağa həsrət qoymuş Ramiq Mustafa dünən geri qayıdıb. Buna baxmayaraq, ortada hansısa problemlər əmələ gəldiyindən, işçilər hələ də əmək haqlarını ala bilmirlər.
Mövzu diqqətimizdədir.

GundemXeber.Az