Hörmətli çoxsaylı oxucular! Hər kəsin diqqətinə onu çatdırmaq istəyirik ki, Nyus.Az xəbər portalı olaraq fəaliyyət göstərdiyimiz ötən illər ərzində daim xalqımızın, dövlətimizin maraqlarının müdafiə olunması yöndə fəaliyyət göstərib, məhz ictimai həyatımızda baş verən hər cür sosial-iqtisadi, siyasi yönümlü məsələ və problemlərin həllinə dəstək olmağa çalışmışıq. Çünki, bizim üçün əsas amal, baslıca istək möhtərəm Prezident İlham Əliyev tərəfindən yürüdülən dövlət siyasətini müdafiə etmək, dövlətçiliyimizin möhkəmləndirilməsinə çalışmaq olub. Bəli, bu gün də fəaliyyətimizi bu yöndə davam etdiririk. Belə bir səbəblər üzündəndir ki, indiyə kimi redaksiyamızın ünvanına və elektron poçtuna ayrı-ayrı şəhər və rayonların sakinləri tərəfindən çoxsaylı şikayət ərizələri daxil olub ki, biz həm onları ictimailəşdirmişik, həm də problemlərin aradan qaldırılmasına müəyyən qədər dəstək göstərmişik. Belə şəxslərdən biri də, Ucar rayonu, H.Əliyev prospekti, ev-136 ünvanında yaşayan Raqif Ayaz oğlu Şirinov adlı şəxs olub. Belə ki, adı çəkilən bu şəxs 31 may 2021-ci il tarixdə redaksiyamızın elektron poçtuna göndərdiyi şikayət ərizəsində və video-çəkilişdə Ucar rayon Meliorasiya İdarəsinin rəisi Həsən Qasımovun korrupsiya və çoxsaylı qanunsuzluq əməllərindən bəhs edir və buna görə də ölümlə hədələndiyini, nalayiq söyüşlərlə təhqir olunduğunu da dilə gətirir. Raqif Şirinov belə bir işlərdə Həsən Qasımovun kürəkəni, hansı ki, "Azərişıq" ASC-də yüksək vəzifə sahibi olan Zaur Qurban oğlu Səlimovun və oğlu, hansı ki, Ucar Melioservis İdarəsində mühəndis vəzifəsini daşıyan Nicat Qasımovun daha aqressiv olmalarından da bəhs edir.



Qeyd edək ki, Raqif Şirinovun redaksiyamızın elektron poçtuna göndərdiyi şikayət ərizəsini və video-çəkilişini əsas tutub, 02 iyun 2021-ci il tarixdə başlıqlı məqalə yayımladıq və hər kəsin baş verənlərdən məlumatlı olmasına da səbəb olduq. Məsələnin maraqlı tərəfi odur ki, bir neçə gündən sonra tərəflər arasında hansısa maraqlar çərçivəsində razılaşma əldə olunur. Az sonra isə, Raqif Şirinov Nyus.Az xəbər portalının redaksiyası ilə əlaqə saxlayır və göndərdiyi video-çəkilişin xəbər portalından silinməsini tələb etsə də, o, heç cür buna nail ola bilmir. Belə olan halda məsələ ilə bağlı Ucar rayon Polis Şöbəsinin Cinayət-axtarış bölməsinin əməliyyat müvəkkili Ələddin Əliyev məşğul olur və bu şəxs xəbər portalının baş redaktoruna zəng edir və ondan şikayət olunacağnı da bildirir. Bu belə olduqda Nyus.Az xəbər portalının rəhbərliyi yaşanan olayın obyektiv araşdırılması, əsl həqiqətlərin üzə çıxarılması məqsədilə bir çox dövlət qurumların rəhbər şəxslərinə, o cümlədən daxili işlər naziri cənab Vilayət Eyvazovun da ünvanına rəsmi qaydada məktubla müraciət edir. DİN-nin rəhbərliyinə ünvanlanmış məktuba 30 iyun 2021-ci il tarixdə Azərbaycan Respublikası Daxili İşlər Nazirliyi Baş Cinayət Axtarışı İdarəsinin rəisi cənab Arzu Daşdəmirovun imzası ilə təsdiq olunmuş cavab məktubunda, məhz Ucar rayon Polis Şöbəsinin Cinayət-axtarış bölməsinin əməliyyat müvəkkili Ələddin Əliyevin heç bir hüquqpozma hallarına yol vermədiyi qeyd olunur.



Düşündürücü hal odur ki, Raqif Şirinovun Nyus.Az xəbər portalının redaksiyası ilə əlaqə saxlaması və göndərdiyi video-çəkilişin xəbər portalından silinməsini tələb etməsi faktı araşdırılmır, amma bu şəxsin redaksiyanın rəhbəri Arif Məmmədovdan şikayət etməsi faktı dəfələrlə onun diqqətinə çatdırılır. Belə bir halın varlığı da, məhz böyük şübhələrə yollar açır. Eyni zamanda, dünən günorta saatlarında Ucar rayon Polis Şöbəsi rəisinin müavini İlham müəllimin Nyus.Az xəbər portalının baş redaktoruna zəng etməsi, qeyd olunan video-çəkilişin xəbər portalından silinib-silinməməsini soruşması, məhz hər kəsdə belə bir fikirin formalaşmasına ehyam vurur ki, PŞ-nin əməkdaşları video-çəkilişin çıxarılmasında maraqlıdırlar. O halda sual oluna bilər ki, niyə və buna səbəb nədir?



Bütün bunlar azmış kimi, 14 iyul 2021-ci il tarixdə özünün DİN-də idarə rəisinin müavini olduğunu bildirən Eldar müəllim adlı şəxs, Nyus.Az xəbər portalının baş redaktoru Arif Qabil oğlu Məmmədova zəng edir və onun 16 iyul 2021-ci il tarixdə, səhər saat 10:00 radələrində qeyd olunan olayla bağlı DİN-nə çağırıldığını da bildirir. Amma, adı çəkilən vəzifə sahibi xəbər portalı baş redaktorunun DİN-ə çağırılması ilə bağlı ünvan üzrə çağırış vərəqəsinin göndərilməsinə o qədər də lüzum görmür. Düşünürük ki, cənab Vilayət Eyvazov yaşanan belə bir olayla bağlı müəyyən qədər məlumatlı olduğundan, bütün araşdırmalar qanunamüvafiq qaydada həyata keçiriləcək.
Mövzu diqqətimizdədir.

Gündəmxəbər.az