Adam Allahı unutmasın gərək, Qarabağ qaziləri, savaş əlilləri  Azərbaycan Həmkarlar İttifaqları Konfederasiyasının (AHİK) sədri, millət vəkili Səttar Möhbalıyevə müraciət edən kimi heç bir ödəniş etmədən sanatoriya – kurort yollayışları ilə təmin olunurlar. Belə anında göstərilən diqqət və qayğı bir yandan hörmətli millət vəkilinin qardaşının və bütün yaxın qohumlarının 1-ci -2-ci Qarabağ savaşında şəhid, qazi olmalarıdırsa, o biri yandan özünün və rəhbərlik etdiyi kollektivin işlərinə olan ilgisidir. Başqa sözlə, AHİK başçısı və həmkarları doğrudan – doğruya görəvlərinin başındadır. Nə yazıq, ƏƏSMN tabeliyində Sosial Xidmətlər Agentliyi (SXA) haqqında bunu demək mümkün deyil. Agentlik açıq – aşkar sərgiləyici formada Qarabağ qazilərinə xidmətdən imtina edir. Yollayışla təminatın onun görəvinə aid olmadığını NK-nın 12.08.2002 tarixli qərarı ilə əsaslandıran SXA yetkililəri bilərəkdən, ya bilməyərəkdən unudur ki, indiyədək SXA yox idi, ƏƏSMN və yanındakı qurumlar əlillərin sanatoriya-kurort müalicəsini, istirahətini yüksək səviyyədə təşkil edirdilər. Yəni SXA-nın işi yollayışla təmin etmək yox, yollayışla təminatı təşkil etməkdir. Prezidentin 30.06.2020 tarixli fərmanı ilə təsdiq edilmiş Sosial Xidmətlər Agentliyinin Nizamnaməsində də sözügedən agentliyin vətəndaşların  yollayışlarla təmin edilməsini təşkil etmək görəvi əks olunub. Görəsən, SXA niyə Prezident fərmanı ilə təsdiq olunmuş görəvini icra etməkdən imtinasını NK-nın 20 il qabaqkı qərarı ilə əsassız əsaslandırır? Bəyəm bilmir ki, Prezident fərmanı NK qərarından aşağıda tutula bilməz? 

Bir ay öncənin söhbətidir, ürəyimizdə yaranan ağrılar döyüş dostumla birgə AHİK sədrinə Bilgəh kardioloji sanatoriyasına yollayış verilməsi üçün müraciət etməyimizə nədən oldu. İnanın, heç bir həftə çəkmədi, lüks yollayışlar artıq hazır idi. Bundan sonrasına baxın, AHİK -in şöbələri nəinki yollayış verdi, hələ üstəlik, maddi yardım da göstərdi, di gəl, ƏƏSMN tabeliyində Sosial Xidmətlər Agentliyi AHİK -dən göndərilən yollayışın 15 faizi həcmində ödəniş tələb edib, 162 manatı qəbz vermədən aldı. 

Bundan qabaq da belə olmuşdu, AHİK -dən müharibə əlilinin adına göndərilən yollayışa görə ƏƏSMN-də pul tələb edilmişdi. Belədə sual doğur : Sosial Xidmətlər Agentliyi nəyə xidmət edir, büdcədən bu qurumun saxlanılmasına, ofisinə milyonlar xərclənməsinə nə ehtiyac var? 

Sosial Xidmətlər Agentliyi Naxçıvan “Duzdağ” fizioterapiya mərkəzində Qarabağ qazilərinin reabilitasiyasını təşkil etməkdən də imtina edir. Amma AHİK yox! Fikrimizcə, SXA-nın səlahiyyətlərinin AHİK -ə verilməsi daha məqsədəuyğun olardı . Qarabağ əlilləri, qazilər həm yollayışla pulsuz təmin olunar, həm reabilitasiya hüquqlarından yararlanar, həm də mənzil yiyəsi olardılar. 

Eldəniz

“Gündəm Xəbər”