Ölkə başçısı məmurlara «sahibkarları incitməyin» deyir, komitə sədri isə bunun tam əksini edir

Ölkə başçısı Ilham Əliyev keçirdiyi son müşavirədə məmurları sahibkarları incitməməyə çağırsa da, qarşı tərəf deyəsən bu çağırışa əməl etməməkdə israrlıdır. Belə olmasaydı məsələn, əmlak məsələləri üzrə dövlət komitəsinin sədri Kərəm Həsənov bir qrup sahibkara ayrılan kompensasiyanı dərhal ödəyərdi.
Söhbət Azadlıq prospekti, 154 ünvanında sökülən 16 mərtəbəli binanın birincə mərtəbəsində yerləşən obyektlərin sahiblərindən gedir. Biz hələ binada yaşayan sakinləri demirik. Onların da bəzilərinə kompensasiya ödənilməyib.
Binanın birinci mərtəbəsində yerləşən “Gülnarə” restoranının sahiblərindən biri Müqabil Kərimov bildirib ki, indiyə qədər nə kompensasiya, nə də başqa bir yer alıb: “Bu restoran 1974-cü ildən fəaliyyət göstərir və elə o vaxtdan burada biz işləmişik. Azərbaycan müstəqillik əldə etdikdən sonra 7 nəfər bu restoranı özəlləşdirmişik. Bütün sənədləri qaydasında olub. Restoranın 30-a yaxın personalı olub. Bir günün içində restoranı söküb bu qədər adamı çörəksiz qoyublar. Söküntü işlərini ”Azinko” şirkəti aparıb. Açığı biz bilmirik ki, orada nə tikəcəklər. Gah deyirlər prezident üçün park salınacaq, gah deyirlər həmin bina hündür olduğundan ölkə başçısının yaxınlıqdakı iqamətgahının ərazisi oradan görünür. Nə isə bütün bunlar bizim üçün maraqlı deyil. Bizim üçün maraqlı olan obyektlərin əvəzinə ayrılan kompensasiyanın taleyidir. Fakt budur ki, biz kompensasiyanı almamışıq. Bizə başqa yer də verməyiblər. Daha doğrusu bir yer təklif ediblər, amma həmin yer bizi qane etmir. Əvvəla, həmin obyektin sahəsi bizim restoranın sahəsindən çox azdır. Ikincisi, oranın təmirinə külli miqdarda pul lazımdır”.
Müqabil Kərimov deyib ki, “Azinko” şirkətinin rəhbəri, Kərəm Həsənovun qardaşı Malik Həsənov bina sökülərkən onlara şirin vədlər verib: “Amma bu vədlərin heç birini yerinə yetirmədi. Mən Kərəm Həsənovla görüşmək istədim, mümkün deyil. Mən bir vətəndaş olaraq məmurun qəbuluna düşə bilmirəm. Ölkə başçısı Ilham Əliyev son müşavirədə dedi ki, vətəndaşları, sahibkarları incitməyin. Amma məmurlar, o cümlədən Kərəm Həsənov prezidentin sözünü qulaqradına vurur”.
Sahibkarın sözlərinə görə, onlarda olan məlumata görə, restorana görə 3 milyon manat kompensasiya ayrılıb: “Bu dəqiq məlumatdır. Lakin həmin 3 milyonun taleyi qaranlıqdır. Bizim orada başqa obyektlərimiz, çörək sexi və bərbərxanamız da olub. Onları heç yada salan yoxdur.
Mən yaşlı adamam, min bir əziyyətlə bu restoranı qurub yaratmışam, bu restoranın hesabına neçə ailə dolanırdı. Qardaşım oğlu şəhid olub. Onun ailəsinə mən baxıram. Və məhz restoranın hesabına onları dolandırırdım. O da əldən çıxdı. Amma bunlar Kərəm Həsənovu maraqlandırmır”.
Müqabil Kərimov deyir ki, Kərəm Həsənov özünə çox arxayındır: “Fakt odur ki, bizə deyirlər, gedin kimə istəyirsiniz şikayət edin. Onun adamları ölkə başçısının adından istifadə edirlər, Kərəm Həsənovun guya Ilham Əliyevlə qohum olduğunu deyirlər”.
Yeri gəlmişkən, başqa bir sahibkar - binanın birinci mərtəbəsində aptek və ərzaq mağazasının sahibi Yasim Bəşirov bu məsələ ilə bağlı keçirilən mətbuat konfransında ilginc bir fakt açıqlamışdı. O bildirmişdi ki, dövlət onların binasının və üç beşmərtəbəli evin söküntüsünə böyük vəsait ayırıb. Belə ki, 16 mərtəbəli binanın söküntüsünə 60 min, üç beşmərtəbənin sökülməsinə isə 50 minə yaxın vəsait gedib. Obyekt sahiblərinə ayrılmış 2 mln. ödənilməyib və bu pul “Azinko”nun hesabına yatıb. Qalan iri məbləğ (təxminən 30 mln. manat) haraya gedib, məlum deyil. “Yusif Qəmbərovla (Kərəm Həsənovun müavini) görüşüb bu sualı ona verdikdə: “Bu pula prezident üçün ”Cümeyra” oteli tikilib”,- deyə sahibkar vurğulamışdı.
Bütün bunlar belə deməyə əsas verir ki, Kərəm Həsənov Ilham Əliyevi saymır. Bunu başqa cür dəyərləndirmək mümkün deyil. Xatırladaq ki, 16 mərtəbəli bina və ona bitişik üç beşmərtəbə 2011-ci ildə sökülüb.

Firudin