Nəqliyyat naziri bir neçə iri həcmli layihəyə imza atmaq üzrədir

gundemxeber.az “Gündəm-xəbər”ə daxil olan özəl məlumata görə nəqliyyat naziri Ziya Məmmədov yaxın günlərdə nəqliyyat sektorunda inqilabi dəyişikliklərə start verəcək. Nəzərdə tutulan dəyişikliklərin konkret olaraq nələrdən ibarət olacağını da açıqlayan mənbənin sözlərinə görə, nazirliyin tabeçiliyində olmayan marşrutlara qarşı hücum kampaniyası başlayacaq. Məqsəd isə həmin marşrutların əvəzində Ziya Məmmədova yaxın şəxslərin nəzarətində olacaq yeni marşrutların xəttə buraxılmasıdır.
Qeyd edək ki, proses artıq başlayıb və nazirliyin sözçüsü Namiq Həsənov da bunun təsdiqləyib: “Son günlərdə Bakı şəhərində 8 avtobus marşrutuləğv edilib”. Nazirlik rəsmisi bildirib ki, bu prosesə ayın əvvəlində başlanılıb və noyabrın sonuna kimi davam edəcək.
“Kiçik tutumlu avtobusları iri tutumlu avtobuslarla əvəz edirik. Bu ilin sonuna qədər paytaxt Bakıda ictimai nəqliyyatda fəaliyyət göstərən daha bir neçə avtobus marşrutu da ləğv ediləcək. Belə ki, ləğv olunan marşrutlar əsasən bir-birilərini təkrar edən marşrutlar olacaq. Bu barədə daha ətraflı məlumat isə ayın sonunda veriləcək”. Nəqliyyat nazirinin “əl gəzdirəcəyi” sahələrdən növbətisi isə gəmir və bərə nəqliyyatı olacaq. Bununla bağlı yap.org.az saytına geniş müsahibə verən Ziya Məmmədov aşağıdakıları bildirib: “Su nəqliyyatı sahəsində Xəzər Dəniz Gəmiçiliyinə məxsus gəmilərin və bərələrin müasir gəmilərlə əvəz edilməsi işləri davam etdirilib. Hazırda dövlət büdcəsi hesabına Xorvatiyada sifariş olunan 2 ədəd 54 vaqon tutumlu bərə ölkəyə gətirilir və yaxın günlərdə istismara veriləcək”.
Nazirin sözlərinə görə, Yeni Bakı Beynəlxalq Dəniz Ticarət Limanının tikintisi layihəsi çərçivəsində ərazinin tikintiyə hazırlanması və liman kompleksini birləşdirən yol infrastrukturunun tikintisi işləri davam etdirilir. Liman akvatoriyasında aparılan dib dərinləşdirmə işləri yekunlaşmaq üzrədir. Dəmir yolu nəqliyyatı sisteminin 2010-2014-cü illərdə inkişafına dair Dövlət Proqramında müəyyən olunmuş tədbirlərin icrası olaraq, Şərq-Qərb istiqamətində yol təsərrüfatının yenidən qurulması, enerji, rabitə-işarəvermə sisteminin tam dəyişdirilməsi, yeni lokomotiv və vaqonların alınması, mərkəzi dispetçer idarəetmə sisteminin yaradılması işləri hazırda 4 komponent üzrə mərhələlərlə davam etdirilir.
Nazirin bütün bu dəyişikliklərdən və islahatlardan milyonlarla manat »yeyəcəyini» deyən mənbəmiz artıq bu işlər üçün dövlət büdcəsindən maliyyənin ayrıldığını da bildirir. Ziya Məmmədovun nəzərdə tutulan iri həcmli layihələrdən hansı yollarla nə qədər qazanacağı ilə bağlı geniş araşdırma yazımız isə növbəti saylarımızda dərc olunacaq.
Məmməd