Kərəm Həsənov verdiyi şəhadətnamələrin müdafiəsinə nə vaxt qalxacaq?

gundemxeber.az Dövlət Əmlakının İdarə Edilməsi üzrə Dövlət Komitəsi (indiki Əmlak Məsələləri Dövlət Komitəsi) 2008-ci ildə hərrac keçirərək Masallı rayonunun Qəriblər kəndində yerləşən “Azərsutikinti” trestinə məxsus tikililəri və torpaq sahəsini Həşimov Qurban Məhəmməd oğluna satmış və müvafiq Şəhadətnamə vermişdir. 1998-ci ildə isə keçirilən torpaq islahatı zamanı Aqrar İslahat Komissiyası tərəfindən həmin ərazidə pay torpağı götürmüş payçılar Xətai rayon məhkəməsində Əmlak Məsələləri Dövlət Komitəsinə və vətəndaş Həşimov Qurban Məhəmməd oğluna qarşı iddia qaldırmışlar.
Diqqəti uzun sürən bir məhkəmə çəkişməsi çəkdi. Məhkəmənin əsas və maraqlı məğzi ondan ibarətdir ki, əsas cavabdeh tərəf öz işindədir, yəni nə məhkəmələrə gəlir, nə müdafiə olunur. Deyəsən, bu barədə heç düşünmək də istəmir. Hər halda işin gedişatından belə görünür.
30 noyabr 2011-ci il tarixdə Şəhadətnamənin ləğvi ilə bağlı çıxarılan qərarla razılaşmayan Qurban Həşimov Apellyasiya şikayəti vermişdir. 15 may 2012-ci il tarixdə işə baxan Bakı Apellyasiya Məhkəməsinin Mülki İşlər üzrə Kollegiyası ümumiyyətlə hərracın nəticələrini ləğv etmişdir. Yenə də qərarla razılaşmayan Həşimovun Kassasiya şikayəti əsasında işə baxan Ali Məhkəmənin Mülki Kollegiyası Bakı Apellyasiya Məhkəməsi Mülki İşlər Üzrə Kollegiyasının qərarını qüvvədə saxlamışdır.
Mübarizəsini daha yüksək instansiyalarda davam etdirməyə çalışan Qurban Həşimovu heyrətləndirən Əmlak Məsələləri Dövlət Komitəsinin süstlüyüdür.
Ortaya qəribə suallar çıxır; Əmlak Məsələləri Dövlət Komitəsi hərracı düzgün keçirib vətəndaşa qanuni Şəhadətnamə vermişdisə niyə həmin qanuni sənədi müdafiə etmir? Maraqlı məqam ondan ibarətdir ki, Komitə nə Apellyasiya, nə də Kassasiya şikayəti yazmayıb. Sadəcə Qurban Həşimovun məhkəmələrlə mübarizəsini kənardan izləyir.
Əlbəttə ki, belə məsələlər, bəlkə də çoxdur. Komitənin sədri Kərəm Həsənov onların hamısını yadda saxlaya bilməz. Buna bir insan kimi onun fiziki qüvvəsi yetməz. Onda bəs Komitənin hüquqşünası nə işlə məşğuldur?
Belə görünür ki, havayı maaş almaqla. Özü də “Kərəm Həsənov şəxsən tapşırmayınca mən heç bir işlə məşğul ola bilmərəm” sifarişini göndərib. Bərəkallah qanacağına. Bəlkə heç Komitə sədrinin başı ayırd olmayacaq, sənə göstəriş verilməyəcək? Sən öz vəzifə borclarını yerinə yetirməyəcəksən?
Havayı maaş almağa öyrədilmiş hüquqşünasdan daha hansı cavabı gözləmək olar?

Xəbər xidməti