“İdxalın həcmi ərzaq təhlükəsi yaradacaq həddi keçib”

Virtualaz.org “Mediaforum”a istinadən bildirir ki, kənd təsərrüfatı məsələləri üzrə ekspert Vahid Məhərrəmov deyib ki, son 10 ayın xarici ticarətinin gömrük statistikası Azərbaycana idxal olunan məhsulların ciddi artdığını göstərir: “Bu ilin on ayında idxal mallarının dəyəri keçən ilin müvafiq dövrünə nisbətən 15,83% artıb. Keçən ilin müvafiq dövründə ölkəyə 7,66 milyard ABŞ dolları dəyərində mal idxal olunubsa, bu il həmin göstərici 8,87 milyardı aşıb. Yeyinti məhsullarının idxalı da analoji dövrlə müqayisədə 15,87% artaraq ümumi idxalın 10,74%-ni təşkil edib”.

Ekspert bildirib ki, ixrac olunan malların çeşidlərinin sayı 1915 ədəd olduğu halda idxal olunan malların çeşidinin sayı bu göstəricidən 3 dəfə çox olaraq 5960 ədəd təşkil edib: “Bu isə o deməkdir ki, idxaldan asılılığımız daha geniş çeşidli mal və məhsullar üzrə artmaqda davam edir”.

Vahid Məhərrəmov deyib ki, cari ilin 10 ayını əhatə edən rəqəmlər ölkənin əsas kənd təsərrüfatı məhsullarına, ərzaq mallarına olan tələbatının idxaldan asılılığının sürətlə artdığını göstərir: “Artıq bir çox mal və məhsullar üzrə idxalın həcmi ərzaq təhlükəsi yaradacaq həddi keçib. Əsas ərzaq malları hesab olunan ərzaq buğdası, un, ət, süd, balıq, şəkər və digər məhsulların idxalı əvvəlki illərlə müqayisədə xeyli artıb. Buğda unu idxalı 12,6 dəfə, yəni 1269,89%, ərzaq buğdası idxalı 59,65%, kəsim üçün diri heyvanlar idxalı 48,96%, süd idxalı 30,03%, balıqlar və xərçəngkimilərin idxalı 23% çoxalıb”.