Nurçuların Azərbaycanda ən böyük nümayəndələrindən
hesab olunan Elnur Aslanov vəzifədən azad olundu

Türkiyədə artıq aylardır davam edən Ərdoğan və nurçuların lideri Fətulla Gülən arasında gedən soyuq müharibənin Azərbaycan siyasətində də bir çox təlatümlərə yol açacağı barəsində dediklərimiz yavaş-yavaş öz təsdiqini tapır. “Gündəm xəbər” qəzetinin ötən saylarında Azərbaycanda nurçularla əlaqələri olan, yüksək vəzifələrdə çalışan məmurlar barəsində silsilə yazılar dərc olunmuşdu. Ümumiyyətlə, müxtəlif dini təriqətlərlə bağlı olan məmurlarla bağlı aparılan müzakirələr son dövrlərdə gündəmin əsas mövzusu olaraq qalırdı. Xaricdən maliyyələşən və konkret siyasi maraqlar güdən təriqətlərə xidmət edən məmurların dövlətçilik baxımından hansı təhlükələr törədə biləcəyi barəsində qəzetimizdə kifayət qədər geniş araşdırmalar işıqlandırılıb. Artıq təriqətlərlə bağlılığı bildirilən məmurlara qarşı dövlət səviyyəsində mübarizəyə start verildiyini söyləmək olar. Ötən gün ölkə başçısının fərmanı ilə son dövrlərdə nurçularla əlaqəsi barəsində daha çox danışılan Prezident Administrasiyasının Siyasi Təhlil və İnformasiya Təminatı şöbəsinin müdiri Elnur Aslanov tutduğu vəzifədən kənarlaşdırıldı. Bu isə Türkiyədə seçkilərə günlər qaldığı bir zamanda artıq Azərbaycan iqtidarının nurçulara qarşı konkret hücuma keçdiyini göstərir.Prezident Administrasiyasında mühüm bir postun sahibi olan,eyni zamanda ölkə siyasətində xüsusi çəkiyə malik parlamentin insan hüquqları komitəsinin rəhbəri Rəbiyyət Aslanovanın oğlu Elnur Aslanovun ilk qurbanlardan biri olduğunu söyləmək olar. Elnur Aslanovun Fətulla Gülənin rəhbərlik etdiyi “Hizmət” hərəkatının-nurçuların Azərbaycanda əsas siması olduğu bildirilirdi.Onun ölkədə gənclər siyasətinə rəhbərlik etməsi, bu sahədə xüsusi nəzarət mexanizmi formalaşdırması isə nurçu məmurun hakimiyyət daxilində böyük iddialarından xəbər verirdi. Elnur Aslanovun təkcə gənclər sahəsinə deyil, Qeyri Hökumət Təşkilatları sektoruna da nəzarəti ələ keçirdiyi məlum idi. Bu sahədə onun ən yaxın kadrı “İrəli” İctimai Birliyinin rəhbəri,nurçuların Azərbaycanda digər bir mühüm fiquru hesab olunan Ceyhun Osmanlı hesab olununur. Elnur Aslanov hakimiyyətdəki mövqelərindən istifadə edərək böyük bir mediya şəbəkəsinə də sahiblik etməsi ilə bağlı məlumatlar dolaşırdı. Aslanovun nəzarətində olduğu məlumdur. Türkiyənin baş naziri Ərdoğanın nurçularla əlaqəsi olan məmurlarla bağlı Azərbaycan iqtidarını xəbərdar etməsi haqqında ölkə mediyasında kifayət qədər məlumatlar verilib. Onun Azərbaycan hakimiyyətindən konkret fəaliyyətə keçməyi, nurçu məmurların vəzifədən alınmasını istədiyi də söylənilir. Hesab etmək olar ki, Azərbaycan hakimiyyəti seçki öncəsi Ərdoğana jest edərək nurçuların Azərbaycanda ən böyük simasını vəzifədən göyürməklə anti nurçuluq kompaniyasına start verdiyini göstərir. Ölkənin gənclər siyasətinə nəzarət edən birinin nurçularla əlaqədə olması və onun görəvdən alınması sübut edir ki, hakimiyyət artıq konkret mövqe sərgiləməyə hazırlaşır. Nurçuların hakimiyyət daxilində kifayət qədər təşkilatlanması, əhəmiyyətli mövqelərə sahiblənməsi artıq ən üst səviyyədə narahatlıq doğurur. Parlamentin 24 üzvünün adının nurçularla əlaqədə hallandırılması isə bu təriqətin Azərbaycanda real gücə çevrildiyini göstərir. Son günlərdə Türkiyədə baş verən hadisələr, nurçuların Ərdoğan üçün əməlli-başlı problemə çevrilməsi Azərbaycan hakimiyyətini də hərəkətə keçməyə vadar edir. Elnur Aslanovun vəzifədən götürülməsi göstərir ki, artıq hakimiyyət konkret siyahıya malikdir və yaxın zamanlarda nurçularla əlaqəsi olan digər məmurlara qarşı da analoji addımlar atılacağı istisna olunmur. Hər halda bu addımı atmaqla hakimiyyətin digər məmurlara xəbərdarlıq etdiyini də söyləmək olar. Prezidentin “məmurlar heç bir xarici təsir altına düşməməlidir” xəbərdarlığından sonra konkret hərəkətə keçiləcəyi və xarici təriqətlərə xidmət edən məmurları cəzalandıracağı gözlənilirdi. Elnur Aslanovun vəzifədən alınması artıq prosesin başlandığını göstərir. Siyahıda növbəti “nur qurbanlarının” kimlər olacağını isə yaxın zamanlarda hər birimiz yəqin ki, görəcəyik.
NİCAT