Bu qanunlardan dövlət yetkililərinin xəbəri yoxdurmu?

Son günlər Azərbaycan siyasi aləmində geniş söz-söhbətə meydan açan “Nur” problemi artıq ilk qurbanlarını verib. Bir çox məmurların qaranlıq əməllərinin üzərinə həqiqət nuru düşən kimi çox mətləblər aydınlığa çıxdı. Məlum oldu ki, illərdir tutduğu vəzifə kürsüsünün səlahiyyətindən məst olan əksər məmurlar nəinki dövlət siyasətini yerinə yetirmir, əksər hallarda ona zidd addımlar belə atmaqdan çəkinmirlər.
Bir çoxları üçün rəhbərlik etdiyi sahə sanki şəxsi mülkiyyəti, özəl müəssisəsiymiş kimi fəaliyyət göstərərək gəlirli biznes sahəsinə çevrilib. Dövlətin milyonlarla pulunu mənimsəməklə iqtisadiyyatın mühüm sahələrində inhisarçıya çevrilən məmur oliqarxlar artıq dövlətin özü üçün əməlli-başlı problem yaradırlar. Üzdə sonsuz sədaqətdən danışan belələri əslində prezidentə, onun siyasi xəttinə ən böyük zərbə vuran qüvvələrdir. Şəxsi mənafeyi, biznesi üçün bütün qanunları tapdalayan, bunun üçün minlərlə sadə vətəndaşın hüquqlarını ayaqlar altına atan vəzifə sahibləri vətəndaş-dövlət qarşıdurmasına səbəb olur, siyasi sabitliyi pozurlar. Cəzasızlığın yaratdığı arxayınlıq, toxunulmazlıq ab-havası əksər məmurların gözünü elə pərdələyib ki, onlar üçün qanun, dövlət mənafeyi anlayışları tamamilə əhəmiyyətini itirib.
Sahib olduğu vəzifə kürsüsündə dövlətə belə “sədaqətlə” xidmət edən məmurlardan biri də “Bakıelektrikşəbəkə” ASC-nin sədri Baba Rzayevdir. Bakının sayrışan işıqlarının kölgəsində xüsusi idarəetmə sistemi formalaşdıran, paytaxtın enerji təchizatını illərdir bərbad vəziyyətə salmasına baxmayaraq, şəxsi biznesində böyük uğurlar qazanan B.Rzayevin müdhiş əməllərinin nəticələrini hər bir bakılı öz gündəlik həyatında hiss edir. Türkiyəli iş adamı Hüseyn Arabulun işığını söndürəndən sonra Bakının bütün işıqları əslində onun gəlir mənbəyinə çevrilərək “Bakıelektrikşəbəkə” şefinin adını ölkənin əsas biznesmen məmur oliqarxlarının siyahısına əlavə edib. Bir zamanlar çoxlarının diqqətini çəkməyən Dərnəgül yolunda yerləşən elektrik avadanlıqları satan mağazanın sahibi olan B.Rzayev keçmiş İqtisadi İnkişaf naziri Heydər Babayevin vasitəçiliyi ilə siyasi elitaya yaxınlaşmağa müvəffəq olur. Heydər Babayevlə birlikdə qısa müddətdə “Barmek”in sahibi Hüseyn Arabulu ölkədən didərgin salan “Bakıelektro” kiçik müəssisəsinin direktoru Baba Rzayev nəhayət ki, özünün ən böyük arzusuna çatır. 2006-cı ildə o, bütün Bakının enerji təchizatına rəhbərliyi ələ keçirməklə özünün “işıqlı planlarını” reallaşdırmağa başlayır. Artıq paytaxt çılçıraqlarını işıqlandıran enerjinin hər kilovatından yararlanan Rzayevin kiçik mağazası ölkənin ən böyük elekitrik avadanlıqları satan “Santral Elektrik” LTD şirkətinə çevrilərək “Bakıelektrikşəbəkə”nin bütün layihələrinin əvəzsiz icraçısına dönür. İnşasına böyük vəsaitlər sərf olunan dövlət əhəmiyyətli binaların böyük qismi məhz Baba Rzayevin “Santral Elektrik” LTD şirkətinin elektrik avadanlıqları ilə işıqlandırılır. Çünki, Bakıda bu şirkətdən alınmayan heç bir elektrik məhsulu “işləmir” . Təbii ki, “Bakıelektrikşəbəkə” ASC-nin rəhbərinin həyata keçirdiyi “işıqlı biznes” layihələri üçün tək “Santral Elektrik” LTD şirkəti kifayət etməzdi. Odur ki, Baba Rzayev bu şəbəkəni kifayət qədər genişləndirərək “Göknur Bakı” LTD, “GBS MMC” şirkətlərini də yaradaraq paytaxtın enerji bazarının şəriksiz liderlərinə çevirir. Evlərimizə işıq daşıyan elektrik kabellərini də bizə Baba müəllimin Zirə kəndində yerləşən Kabel zavodunun məhsulları “bəxş edir”. Energetika sahəsinə olan sonsuz sevgisi B.Rzayevə bu sahədə rəqib tanımağa imkan vermir. Bu səbəbdən də dəyəri milyonlarla ölçülən enerji layihələrinin hamısının “uğurlu” icrası məhz bu və adlarını çəkmədiyimiz digər şirkətlər tərəfindən həyata keçirilir.
Lakin, Baba Rzayevin müxtəlif tədbirlərdə “böyük uğurlar” kimi təqdim etdiyi fəaliyyətinin nəticələrinin ən canlı şahidləri elə paytaxtın sakinləridir. Bakının enerji təminatında illərdir davam edən problemlərin həlli sanki düyünə düşüb. “Bakıelektrikşəbəkə”yə hər il büdcədən milyonlarla manat vəsait ayrılmasına baxmayaraq, paytaxtın enerji təminatının böyük qismi hələ də sovetlər dönəmindən və “Barmek”dən qalma sistemin vasitəsilə təmin olunur. Əhaliyə verilən elektrik enerjisinin təminatında yaranan əsassız fasilələr isə paytaxt sakinlərinin gündəlik həyat tərzinə çevrilib. El arasında deyildiyi kimi işıq idarələrində hökm sürən rüşvətxorluq, süründürməçilik halları vətəndaşları cana yığıb. Adi bir məsələnin həlli üçün bu idarələrə müraciət edən sakinlər lazım olan məbləği, yəni idarə əməkdaşlarının təbirincə desək “hörməti” ödəməsələr aylarla süründürülür, get-gələ salınırlar. Lakin, şikayət etməli nə bir qurum var, nə də şikayətə baxan bir insaflı məmur. Hara getsən Baba Rzayevin kadrları vətəndaşların səsini yerindəcə boğur, işığını söndürürlər.
“Bakıelektrikşəbəkə”-nin belə qanunsuzluqlarından əziyyət çəkən Binəqədi rayonu Əcəmi Naxçıvani küçəsinin ( Ayna Sultanova heykəlinin yaxınlığı ) sakinləri də dərdlərini deməyə yer tapmırlar. Sakinlər bildirirlər ki, bir para əli kəlbətinli adamlar tərəfindən əsir-yesir vəziyyətinə düşüblər. Bu ərazidə enerji təminatında fasilələr adi haldır. Sutkanın istənilən vaxtında işığın sönməsinə öyrənən sakinlər illərdir ki, “Bakıelektrikşəbəkə”-nin borcundan qurtara bilmirlər. Sakinlər bildirirlər ki, heç bir xəbərdarlıq edilmədən borca görə işığımızı kəsirlər. Özü də bu “işıqkəsmə” əməliyyatını qəsdən ya səhər erkən, ya da axşam vaxtlarında edirlər ki, ikiqat əziyyət çəkək. Başqa bir vətəndaş isə bildirir ki, Binəqədi rayon İşıq idarəsinin əməkdaşları əksər vaxtlarda işığı kəsəndən sonra borc barəsində xəbərdarlıq edirlər. Onlar haradan bilir ki, mən borcumu ödəyəcəm ya yox? Bu küçədə yaşayanların əksəriyyətinin maddi durumu çətindir. Lakin, bütün bunları nəzərə almayan “Bakıelektrikşəbəkə” əməkdaşları sanki insanların işığını kəsməkdən zövq alırlar. Qayda-qanuna məhəl qoymadan, xəbərdarlıqsız işıqların kəsilməsi özbaşnalıqdan başqa nə ola bilər?
Maraqlıdır, məgər Baba Rzayev və Binəqədi rayon İşıq idarəsinin rəhbəri Azad Mustafayev mövcud qanunvericilikdən xəbərsizdirmi? Axı onlar da çox gözəl bilir ki, abonentin borcu yarandığı halda ilk öncə xəbərdarlıq olunmalı, minimum 15 gün keçdikdən sonra isə müvafiq akt tərtib etməklə tədbir görmək mümkündür. Amma, nədənsə Baba müəllimin və Azad Mustafayevin kadrları daha çox insanları qaranlıqda qoymağı üstün tuturlar. Vətəndaşları incitmək, onların hüquqlarını tapdalamaq bu şəxslər üçün gündəlik həyat tərzidir. “Bakıelektrikşəbəkə” üçün insan amili, vətəndaş faktoru mövcud deyil, sadəcə daha çox qazanc əldə etmək əsasdır. Prezident dəfələrlə məmurlara xəbərdarlıq edib ki, vətəndaşları incitmək, onların problemlərinin həllinə biganəlik göstərmək olmaz. Ancaq, özünü prezidentə sədaqətli məmurlar kimi qələmə verən Baba Rzayev və tabeliyində olanlar daha çox insanlara əlavə problemlər yaratmaqdan, onları incik salmaqdan, işıqlarını kəsməkdən sanki həzz alırlar. Budurmu dövlət başçısına sədaqət, onun əmr və sərəncamlarına göstərilən münasibət? Bəlkə, B.Rzayev öz əməkdaşları vasitəsilə insanları qəsdən dövlətdən narazı salır, etirazlara sövq edir. Hər halda lazımi dairələr “Bakıelektrikşəbəkə”-nin fəaliyyətini dərindən araşdırsalar yəqin ki, bu suallara ətraflı cavab tapa bilərlər.
Amma, elə bilməyin ki, “Bakıelektrikşəbəkə”-nin əməkdaşları təkcə işıq kəsmək sahəsində ixtisaslaşıblar. Əsla. Onların həm də özünəməxsus işıqvermə metodları var ki, bu barədə danışmamaq günah olardı. Hansısa bir vətəndaş baş verən qanunsuzluqlardan təngə gəlib etiraz səsini ucaltsa, ona xüsusi təklif edilir. Belə ki, Azad Mustafayevə və yaxud istismar sahəsinin rəisi Ramiz müəllimə şikayət edən qanunlardan xəbərdar olan, öz haqqını qorumağı bacaran vətəndaşlara idarə tərəfindən alernativ variant göstərilir. “Gəl sənə ayrıca işıq xətti çəkək, sənin işıq problemin olmasın. Ancaq bir şərtlə ki, ətrafda yaşayan qaçqınların bundan xəbəri olmamalıdır.” Bax, bu Baba Rzayevin yaratdığı idarəetmə metodunun “parlaq” nəticələrindən biridir. Vətəndaşlar arasında ayrı-seçkilik salmaq, müxtəlif vasitələrlə onları susdurmaqla öz əməllərini davam etdirmək bu idarəetmə üsulunun əsas prinsipidir. Təbiidir ki, vicdanlı, vətənpərvər sakinlər bu ayrıseçkiliklə razılaşmayaraq belə çirkin təklifdən imtina edirlər. Bu əməkdaşlara insanları qaçqınlara, köçkünlərə, ağlara, qaralara bölmək ixtiyarını kim verib, cənab Baba Rzayev?
Bəlkə bu da sizin yeni metodunuzdur, kimsənin xəbəri yoxdur? İşıq kəsmək, adamları soyuq ocağa möhtac etmək günahdır. Bəs hər ay min manatlarla işıq yandırıb pulunu ödəməyən vəzifə sahiblərinin işıqlarını nə əcəb kəsmirsiniz? Bəlkə onların xüsusi elektrik stansiyaları , yaxud toxunulmazlıq statusları var? Görəsən xüsusi şirkətləriniz sərf etdikləri elektrik enerjisinin pulunu son qəpiyinə qədər ödəyir, bircə pul verməyən elə sadə vətəndaşlardır? Suallar sadədir, ancaq cavab vermək bir az çətin olacaq. Əslində bu cavabları hamı bilir, fəqət illərdir ki, müxtəlif vasitələrlə siz bu suallardan məharətlə yayınırsınız.
Ölkədə baş verən son proseslər sübut edir ki, nəinki məmurlar, onların yaxın ətrafları belə qanunlara məhəl qoymur, hər şeyi şəxsi mənafeləri naminə istifadə edirlər. Bir çoxlarının qaranlıq əməllərinə “nur” düşəndən sonra çox mətləblər üzə çıxmağa başlayıb. Bakımıza, evlərimizə nur paylayan bir şirkətin də öz fəaliyyətinə işıq salınması vaxtı çoxdan çatıb. İşığımızı kəsənlərə işıq yandıranlar bu barədə düşünsələr yaxşı olardı.
NİCAT