Nəqliyyat nazirinin nəzarətindəki bir sıra strukturlar ləğv olunur, onun iqtisadi cəhətdən çökdürülməsinə başlanılıb

“Gündəm-Xəbər”ə daxil olan məlumatlara görə nəqliyyat naziri Ziya Məmmədova qarşı yeni hücum kampaniyasına start verilib və bu dəfə hədəfdə onun biznes strukturlarıdır. Bununla bağlı qəzetimizi məlumatlandıran mənbənin sözlərinə görə, belə bir planın işə salınması heç də o anlama gəlməməlidir ki, hakimiyyət Ziya Məmədovla yollarını ayırmaq niyyətindədir. Mənbəmizin sözlərinə görə, nəqliyyat nazirinə qarşı aparılan kampaniyanın yeganə məqsədi Ziya Məmmədovu iqtisadi cəhətdən bir qədər zəiflətmək və bununla da onun hakimiyyət daxilindəki gücünə zərbə vurmaqdır.
Bunu digər informasiyalar da təsdiqləyir. Belə ki, bir neçə ay bundan öncə müstəqil mətbuatda belə bir məlumatlar dolaşırdı ki, Ziya Məmmədov onu gözləyən təhlükəni önləmək məqsədilə yaxınlarının adına olan bznes subyektlərini başqa adlara keçirir. Eyni zamanda xatırladaq ki, bu ilin yayında Vergilər Nazirlyindəki mənbəmiz müxtəlif dövlət strukturlarına qeyri-rəsmi olaraq Ziya Məmmədova aid şirkətlərin, firmaların, müəssisələrin siyahısını, onların kapital dəyərini, illik real gəlirlərini, eləcə də nazirin nəzarətindəki sahələrdən əldə olunan gəlirin həcmini hazırlamaq tapşırıldığına dair məlumat vermişdi.
Bu istiqamətdə araşdırmaların aparılmasının səbəbi və yekunları barədə hələlik yeni bir məlumat əldə edə bilməmişik. Ancaq maraqlıdır ki, həmin yoxlamalar başladıqdan sonra Ziya Məmmədova aid bəzi şirkətləri başqa adlara keçirdiyi, əmlakını kapitala çevirmək istiqamətində çalışmalara başladığına dair məlumatlar yayıldı.
Məsələnin ən maraqlı tərəfi isə odur ki, Ziya Məmmədov yaxınlarına aid ən gəlirli şirkət və müəssisələri başqasına deyil, uzun illərdir biznes şəriki və dostu kimi tanınan “Hafka” ləqəbli Hafiz Məmmədovun adına keçirir. Bu fakt isə Ziya Məmmədovun nədən belə bir addım atmasının səbəbi ilə bağlı fikir yürütməyi bir qədər də çətinləşdirir. Ancaq ehtimallar var.
Birincisi, ola bilsin 2013-cü il seçkisindən əvvəl və ya sonra «vurulacağını» bilərək, postunu itirdikdən sonra biznes strukturlarını əlində saxlamaq üçün onları etibar etdiyi iş adamı Hafiz Məmmədovun adına keçirir. Ancaq Azərbaycan reallığında «vurulan» nazirlə yanaşı qohumlarına və yaxın iş adamlarına da «toy tutulduğu» Fərhad Əliyevin və digələrinin aqibətindən məlumdur. Belədə ikinci ehtimal ortaya çıxır ki, Hafiz Məmmədov Ziya Məmmədovun biznes şəriki və dostu olsa da, «yuxarılara» daha yaxındır, ona etibar edirlər. Ona görə də biznes strukturlarının və nəzarət etdiyi sahələrin Ziya Məmmədovun əlindən alındığını nümayişkaranə şəkildə göstərməmək üçün onları bir başqasının deyil, məhz biznes şəriki və dostu Hafiz Məmmədovun adına keçirmək tələbi qoyulub.
Bununla bağlı qəzetimizi məlumatlandıran mənbə Ziya Məmmədovun indiyədək hansı biznes subyektlərini Hafiz Məmmədovun adına keçirdiyi haqda məlumat verib. Bunlardan ən böyüyü dəmir yolunda əsas gəlir mənbəyi olan yükdaşımalarla bağlı maliyyə əməliyyatlarını həyata keçirən, daha dəqiqi bu sahədən pulları yığan «Transoil» MMC-dir. Qeyd edək ki, 2007-ci ilən sonra dəmir yolu nəqliyyatı ilə yükdaşımalardan (daxili və beynəlxalq) gələn vəsaitəri toplayan «Transoil» MMC son vaxtlara qədər cənab Məmmədovun qohumunun adında olub. 100 faiz gəlirlə işləyən bu şirkətin illik gəliri 100 milyonlarla manatla ölçülür.
Təxminən 4 ay öncə belə bir gəlirli şirkəti Ziya Məmmədov Hafiz Məmmədovun «Baglan Group» şirkətinin tərkibinə qatıb.
Bundan az sonra isə Ziya Məmmədov ona məxsus olduğu şübhə doğurmayan «Bank of Azərbaycan»dakı payını da «Hafka»nın adına keçirib. Bundan əlavə Ziya Məmmədov yaxınlarının adına olan nəqliyyat və tikinti sektorunda fəaliyyət göstərən bəzi müəssələri, firmaları, MMC-ləri də Hafiz Məmmədovun «Baglan Group FZCO» Holdinqinə birləşdirib. Prosesin isə bundan sonra da davam edəcəyi gözlənilir. Belə ki, Nəqliyyat Nazirliyindəki etibarlı mənbədən redaksiyamıza daxil olan məlumata görə, yaxın bir-neçə gündə «Bakı Sərnişin Nəqliyyatı» MMC ləğv edilərək, onun bir sıra funksiyaları Hafiz Məmmədovun «Baglan Group FZCO» Holdinqinə veriləcək. Bununla bağlı «Baglan Group FZCO» Holdinqin tərkibində hansısa şirkətin yaradılacağı bildirilir. Artıq bununla bağlı qərar verilib.
Mənbənin sözlərinə görə, «Bakı Sərnişin Nəqliyyatı» MMC ilə yanaşı iri şəhər və rayonlarda ictimai nəqliyyatın (avtobus nəqliyyatının) idarə edilməsi üçün yaradılan MMC-lər (7-8 belə MMC olduğu bildirilir) də ləğv olunur. Əvəzində nəqliyyat sektorunun idarə edilməsi prezident İlham Əliyevin hələ 20 iyul 2011-ci il tarixli fərmanı ilə yaradılan Nəqliyyat Nazirliyinin tərkibində Dövlət Avtomobil Nəqliyyatı Xidmətinin sərəncamına veriləcək. Xidmət bundan ictimai nəqliyyata nəzarət, xətlərə nişan vermək, vergiləri yığmaq, bir sözlə tənzimləyici funksiyanı həyata keçirəcək. Dövlət Avtomobil Nəqliyyatı Xidmətinin iri şəhər və rayonlarda da şöbələri fəaliyyət göstərəcək.
«Baglan Group FZCO» Holdinq isə ictimai nəqliyyatda, daha dəqiqi marşrut biznesində əsas «gəlir mənbəyi» hesab olunan fəaliyyətləri kurasiya edəcək. Belə ki, marşrutlara lisenziya vermək, onların xəttlərini müəyyənləşdirmək, eləcə də aylıq rəsmi və «qeyri-rəsmi» haqları yığmaq «Baglan Group FZCO» Holdinqin ixtiyarına veriləcək. Qeyd edək ki, bu sahələrdən yığılan aylıq vəsaitin miqdarı milyonlarla manatla ölçülür.
Nəqliyyat sektorunun isə tamamilə bir əldə cəmləşməsi prosesinə start veriləcək. Belə ki, mənbənin sözlərinə görə, şəhər nəqliyyatının idarə olunasında Nəqliyyat Nzirliyinə köməklik göstərən Koreya şirkəti yola salınıb. Onların əvəzində bu iş Türkiyəli mütəxəsislərə tapşırılıb. Mənbənin sözlərinə görə, məhz onların tövsiyyəsi əsasında marşrut sahiblərinin gündəlik gəlirlərini müəyyənləşdirmək məqsədilə avtobusların qapılarına metrodakı kimi kartla işləyən xüsusi aparatlar quraşdırılacaq. Hansı ki, aparat avtobusdan düşmək istəyən sərnişinlərin kart göstərməsini tələb edəcək. İlkin dövrlərdə kartı olmayan sərnişinlər avtobus sürücüərinə veriləcək kartlardan istifadə edəcəklər. Bunun müqabilində yığılacaq vəsait də «Baglan Group FZCO» Holdinq tərkibində şəhər nəqiyyatını idarə edəcək şirkətə ödəniləcək.
Mənbənin sözlərinə görə, kart sisteminin tətbiq olunması şəhər nəqliyyatından əldə olunan gəlirin bir mərkəzdə yığılmasına və ordan bölüşdürülməsinə imkan verəcək. Belə ki, vəsait bir qədər əvvəl «Baglan Group FZCO» Holdinqin sahibi Hafiz Məmmədovun nəzarətinə keçən «Bank of Azərbaycan»a toplanacaq. Burda vergilər və digər «ödəmələr» çıxıldıqdan sonra yerdə qalan vəsaitdən sahibkarlar istifadə edə biləcək.
Mənbənin daha bir maraqlı məlumatı hazırda şəhər nəqliyyatının idarə olunmasında əsas söz sahibi olan Ziya Məmmədovun qohumlarının bu sahədən uzaqlaşdırılacağı haqdadır. Qeyd edək ki, hazırda «Bakı Sərnişin Nəqliyyatı» MMC-nin sədri Rövşən Məmmədov Ziya Məmmədovun qardaşı oğludur. Onun müavini isə Ziya Məmmədovun doğma bacısı oğlu Davud Əfəndizadədir. Onların şəhər nəqliyatının fəaliyyətini iflic vəziyyətə gətirdiyi üçün bu sahədən uzaqlaşdırılacağı gözlənilir.
Bütün bunlar isə onu düşünməyə əsas verir ki, artıq nəqliyyat naziri Ziya Məmmədova qarşı iqtisadi müharibə başlayıb. Bu iqtisadi savaşın nəylə nəticələnəcəyini bilmək üçün isə uzun zamana ehtiyac duyulmayacaq.
Orxan