Elşad İsgəndərovun daxili intriqalarda uduzması məxfi əməliyyatlarını de-şifrə edib, sabiq komitə sədri
heç də nurçu qalmaqalının qurbanı olmayıb; şiə təriqətli məmurun istefasının müdhiş təfərrüatları...

Son bir ayda “Gündəm xəbər”in adı nurçuluqda hallanan məmurlar barədə proqnozları doğrulmaqdadır. Qəzetin analitik şöbəsinin hakimiyyətdəki nurçu məmurların niyə vəzifədən azad olunmalarını araşdırmasından çıxan nəticələr belə deməyə əsas verir ki, proses davam edəcək.
Kompaniyanın “günah keçi”si
Belə ki, Fətullah Gülən hərəkatına yaxın məmurların işdən qovulması kütləvi xarakter alacağı şübhə doğurmur. Ehtimallar və gedişat göstərir ki, hakimiyyət saraya daxilindəki nurçu təriqətinə mənsub üzvlərini təmizləməyi qəti şəkildə seçim edib.
Əvvəl gündən “Gündəm xəbər” Elşad İsgəndərovun da yola salınacağını yazırdı və son məqalədə qeyd olunurdu ki, komitə rəhbəri əslində bu qruplaşmaya daxil olmayıb. Sadəcə, yazdıqlarımız kimi köhnə qvardiya gənc məmurları komandadan uzaqlaşdırmaq xəttini tutub.
Bəli, Dini Qurumlarla İş üzrə Dövlət Komitəsinin sədri Elşad İsgəndərovun vəzifəsindən azad olunması cəmiyyətdə böyük şok effekti, ajiotaj yaratmadı. Hamı sanki, bu belə də olmalı imiş kimi prezidentin sərəncamını normal qarşıladı.
Hətta bu qərardan lap qabaqdan xəbərdar olanlar da var idi ki, onlar mətbuata bu səhih informasiyanı sızdırmışdı. E.İsgəndərov nur təriqətinə aid məmur olmasa da, onu bu kompaniyada “günah keçi”si kimi qurban verdilər.
Elnur Aslanov, Ceyhun Osmanlı və Fərhad Məmmədovdan sonra Elşad İsgəndərov qara siyahıya salındı. Komitə rəhbərinin kitabı çoxdan bağlanmışdı və hətta iqtidarın daxilindəki ikinci ən qüdrətli klanın üzvü olması da onu xilas edə bilmədi.
Elnur Aslanovun yaxın dostu olan Elşad İsgəndərov xeyli qabaqdan Ərdoğanın “vurulması”nı istədiyi məmurlardan biri kimi xarakterizə edilirdi. Lakin prezident İlham Əliyevin E.İsgəndərovu tutduğu vəzifədən azad etməsində başqa faktorların da olduğu iddia edilir.
Şiə məmurun ilginc planı
Əvvəla qeyd etmək lazımdır ki, E.İsgəndərov nurçu olmayıb. Bu, səhih xəbəri hələ lap qabaqdan yazmışıq. Əksinə, sabiq komitə rəhbəri ənənəvi şiə təriqətinə yaxın adam olub. Onun təyinatı zamanı da bu məsələ nəzərə alınıb.
Onun bioqrafiyası araşdırılıb, kimliyi, hansı qruplara bağlılığı öyrənilib, sonra təyinat alıb. Bu halda belə bir şəxsin nurçu olduğu üzə çıxması nonsens görünür. Mənbə qeyd edir ki, köhnə qvardiyanın hədəfində olması bu kompaniyada onun “vurulması” ilə nəticələndi.
Mənbədən verilən xəbərə görə, Elşad İsgəndərov Azərbaycan üçün çox riskli planlar üzərində işləyib. İran və Səudiyyə Ərəbistanının xüsusi xidmət orqanlarının başçıları ilə apardığı dialoqlarla sabiq komitə sədri bir tərəfdən ərəb şiəliyini Azərbaycana gətirmək, digər tərəfdən də buna qarşı çıxacaq farsları razı salmaq üçün vəhhabi kompaniyası yaratmaq niyyətində olub.
Özünün şiə təriqətinə yaxınlığı bu projenin icrasını asanlaşdırıb. Hakimiyyətin təbii ki, razılığını almadan bu layihədə yer almaq təhlükəli olardı. Lakin əks qruplar plandan agah olublar və İsgəndərov barəsində kompromatlar toplayıb, dosye şəklində prezidentin masasına ötürüblər.
Mənbənin iddialarına görə, Elşad İsgəndərovun başqa bir fiaskosu şiə liderləri ələ almaq məramı olub. Belə ki, nüfuzlu din adamlarını öz ətrafına çəkmək istəyən sabiq sədr bunun üçün dövlətin “kisəsinin ağzını açıb”.
O, bu proyekti təsdiq etdirmək istəyərkən, guya birilərinə ev, maşın verməklə onları dövlətin yanına çəkəcəyini bildirib. Lakin dövlətin pulu havaya sovrulsa da, nəzərdə tutulan din adamlarından heç birindən istənilən nəticəni ala bilməyiblər. Əksinə, həmin güclənən din adamları daha da təhlükəli xarakter almağa başlayıblar.
Şeyxə qarşı piar?
Son olaraq o da vurğulanır ki, bir müddət öncə QMİ sədri Allahşükür Paşazadə əleyhinə yayılan xəbərlərin də qaynağının sabiq sədr olduğu üzə çıxıb. Belə ki, həmin məlumatların Səudiyyə Ərəbistanının sabiq kəşfiyyat naziri Bəndər ibn Abdulaziz tərəfindən İsgəndərova verildiyi və onun mediaya ötürdüyü ehtimal olunur.
Amma bütün bu versiyalar bir məsələyə diqqət çəkir. İsgəndərov heç də nurçu qalmaqalına görə işdən azad olunmayıb. Məhz daxildə gedən proseslərdə verdiyi xətalar onun müqəddəratını həll edib. Bu çəkişmələrin və intriqaların bazisində komitə rəhbərinin planları de-şifrə olunub, nurçu qalmaqalı ilə eyni vaxta təsadüf edib, onun məxfi planlarının ictimailəşdirilməsi tövsiyə olunmayıb, qərara alınıb ki, elə nurçu söhbəti gündəmdə ikən onu da bu kompaniyada yola salaq. Üfüqün görünən tərəfi budur ki, Şeyxlə qarşıdurmada gənc məmur səriştəsiz davranıb, təcrübəsinə yenilib.
Belə olmasaydı, onu himayə edən qüvvələr tezliklə, və asanlıqla arxasından çəkilməzdilər. Hər halda prezidentə ən operativ çatan və ünsiyyət quran qüvvələr döyüş səhnəsindən qalib ayrılıb.
Artıq Elşad İsgəndərovun vəzifədən azad edilməsi ilə bağlı sərəncamı Türkiyə mətbuatının gündəmini zəbt edib. Türkiyə mediası E.İsgəndərovun işdən azad edilməsinin adının nurçuluqda hallanması ilə əlaqələndirib. Qeyd olunur ki, İsgəndərov Dini Qurumlarla İş üzrə Dövlət Komitəsinin sədrliyinə 31 may 2012-ci ildə gətirilmişdi.
Hacı Qamətin müavinini niyə tutdular?
İndi ən çox müzakirə olunan və maraqla gözlənilən onun yerinə kimin gətiriləcəyi xəbəridir. Onun əleyhinə nə qədər yazılar yazılsa da, işdən bu qədər tezliklə çıxarılacağını da çoxları gözləmirdi. Sadəcə QMİ ilə birgə çap etdirdikləri vəhhabilik cərəyanı kitabı qaranlıq mətləblərdən xəbər verir.
Niyə ilin-günün bu vaxtında vəhhabilik kitabını çap etsinlər ki? Dini Məsələlərlə İş üzrə Dövlət Komitəsi müəyyən məzhəblərlə yaxınlığını hiss etdirməli deyildi. Əksinə, bütün camaatı qucaqlayan, bir qurum və rəhbər olmalı idi.
Belə bir vaxtda isə “Əbu - Bəkr” məscidinin imamı Qamət Süleymanovun müavini Adil Rəcəbov polis tərəfindən saxlanılıb. A. Rəcəbovun Zaqatala rayonunun Muxax kəndində yerləşən mənzilində əməliyyat aparılıb. Əməliyyat nəticəsində A.Rəcəbov saxlanılıb.
Zaqatala rayon Polis Şöbəsindən A. Rəcəbovun saxlanılması təsdiqlənib. Vəhhabilərlə projenin ifşa olunması və ardınca istefaya göndərilməsi kontekstində, E.İsgəndərov olayında Hacı Qamətin adamının tutulması maraq doğurur.
Hər halda çox qəribə hadisələr cərəyan edir. Hakimiyyət iki qeyri-ənənəvi dini təriqətlərə qarşı müharibə elan edib. Hər iki səngərdə döyüşən hüquq-mühafizə orqanları və siyasi hakimiyyət qısa müddətdə vəhhabi, nurçu olan kim varsa təmizləmək istəyirlər. Amma bu çox ağır fəsadlar verə bilər. Gərgin və mürəkkəb vəziyyətdə odla oynayan iqtidar çox çətin bir prosesin içərisinə girib.
Bəzi məlumatlara görə, Dini Qurumlarla İş üzrə Dövlət Komitəsinin (DQİDK) sədrliyinə Səyyad Aran gətirilir. Adıçəkilən şəxs özü isə bu məlumatı nə təsdiq, nə də təkzib edib. Elşad İsgəndərov 21 may 1972-ci ildə Bakı şəhərində anadan olub. 2002-2004-cü illərdə ABŞ-ın Kolumbiya Universitetində “Beynəlxalq Münasibətlər” ixtisası üzrə magistratura təhsili alıb.
2000-2005-ci illərdə Azərbaycanın BMT-dəki Daimi Nümayəndəliyinin I katibi vəzifəsində çalışıb. Ailəlidir, 3 övladı - Hüseyn və Əli adlı oğlu, Leyla adlı qızı var. Bir nüansı demək yerinə düşər ki, övladlarının adları belə onun nurçu yox, şiə olduğuna bir işarədir.
Hər halda bu bir simvolik yanaşmadır. Sabiq komitə sədri bildirib ki, cənab prezidentin qərarları müzakirə olunmur, icra olunur: “Sadəcə onu qeyd edə bilərəm ki, hansı vəzifədə olmuşamsa həmişə Prezident İlham Əliyevin siyasi kursunun əsgəri olmuşam və olacağam da. Və bu kursa əlimdə olan bütün imkanlarla xidmət edəcəyəm”.
Rafiq Qara