Vitse-admiral məhkəmədə sensasion çıxışa hazırlaşır,
sabiq komandan onu həbsə atan qüvvələrlə kəllə-kəlləyə gələ bilər

Həbsdəki sabiq vitse-admiral Şahin Sultanov fəallaşıb. Sabiq komandan azadlığa buraxılması üçün həmləsini edib. Ş.Sultanov maxinasiya əməliyyatlarında iştirakı olmadığını deməklə daha yuxarı ranqlı ordu rəhbərliyinə eyham vurub.
Vitse-admiral demək istəyib ki, korrupsiya faktlarının daha geniş arealı var və gedin o şəxsləri həbs edib. Son günlər onun vəkili Adəm Məmmədovun da fəallığı göz qabağındadır. Vəkil mətbuat konfransı keçirir, qəzetlərə məktublar göndərir və Sultanovu xilas üçün hərəkətdədir.
Hərbi Dəniz Qüvvələrindəki etibarlı mənbədən “Gündəm-xəbər”ə verilən məlumata görə, Ş.Sultanov onu həbs etdirənlərin adlarını açıqlamaq və açıq mübarizəyə başlamaq hədəfini seçib. Hərbçi ailələrinə təzminat verilməsində mənimsəmə faktlarının olmasından danışmağa hazırlaşan vitse-admiral sensasion adlar açıqlayacaq.
Mənbənin qeydlərinə görə, Sultanov bu işdə rolu olan və onu “günah keçisi” kimi qabağa verən məmurların adlarını açıqlaya bilər ki, bu da işin bütün dərinliklərinə qədər aydınlaşmasına gətirib çıxaracaq.
Sabiq komandan azadlığa buraxılması üçün bu səviyyədə aktiv fəaliyyətə keçib, vəkili və ətrafı vasitəsi ilə güc nümayiş etdirməyə çalışır, böyük pullar xərcləmək fikrindədir, təki həbsdən çıxa bilsin.
Mənbə iddia edir ki, Şahin Sultanov Səfər Əbiyevə görə həbsə atıldığı qənaətindədir. Amma aləm qarışmasın deyə sabiq müdafiə nazirinin adını çəkmək istəmir.
Ş.Sultanovu onu həbsə salan qüvvələrlə kəllə-kəlləyə gəlmək niyyətindədir. Ancaq bunun yekunda kimin xeyrinə olacağını proqnozlaşdırmaq çətindir. İşin bilinən tərəfi budur ki, vitse-admiralın çabaları uğursuzdur, onun azadlığa buraxılması inandırıcı görünmür. Əvvəla ölkə rəhbərliyi səviyyəsində baş tutan bir hadisədir, ikincisi dövlət vəsaitini mənimsəməkdə günahlandırılır.
Bu arada isə çox maraqlı bir detal diqqətdən yayınıb. Müdafiə Nazirliyi orduda yayılan rüşvətxorluq iddiaları ilə bağlı açıqlama verib. Nazirliyin mətbuat xidmətindən bildiriblər ki, orduda rüşvətxorluq meylləri müəyyən edilməyib.
Həmçinin orduda yüksək rütbəli zabitlər arasında rüşvətxorluq meyllərinin yaranmasının qarşısını almaq üçün Müdafiə Nazirliyi tərəfindən həyata keçirilən tədbirlərə də aydınlıq gətiriblər.
Halbuki, nazirliyin bu açıqlaması baş verənlərə daban-dabana ziddir. Kor-kor, gör-gör ki, Səfər Əbiyevin ətrafındakı kadrları, zabitlər korrupsiya faktları, büdcə vəsaitlərini mənimsəmə ittihamları ilə həbsə atılır.
Qeyd edək ki, Azərbaycan Müdafiə Nazirliyi Hərbi Dəniz Qüvvələrinin (HDQ) sabiq komandanı, vitse-admiral Şahin Sultanov 23 aprel 2014-cü ildə həbs edilib. Bakı Hərbi Məhkəməsi onun barəsində 3 ay müddətinə həbs-qətimkan tədbiri seçib.
Xatırladaq ki, Ş. Sultanov Cinayət Məcəlləsinin 313-cü (vəzifə saxtakarlığı) və 179.3.2-cü (mənimsəmə - külli miqdarda törədildikdə) maddələri ilə təqsirləndirilən şəxs qismində cəlb edilməklə barəsində 3 ay müddətinə həbs-qətimkan tədbiri seçilib.
Rafiq Qara