Bəybala Əbil:
"Ukraynada cərəyan edən hadisələr Rusiyanın xeyrinə və onun maraqlarına
uyğun istiqamət alacaqsa, növbəti bu kimi addımlar Azərbaycanda da atıla bilər"

Gülağa Aslanlı:
"Azərbaycan hökuməti AB-yə daxil olduqdan sonra Ukraynanın çoxsaylı problemlərini həll etdiyini
görəcək və beləcə proses ölkəmizdə də müsbət dəyişikliklərin olmasına gətirib çıxaracaq"

Ukraynada vəziyyət günü-gündən daha kritik xarakter almaqdadır. Bu ölkənin Şərq vilayətlərində, Donetsk və Luqanskda separatçı qüvvələrin müstəqillik istiqamətində mayın 11-də keçirdikləri referendumdan sonra durumun daha da ağırlaşacağı labüddür. Eyni zamanda, gözləniləndir ki, güc strukturları yenidən hərbi əməliyyatların aktiv fazasına keçsin. Artıq vəziyyət bu cür də davam edir. Lakin hər şey referendumdan sonra Moskvanın tutacağı mövqedən də asılı olacaq. Bir sözlə, artıq Ukrayna Krımın ardınca daha bir ağır və çətin sınaq qarşısında qalıb. Görəsən, referendumdan sonra Ukraynada vəziyyət hansı istiqamətdə cərəyan edəcək? Krım olayından fərqli olaraq bu dəfə Moskvanın prosesə birbaşa müdaxiləsindən sonra Ukrayna ilə Rusiya arasında müharibə başlaya bilərmi? Baş vermiş bu olayın, Rusiyanın imperiyasayağı fəaliyyətinin Azərbaycana da təsiri ola bilərmi?
KXCP Ali Məclisinin sədri Bəybala Əbil düşünmür ki, Ukraynada cərəyan edən hadisələr bu ölkə ilə Rusiya arasınsa açıq hərbi toqquşmaya gətirib çıxaracaq: "Ukraynada hazırda cərəyan edən hadisələr, keçmiş SSRİ məkanı, Avropa və Asiyaya, bütövlükdə dünyaya təsir göstərə biləcək bir hadisədir. İkinci mərhələsinə isə indi start verilib. Hazırda Rusiya imperiyasının yaşamasının şərtləri Ukraynadan asılıdır. Bu mübarizədə Avropa Birliyi, Amerika, bütün dünya Ukraynanın yanında olmalıdır. Amma sözdə deyil, əməldə. Son hadisələrdən sonra Ukrayna ilə Rusiya arasında açıq müharibənin başlaya biləcəyi ehtimalını qəbul etmirəm. Avropa ölkələri və ABŞ-ın müqaviməti fonunda çətin ki, Rusiya açıq şəkildə separatçılara qarşı mübarizə aparan mərkəzi Ukrayna hakimiyyətinə qarşı müharibəyə getsin. Digər tərəfdən, Qərb də Rusiya ilə müharibə aparmaq səviyyəsində deyil, buna baxmayaraq NATO öz hazırlıq işlərini aparır. Hesab edirəm ki, Rusiya ilə müharibəyə cəlb olunmaq dünyaya sərf etməz. Hələlik fakt odur ki, Qərb Rusiyaya qarşı heç də bütün imkanlardan istifadə etmir. Bütün imkanlardan, xüsusən də ciddi iqtisadi sanksiyalardan istifadə olunsa, yaxın gələcəyə, 1-2 ilə Rusiyanı diz çökdürmək mümkündür. Ona qarşı mübarizənin ən optimal yolu da məhz budur. Rusiya bildiyimiz kimi, nüvə silahına malik əxlaqi dəyərlərdən uzaq olan bir imperiyadır. Belə bir imperiya ilə müharibə aparmaq çətin məsələdir. Qərb də buna gedən deyil». Sözügedən hadisənin Azərbaycana təsirinə gəldikdə, həmsöhbətimiz bu qənaətdədir ki, onun nəinki ölkəmizə, ümumiyyətlə postsovet məkanına ciddi təsirləri ola bilər: "Ukraynada cərəyan edən hadisələr Rusiyanın xeyrinə və onun maraqlarına uyğun istiqamət alacaqsa, növbəti bu kimi addımlar Azərbaycanda da atıla bilər. Azərbaycan da ağır və çətin vəziyyətdədir. Azərbaycanın Rusiya tərəfindən əsas narahatlığı işğal olunmuş torpaqlarımızla bağlıdır. Ermənistan burada heç bir rol oynamır, o Rusiyanın bir əyaləti kimi fəaliyyət göstərir. Azərbaycan hakimiyyəti sözün həqiqi mənasında soyuqqanlı olmalı, cəmiyyəti toparlamalıdır. Hökumət Azərbaycan cəmiyyətinə qarşı repressiya və basqılara son qoymalıdır. Çünki sözügedən təhlükədən ancaq Azərbaycanın bütün qüvvələrinin bütövlüyünə nail olmaqla çıxmaq olar. Cəmiyyətdə qarşıdurma yaratmaqla isə hazırki həssas dövrdə ölkəmizi daha çətin duruma sala bilərlər. Azərbaycan hakimiyyəti bu ağır vəziyyəti düzgün qiymətləndirərək, cəmiyyətin bütövlüyünü qorumalıdır, nəinki parçalanmaya gedərək təbəqələşdirməni dərinləşdirmək".
Müsavat Partiyası başqanının müavini Gülağa Aslanlı vurğuladı ki, Rusiya Ukrayna ilə açıq müharibəyə getməklə özünün məhvinə səbəb olacaq: "İndiki şəraitdə Rusiyanın Ukrayna ilə müharibəyə gedə biləcəyi qədər yanlış mövqe tutacağına inanmıram. Bu təkcə ona görə deyil ki, Rusiya ordusu güclü, Ukrayna ordusu isə ona nisbətən zəifdir. Həm də belə bir addımın Moskva tərəfindən atılması Rusiyanın Avropa İttifaqına müharibə elan etməsi kimi qəbul oluna bilər.
Ona görə də şərqdəki separatçıların son özfəaliyyətindən sonra da, Rusiyanın Ukraynaya qarşı müharibə edəcəyinə inanmıram. Onlar bu addımı atacaqlarsa, onda özlərinin məhvinə qol çəkmiş olacaqlar. Ukraynada cərəyan edən hadisələrin sonunun Azərbaycana da müsbət təsir edəcəyini gözləyirəm. Artıq Ukrayna xalqı Qərbə inteqrasiya qərarını verib. Bu ölkə tezliklə Avropa Birliyinin üzvü olacaq. Azərbaycan hökuməti də Avropa Birliyinə daxil olduqdan sonra Ukraynanın çoxsaylı problemlərini həll etdiyini görəcək. Belədə proses Azərbaycanda da müsbət dəyişikliklərin olmasına gətirib çıxaracaq. Buna yüzdə-yüz əminəm".
Rüfət SULTAN