Şəmsəddin Hacıyevin “söyüşlü-davalı toplantı”ları haqda şok məlumatlar

Professor: “Şəmsəddin Hacıyev insanları elə bir vəziyyətə salıb ki, onlar bu gün dediklərinin ömürlərinin sonunadək utanc və başqaxıncları olacaqlarını belə, düşünməyə fürsət tapa bilməyiblər...”. Dövlət İqtisad Universitetinin rektoru Şəmsəddin Hacıyev vəzifəsindən azad edilsə də, sözügedən universitetdə yaşanan qalmaqallar bitmək bilmir. Yayılan məlumatlara görə, yeni rektor Ədalət Muradov Şəmsəddin Hacıyevin universitetdəki yaxın ətrafını “vurmaqla” bərabər, onların fəaliyyətini də təftiş etməkdədir.

Yeni rektor sələfinin yaxın ətrafını niyə “vurdu”?

Məlumata görə, yeni rektor sələfi Şəmsəddin Hacıyevin universitetdə dekan işləyən qardaşının qudası Müzəffər Məmmədovdan tutmuş, onun ən fəal tərəfdarlarından olan YAP universitet təşkilatının sədri Zəfər Bayramova qədər vəzifələrindən qovub. Bu isə Şəmsəddin Hacıyevin 10 il ərzində bəhs etdiyi mütərəqqi inkişaf, real islahat və düzgün kadr seçimləri ilə bağlı dediklərini alt-üst etməklə yanaşı, həm də onun haqqında indiyədək yazılan və deyilən şikayətlərin həqiqət yükünü ciddi şəkildə təsdiqləyib.
Redaksiyamıza daxil olan məlumata görə, yeni rektor Ədalət Muradov Zəfər Bayramovun icra etdiyi İctimaiyyətlə əlaqələr və tələbələrlə iş üzrə prorektor vəzifəsini də ləğv edib: "Yeni rektor "İctimaiyyətlə əlaqələr və tələbələrlə iş üzrə prorektor” vəzifəsinin səlahiyyətlərindən "ictimaiyyətlə” sözünü ixtisara saldı. Daha sonra isə Hazırlıq fakültəsinin dekanı, iqtisad elmləri namizədi, dosent Səadət Qəndilovanı tələbələrlə iş üzrə prorektor təyin etdi.
Qeyd edək ki, yeni prorektorun keçmiş rektor Şəmsəddin Hacıyevin bir neçə söyüşlü-davalı iclasabənzər qrup toplantılarında yadda qalan fəallığı haqda video-kasetlərin olması haqda xəbərlər var”.

Yeni rəhbərlik YAP sədrinə niyə etimad göstərmədi?

Verilən məlumata görə, Zəfər Bayramov keçmiş rektor Şəmsəddin Hacıyevin ən etibarlı adamlarından olub: "Şəmsəddin Hacıyev tarix elmləri namizədi Zəfər Bayramovu həm prorektor, həm də YAP-ın universitetdəki özək təşkilatına sədr gətirmişdi. Zəfər Bayramov, həm də keçmiş rektorun müdiri olduğu Beynəlxalq münasibətlər kafedrasının dosenti olmaqla, onun ən sadiq tərəfdarlarından olub. O, keçmiş rektorun dövründə hakim partiyanın dayaqlarını gücləndirmək əvəzinə, rektorun korrupsiya və rüşvətxorluq siyasətinə qarşı mübarizə aparan həqiqi elm adamlarına qarşı kompaniyada fəal iştirak edirdi. Təsadüfi deyil ki, Şəmsəddin Hacıyevin öz müşaviri, professor, iqtisad elmləri doktoru Bədirxan Musayevə qarşı təhdid və basqılarında da Zəfər Bayramov önəmli rollar oynayıb. Necə deyərlər, haqq gec də olsa, yerini tapır. Yeni rektor onu “vurmaq”la öz qanuni işini buraxıb, qrup, dəstə maraqlarından çıxış edənlərə yerini göstərir. Amma təəssüf edici hal odur ki, onun yerinə elə bir adam təyin edildi ki, bu, yeni rektora yaxın gələcəkdə problemlər yarada bilər”.
Yayılan məlumatlarda o da bildirilir ki, Ədalət Muradov Şəmsəddin Hacıyevin 10 il müddətində universitetin Dərbənd filialına qanunsuz qəbul etdirdiyi 100-lə tələbənin işləri də araşdırılmaq mərhələsinə qədəm qoyub. Bəzi iddialara görə, keçmiş rektorun bu filial vasitəsi ilə qazancı 400 milyon manatı aşıb. Hər halda bu haqda dövrü mətbuatda da çox xəbərlər gedib…

Professor qəzetimizə danışdı: “Mənə qarşı çox şərəfsiz hərəkətlər olub, bağışlamayacağam!”

Bu və ya digər məlumatlarla bağlı əməkdaşımız İqtisad Universitetinin professoru, iqtisad elmləri doktoru, 3 ilə yaxındır Şəmsəddin Hacıyevin korrupsiya və digər qanunsuzluqlarına qarşı dayanmadan mübarizə aparan Bədirxan Musayevlə də danışıb.
Bizimlə söhbətində professor yeni rektor Ədalət Muradovun ilk təyinatları və islahatlarını müsbət qiymətləndirdiyini deyib: “Professor Ədalət Muradovun korrupsiya və rüşvətxorluq üzrə “professor” olan Şəmsəddin Hacıyevin yaxın ətrafını, xüsusi ilə mənim dəfələrlə saxtakarlıq, dələduzluq, rüşvət, korrupsiya şəbəkəsində yer tutan dəstə adlandırdığım şəxsləri vəzifələrindən azad etməsi, əlbəttə, təqdirəlayiq qarşılanmaqla yanaşı, həm də mənim haqlı olduğumu təsdiqlədi. Bəli, Əsəd Mirzəyev, Zəfər Bayramov və digərləri Şəmsəddin Hacıyevin cinayətlərində əsas rolları oynayıblar. Düşünürəm ki, Ədalət müəllim əmək fəaliyyəti dövründə sabit iş rejimində işləyə bilməyən, tutduğu vəzifələrdən dəfələrlə qısa müddətdə qovulmuş prorektor Damət Bağırovu da gec-tez postundan uzaqlaşdıracaq. Mən və universitetin kollektivi buna inanır”.
Bədirxan Musayev universitetə bərpa olunub-olunmamasına da aydınlıq gətirib: “Mən, hələ ki universitetə bərpa edilməmişəm. Əslində, mən əvvəlki işimə, yəni müşavirlik və ya kafedra müdiri vəzifələrinə qayıtmaq da istəmirəm. Sadəcə, 60 il ömrümü qoyduğum, 60-dan çox namizəd və elmlər doktoru yetişdirdiyim, 40 ilə yaxın kafedra müdiri olduğum universitetdən Şəmsəddin Hacıyev tərəfindən əxlaqa uyğun olmayan şəkildə uzaqlaşdırılmağımla barışa bilmirəm və inandırım ki, barışmayacağam da. Çünki məni oradan çox şərəfsiz şəkildə (Əsassız əmrlərlə yanaşı, Ş.Hacıyevin öyrədilmiş adamları tərəfindən otağıma sidik butulkası, pamperslər atılıb – B.Musayev), elmə, universitetə, ziyalıya yaraşmayan “tələlər” qurmaqla, əmək kitabçamı və tərcümeyi-halımı korlamaqla uzaqlaşdırıblar. Mən, bunu Şəmsəddinə bağışlamaq niyyətində deyiləm. Sadəcə universitetə bərpa olunduqdan 1-2 sonra ərizəmi yazıb, özüm gedəcəyəm. Və məhz bundan sonra Şəmsəddinlə məsələni və mübarizəni dayandıracam. Əgər universitetə qayıdıb sonra təmiz şəkildə getməyimə problem yaradılacaqsa, o zaman ömrümün sonuna qədər mübarizə aparmaq olsa da, eyni halı Şəmsəddinə və onun yaxın ətrafına yaşadacağıma söz verirəm”.

Keçmiş rektorla məhkəmə sədrini işbirliyi narazılığı alovlandırıb

Universitetə qayıdışı ilə bağlı yeni rektora müraciət edib-etməməsinə gəlincə isə, müsahibimiz belə bir halın olduğunu təsdiqləyib: “Bəli, yeni rektorumuzla bir neçə dəfə görüşüb, üzləşdiyim vəziyyəti, təhdid və təqibləri sənədlərlə məlumatlandırmışam. O, bərpamla bağlı məhkəmə qərarına hörmətlə yanaşacağını deyib. Yəni məhkəmə barəmdə müsbət qərar verəcəyi halda, Ədalət müəllim məni işə bərpa edəcəyini söyləyib. Lakin təəssüf ki, rüşvətxorlar sərkərdəsi Şəmsəddin Hacıyev Bakı Apellyasiya Məhkəməsinin imansız sədri İman Nağıyevlə əlbir olduğundan buna da imkan vermirlər. Bununla bağlı prezident İlham Əliyevə və ədliyyə naziri Fikrət Məmmədova açıq məktub və teleqramlar vurub, İman Nağıyevin Şəmsəddin Hacıyevin rüşvət və korrupsiya şəbəkəsinin təsiri altına necə düşməsinin detallarını açıqlamışam. İndi neyləyim ki, mən ömrümü təhsilə, elmə sərf edəndə, belə dələduzlar rüşvət hesabına milyonçu olub, indi məhkəmələri də satın alırlar. Şəmsəddin Hacıyevlə İman Nağıyev məhkəmələri bazara çevirmələrinə də cavab verməlidirlər! Söz yox ki, hər iki şəxsin imansız hərəkətləri ilə bağlı Ali Məhkəməyə şikayət verilib. Bununla bərabər, təxminən 10 gün əvvəl rektorumuz Ədalət Muradova rəsmi müraciət də göndərmişəm. Həmin məktubda Şəmsəddin Hacıyev tərəfindən 2011-ci ilin noyabr ayının 4-də rektorun müşaviri, 11-də isə kafedra müdiri vəzifələrindən tam əsassız və uydurma bəhanələrlə işdən azad edildiyimi bir daha xatırladaraq, onun rektorluqdan azad olunmasına rəğmən, deputat mandatının verdiyi güc və milyonları hesabına Azərbaycan Respublikasının məhkəmələrinə açıq şəkildə təzyiq və təsir göstərməkdə davam etdiyini nəzərə çatdırmışam. Eyni zamanda, professor kimi universitetə dönüşümlə bağlı Bakı Apellyasiya Məhkəməsində növbəti məhkəmə prosesim ərəfəsində iclasa sədrlik edən hakimin açıq şəkildə mənə və vəkilimə “Deputat Ş.Hacıyev məhkəmənin sədri İman Nağıyevlə dostdur. O, bizi iş üzrə qətnaməni qüvvədə saxlamağa (yəni mənim əleyhimə) məcbur edir. Yaxşı olar ki, siz indiki rektor Ədalət Muradova müraciət eləyin, o, universitetin məhkəməyə gələn nümayəndələrinə tapşırıq versin. Ya nümayəndələr geri çəkilsin, ya da barışıq sazişi imzalayın ki, mən təzyiqlərdən rahat yayına bilim. Xahiş edirəm, məni düz baş düşün. Əgər bu mümkün olmasa, Ali Məhkəməyə müraciət edin”, - deyə, utana-utana söylədiklərini də yeni rektorumuzun diqqətinə çatdırıb, məsələyə müdaxilə edilməsi və şərəfimlə xidmət etdiyim universitetə geri dönüşümə şərait yaratmağı və çox qısa müddət sonra isə məni öz ərizəmlə işdən azad etməyini xahiş etmişəm. İnanıram ki, yeni rektor bu müraciətimi müsbət dəyərləndirəcək”.

Yeni prorektor əxlaqlı və dürüst adamdır!

Bədirxan Musayev yeni rektorun təyinatlarından, xüsusilə tələbələrlə iş üzrə prorektor Səadət Qəndilovanın Şəmsəddin Hacıyevin yaxın tərəfdarlarının elm adamlarına yaraşmayan iclaslarının birində dava-dalaşlı, söyüşlü iştirak etməsi haqda video-kasetin mövcudluğu haqda isə ətraflı danışmaq istəməyib: «Ədalət Muradovun Şəmsəddin Hacıyevin rüşvətxor, şər-böhtan kompaniyasında fəal iştirak edən və küçə səviyyəsində olan yaxın ətrafının vəzifələrindən çıxarmasını, sözsüz ki, təqdir edir və universitetin rektoruna qəzetiniz vasitəsiylə təşəkkürümü çatdırıram. Bundan əlavə, universitetə kənardan gətirilən digər bir prorektorun - Mikayıl Zeynalovun da əxlaqlı və dürüst bir insan olduğu haqda bir neçə mənbədən məlumat almışam. Bu səbəbdən universitetin kollektivinin sevincinə şərikəm.
Hacıyevin yaxın adamı söyüşlü iclasın kasetini gizli satıb?
O ki qaldı Səadət Qəndilovanın təyinatına, o, qadındır. Mənim səhv etsələr də, qadınlarla heç vaxt işim olmaz və baxmayaraq ki, məhz Şəmsəddin Hacıyevin göstərişi ilə sonradan ona göstərmək məqsədi ilə özlərinə karyera qurmaq kimi məkrli niyyət güdən şərəfsiz adamlar həmin iclaslardan birini videoya çəkiblər. Bunu təsdiqləyir və deyirəm ki, həmin video-kaseti elə Şəmsəddin Hacıyevin ən yaxın adamı vasitəsi ilə əldə etmişəm. Amma bu barədə nəsə danışmaq mənə yaraşmaz. Bir onu demək istəyirəm ki, rəhmətlik qardaşı Seyfəddin Qəndilov da mənimlə çox yaxın olub. Sadəcə, Şəmsəddin Hacıyevin birbaşa göstərişi ilə o zaman mənim əleyhimə keçirilən küçə səviyyəli iclas və kompaniyalarda Səadət Qəndilovanın iştirak etməsi və əleyhimə danışması qadına yaraşan hal deyildi. Əslində, Səadət Qəndilovadan fərqli olaraq, Şəmsəddin Hacıyevin Həcc ziyarətində olan, amma şeytana qulluq edən 3-5 yaxın ətrafı qadının iştirak etdiyi o iclasda heç bir dinə və eyni zamanda, kişiyə hörmət gətirməyən əxlaqsız ifadə və şər-böhtanlarından daha çox utanıb, yerə girməlidirlər. Bəli, Şəmsəddin Hacıyev və onun xisləti budur, onlar üçün bütün mənəvi dəyərlər itib. Görün, o, insanları elə bir vəziyyətə salıb ki, onlar bu gün dediklərinin ömürlərinin sonunadək utanc və baş qaxıncları olacaqlarını belə, düşünməyə fürsət tapa bilməyiblər...”.

2000 imza və qəbul cəhdi….

Sonda professor bildirib ki, işinə bərpa edilib, tərcümeyi-halını təmizləmək məqsədi ilə yenidən imza toplama kompaniyasına başlanılıb: “Prezidentə məni qəbul etməsi üçün artıq 2000-ə yaxın imza toplanılıb. Bu iş çox sürətlə davam edir. İnanıram ki, gec-tez möhtərəm İlham Əliyevin də qəbuluna düşüb, ədaləti bərpa edəcəyəm. Eyni zamanda, ümid edirəm ki, universitetin yeni rəhbərliyi haqqı nahaqqa qurban verənlərə yerlərini göstərməklə bərabər, mənim son xahişimi müsbət dəyərləndirəcəkdir”.
İqtisad Universitetində yaşanan olaylarla bağlı araşdırmalarımız olacaq. Yazıda adları çəkilənlərin də mövqeyini dərc etməyə hazırıq.
TOĞRUL