Nəlqiyyat naziri Ziya Məmmədovun biznes ortağı, “Hafka” ləqəbli iş adamı Hafiz Məmmədova məxsus “Bank of Azerbaijan”da iri maliyyə maxinasiyaları baş verib.
“Hafka”ya məxsus “Bakı” futbol klubunun iki futbolçusunun bankda yerləşdirdiyi yüz minlərlə dollarlıq depozit yoxa çıxıb. Bu barədə publika.az saytı yazır.
Xəbərdə bildirilir ki, bankda depozitləri yoxa çıxan futbolçular Əfran İsmayılov və Elvin Əliyevdir. Belə ki, Ə.İsmayılov “Bakı” klubu ilə müqavilə bağlayarkən “Bank of Azerbaijan”a depozit kimi 400 min dollar yatırıb. E.Əliyevin isə banka 350 min dollar yatırdığı məlum olub.
Xəbərdə deyilir ki, E.Əliyev H.Məmmədovun qudası, “Nurgün Motors” şirkətlər qrupunun sahibi Nuru Əliyevin komandasında - “Rəvan”da idman direktoru vəzifəsində çalışan Füzuli Əliyevin oğludur.
Lakin futbolçular bu yaxınlarda bankdan əmanətlərini geri götürməyə cəhd edəndə məlum olub ki, onların hesabları boşdur.
Bəs pullar hara gedib?
Futbolçular məsələni araşdıranda məlum olub ki, “Bakı” klubundan onların adına bankdan kredit götürülüb, daha sonra krediti E.Əliyevlə Ə.İsmayılovun depozit hesablarından çıxıblar. “Bakı” klubundan futbolçuların adına kreditləri kimin götürdüyü məlum deyil.
Pulları yoxa çıxan futbolçular H.Məmmədovla görüşmək istəsələr də buna nail ola bilməyiblər. Bundan əvvəl “Texnikabank”da da analoji maliyyə maxinasiyaları həyata keçirilmiş və bu işə görə bank rəhbərliyi həbs edilmişdi. Ardınca isə bankın mülkiyyətçiləri dəyişdi.
Xəbər verildiyi kimi, son vaxtlar “Bank of Azerbaijan”da böhran yaşanır. Mərkəzi Bank “Bank of Azerbaijan”da likvidlik probleminin olduğunu təsdiqləyib. Bankı batmaqdan xilas etmək üçün “Hafka” onun filiallarından bir neçəsini bağlayıb.
Milyarder özü də bu günlərdə “Qafqazinfo” portalına müsahibəsində bankda problemin olduğunu təsdiqləmişdi. O bildirmişdi ki, bankda problem yarandığını eşidən əmanətçilər pullarını geri götürmək üçün müraciət ediblər. “Hafka”nın sözlərinə görə, onun bankında problem yarandığını eşidən qohum-əqrəba evlərini satıb borcları ödəməyə hazır olduğunu deyirlər.
Qeyd edək ki, “Bank of Azerbaijan”ın Müşahidə Şurasının sədri Hafiz Məmmədov olub. Lakin onun biznesində problem yarandığı barədə xəbərlər yayılandan sonra onu bu vəzifədə Mehman İsmayılov əvəzləyib.
Virtualaz.org saytı “Bank of Azerbaijan”dakı maxinasiya iddiaları ilə bağlı pulu yoxa çıxdığı deyilən futbolçulardan biri E.Əliyevlə telefon əlaqəsi saxlayıb.
Futbolçu xəbəri eşidəndə “Onu kim deyir? Belə şey yoxdur” - deyə cavab verib.
Bildirib ki, hazırda Məşhəddə ziyarətdədir və onun “Bank of Azerbaijan”da pulunun yoxa çıxdığı haqda yazılanlar doğru deyil.
Digər futbolçu Ə.İsmayılovla əlaqə yaratmaq isə hələlik mümkün olmayıb.
Ancaq pulları yoxa çıxan futbolçulardan birinin yaxınlarından öyrənə bildik ki, xəbər doğrudur, ancaq bank rəhbərliyi məsələni mətbuata çıxarmamağı xahiş edir və pulların qaytarılması məsələsini həll edəcəklərinə söz verir.