Xəbər verildiyi kimi, bu gün Xətai Rayon Məhkəməsində nəqliyyat naziri Ziya Məmmədovun oğlu Anar Məmmədovun “Yeni Müsavat” qəzetinin baş redaktoru Rauf Arifoğlunu xüsusi ittiham qaydasında məhkəməyə verməsi ilə bağlı proses başlayıb.
Əməkdaşımızın məhkəmədən verdiyi xəbərə görə, məhkəmə iclasında R.Arifoğlunun hüquqlarını vəkil Elçin Sadıqov, Cavad Cavadlı və Vaqif Hüseyn təmsil edib.

Onlar məhkəmə heyətindən A.Məmmədovun şikayətinin təmin edilməməsini tələb ediblər.

Hər iki tərəfin nümayəndələrinin çıxışından sonra hakim Habil Məmmədov müşavirəyə gedib.

Hakim müşavirədən qayıtdıqdan sonra nəqliyyat nazirinin oğlunun şikayətinin təmin edilmədiyini bildirib. Əsas səbəblərdən biri də budur ki, iddiaçı məhkəməyə göndərdiyi ərizəni özü imzalamalı olduğu halda, bir başqası imzalayıb. Bu da məhkəmə qanunvericiliyi ilə birbaşa qanun pozuntusudur.

Qəzetimizin hüquqşünası Vaqif Hüseyn musavat.com-a deyib ki, məhkəmədə "Yeni Müsavat"ın vəkilləri Cavad Cavadlı və Elçin Sadıqov çox peşəkar və təsirli çıxış ediblər. Qarşı tərəfin vəkilləri isə özlərini qeyr-peşəkar kimi nümayiş etdiriblər. V. Hüseyn deyib ki, hakimin bu qərarı qanunidir və Cinayət Prossesual Məcəllənin 293.3.7-ci maddəsinə əsaslanır. Bu maddədə birbaşa göstərilir ki, xüsusi ittiham qaydasında şikayət bu şikayəti verən şəxsin özü tərəfindən imzalanmalıdır. Anar Məmmədovun Rauf Arifoğluna qarşı iddia ərizəsi isə onun nümayəndəsi Ruslan Məmmədov tərəfindən imzalanıb. Heç bir hakim bu cür tərtib olunmuş şikayət ərizəsini qəbul edə bilməz, bu, mümkünsüzdür.

V. Hüseyn bir qədər də "Yeni Müsavat"ın vəkillərinin çıxışları barədə məlumat verib. O, deyib ki, vəkillər Anar Məmmədovun etirazına səbəb olan "məmmədovlar terrorist bir klana çevrilir" qiymətləndirici ifadəsini də faktlarla darmadağın ediblər. Belə ki, bu iddanı sübut edən yüzlərlə qəzet məqaləsi, video-reportajlar, təhlillər var. Və onların heç biri indiyə qədər məmmədovlar tərəfindən təkzib edilməyib. Vəkillər həmin məqalələrin və video reportajların surətlərini proses iştirakçılarına, o cümlədən də qarşı tərəfin vəkillərinə təqdim ediblər. Oradakı başlıqların təqdimatı bəs edir ki, hər bir Azərbaycan vətəndaşı məmmədovların terrorist klan olduğu qənaətinə gəlsin.

Vəkil Elçin Sadıqov: “Biz tələb edirik ki, Anar Məmmədov özü bu məhkəmədə iştirak etsin. Bunu həm biz, həm də qanun tələb edir. Bundan əlavə iddiaçı Məmmədov Anar Ziya oğlu, məhkəməyə göndərdiyi ərizəni özü imzalamalı idi. Amma həmin ərizəni Ruslan adlı şəxs imzalayıb. Həmin şəxs Anar Məmmədovu təmsil edir. Ərizəni onun imzlaması qanun pozuntusudur və bu bizə haq verir ki, şikayətinin təmin edilməməyini tələb edək”.

Vəkil Cavad Cavadlı: “Siz deyirsiniz ki, Anar Məmmədovun etirazına səbəb, “Yeni Müsavat” qəzetində dərc edilmiş yazıda "məmmədovlar terrorist bir klana çevrilir" cümləsidir. Klan sözü ailə deməkdir. Burada da, bir ailə haqqında işlədilmiş cümlədir. Bu jurnalistin gəldiyi qənaətdir. Bütün dünyada bilinir ki, jurnalist məlumatı bir az şişirə bilər, sərt formada yaza bilər. Bu qanun pozuntusu deyil. Orada təhqiramiz ifadədən söhbət belə gedə bilməz. Bundan əlavə, Məmmədovlar ailəsi ilə bağlı yetərincə mətbuatda yazılar dərc edilib və onların böyük hissəsi mənfi xarakterlidir. Və heç biri təqzib edilməyib. Biz sizə həmin yazıları və videogörüntüləri dəqdim etmişik”.

Qeyd edək ki iddia ərizəsində A.Məmmədov R.Arifoğlunun Cinayət Məcəlləsinin 147.1, 147.2 və 148-ci maddələri ilə ittiham olunmasını tələb edirdi. Şikayət ərizəsinə 8 sentyabr 2014-cü il tarixində, saat 11.45-ə Xətai rayon Məhkəməsinin hazırlıq iclasında baxılacağı nəzərdə tutulsa da, baş yazara bu barədə sənədlər sentyabrın 11-də, məhkəmədən 4 gün sonra çatdırılıb.