Gədəbəy RİH başçısının tərcümeyi-halında saxtakarlıqlar var

Hörmətli oxucular! Bu nömrəmizdə ötən saylarımızdan fərqli olaraq Ramiz Yediyarovun pul mənimsəmələri, torpaq satmaları, əhalini zülmlərə düçar etməyi deyil, 3 ildi Gədəbəyə qan udduran bu məmurun tərcümeyi-halı haqqında sizə məlumat veririk. Onun tərcümeyi-halını olduğu kimi sizlərə dərc edirik. Bu tərcümeyi-halı oxuyub görəcəksiniz ki, onun özündə bir saxtakarlıq var. Bir ikisini biz sizin nəzərinizə çatdırırıq. Orta yaşlı nəslə məlumdur ki, 1983-1984-cü illərdə Azərbaycan Xalq Təsərrüfatı Institutunda yoxlamalar başladı və orda təhsil alan tələbələrin əksəriyyətinin bu təhsil ocağına külli miqdarda rüşvət verib girmələri aşkarlandı. Tələbələrin əksəriyyəti institutdan xaric edildi. İnstitut bir filial kimi fəaliyyət göstərməyə başladı. Ramiz Yediyarovun tərcümeyi-halından görünür ki, o da həmin qovulan tələbələrdən biri olub. Əgər belə olmasaydı, Ramiz Yediyarov Ukraynanın Poltava şəhərinin Kooperativ İnstitutunda təhsilini davam etdirməzdi. Ancaq tərcümeyi-halında göstərir ki, guya o Poltava şəhərinə təhsilini davam etdirmək üçün göndərilib. Bu da Ramiz Yediyarovun saxta diplom almasına əsas verir. 18 yaşında instituta qəbul olan Ramiz Yediyarov elə həmin ildə hərbi xidmətə çağırılıb. Yəni 1984-1986-cı illərdə hərbi xidmətdə olub. Tərcümeyi-halda göstərilir ki, 1986-cı ildə hərbi xidmətdən qayıdan Ramiz Yediyarov 1990-cı ildə təhsilini başa vurub. Ramiz Yediyarovun nəzərinə çatdırmaq istəyirik ki, SSRİ dönəmində ali təhsil ocaqlarında təhsil müddəti beş ildən, 4 il doqquz aydan az olmayıb. Necə oldu ki, siz iqtisadiyyat kimi bir fakültəni dörd ilə başa vura bildiniz. Demək sizin təhsilinizin alı olmağı müəmmalıdır. Sizin bütün tərcümeyi-halınızdan görünür ki, hansı idarə və müəssisələrdə işləmisinizsə orda uzağı bir-iki il davam gətirmisiniz. Biz bildiyimizə görə hər idarədə 1-2 il işləyən adamlar təcrübəsiz və səriştəsiz kadrlar sayılırlar. Tərcümeyi-halınızda təəccüb doğuran bir məqam da siz 29.01.2010-cı ildə Bakı şəhər Vergilər Departamentinin rəis müavini vəzifəsinə təyin olunmusunuz və bu vəzifədə cəmi 6 gün işləmisiniz. 04.02.2010-cı ildə isə 14 saylı Ərazi Vergilər İdarəsinə rəsi təyin edilmisiniz. Bu təyinat bizə qaranlıq məqamlardan biridir.Tərcümeyi-halınızı oxuyandan sonra bizə bəlli oldu ki, əslində siz Gədəbəy rayonunu səriştəsizliyiniz və savadsızlığınız ucbatından xaosla üz-üzə qoymusunuz. Təyin edildiyiniz 3 il müddətində rayonun elə bir idarə və müəssisəsi yoxdur ki, orada rüşvərxorluq baş alıb getməsin. Sizin səriştəsizliyiniz nəticəsində demək olar ki, rayonda olan bütün sahibkarlar və fermerlər dilənçi vəziyyətinə düşüblər. Sizin təyin etdiyiniz icra nümayəndələri də elə deyəsən sizin kimi ali təhsil alıb. Sizin kimi “bacarıqlı”dırlar. Bizdə olan məlumata görə Saratovka kimi böyük bir kəndə təyin etdiyiniz icra nümayəndəsi Hüseyn müəllim sən demə dəliliklə təqaüd alırmış. Siz təyin etdiyiniz icra nümayəndəsinin tərcümeyi-halı ilə niyə maraqlanmırsınız? Niyə maraqlanasınız axı. Sizin tərcümeyi-halınız necədirsə, ətrafınızdakılar da da elədir. Götürək birinci müavininiz Qüdrət Paşayevi. Bu o Qüdrət Paşayevdir ki, əvvəlki saylarımızda yazdığımız kimi Milli İstiqlal Partiyasının Gədəbəy rayon şöbəsini yaradanlardan biri olub. Milli İstiqlal Partiyasının siyasi şurasının üzvü olub. Aldığımız məlumata görə bu məmur hələ də muxalifət partiyalarını dəstəkləyənlərdən biridir. Belə olmasaydı yəqin ki, birinci müavin Yeni Azərbaycan Partiyasına üzv olmaq üçün ərizə ilə müraciət edərdi. Bizdə olan məlumata görə Qüdrət Paşayev nə Milli İstiqlal Partiyasından istefa ərizəsi yazmayıb, nə də həmin partiyanı tərk etmək haqqında bəyanat verməyib. Bildiyimizə görə hansı yollasa 1998-cı ildə Yeni Azərbaycan Partiyasının üzvlük biletini əldə edib. Əgər partiyaya müraciət etsəniz görərsiniz ki, Qüdrət Paşayevdə olan Yeni Azərbaycan Partiyasının üzvlük vəsiqəsi saxtadır. Çünki Yeni Azərbaycan Partiyası Gədəbəy rayon təşkilatı idarə heyətinin Qüdrət Paşayevi üzvlüyə qəbul etməsi haqqında heç bir qərarı yoxdur. Ona görə də belə saxta məmurlar, Ramiz Yediyarov başda olmaqla bu yazıq rayonun əhalisinə qan uddurur. Aldığımız məlumata görə Qüdrət Paşayev doğulduğu kənddə bir ailənin tamamilə dilənçi olmasına fərman verib. Hətta həmin adamların Ceyrançöl ərazisində yerləşən yataqlarını qeyri-qanuni sənədlər düzəldərək onların əlindən almışdı. Və bu üç qardaşın Şahvələd, Nazim və digər qardaşlarının başına olmazın oyunlarını açmışdır. Hətta məktəbdə müəllim işləyən qardaşı sizin göstərişinizlə işdən azad edilmişdir. Ramiz Yediyarov bu rayonda inanmırıq ki, hansısa təmiz, dürüst, savadlı məmur sizinlə işləsin. Sizin kadrlarınız ancaq elə Qüdrət, Rüstəm, Hüseyn kimi olmalıdır. Tay-tayını tapmasa günü ah-vayla keçər.Hörmətli oxucular! Ramiz Yediyarovun Vikipediyadan götürdüyümüz tərcümeyi-halını olduğu kimi sizlərə təqdim edirik. Ola bilsin ki, bizim nəzərimizdən qaçan saxta məqamları sizlər görə bilərsiniz. Araşdırdığınız tərcümeyi-haldakı saxta bildiyiniz məqamları redaksiyamıza göndərməyinizi xahiş edirik.Yediyarov Ramiz Qəni oğlu, 31 may 1966-cı il tarixdə Ermənistan SSR-nin Vedi rayonunda anadan olmuşdur. 1973-cü ildə Azərbaycan SSR-nin Şəki şəhəri, Şəki kənd orta məktəbinin 1-ci sinfinə daxil olub, 1983-cü ildə həmin məktəbi bitirmişdir. 1984-cü ildə D.Bünyadzadə adına Azərbaycan Xalq Təsərrüfatı İnstitutunun Maliyyə-kredit fakültəsinə daxil olub, təhsilini davam etdirmək üçün Ukrayna SSR Poltava Kooperativ İnstitutuna göndərilmişdir.1984-1986-cı illərdə Kuybuşev şəhərində hərbi xidmətdə olub. 1990-cı ildə Poltava Kooperativ İnstitutunu bitirərək iqtisadçı ixtisasına yiyələnmişdir. 26.09.1990-cı il tarixdən 30.12.1994-cü il tarixədək Şəki şəhəri 77 nömrəli Təsərrüfatlararası Mexanikləşdirilmiş Səyyar Dəstə üzrə iqtisadçı, 04.01.1995-ci il tarixdən 05.11.1997-ci il tarixədək Şəki rayonu. C.Cabbarlı adına kolxozda mühasib işləmişdir.11.11.1997-ci il tarixdən etibarən dövlət vergi orqanlarında xidmət etmişdir. 11.11.1997-ci il tarixdən 15.03.2000-ci il tarixədək Şəki şəhəri üzrə Dövlət Vergi Müfəttişliyinin hüquqi şəxslərin vergiyə cəlb edilməsi şöbəsinin dövlət vergi müfəttişi; 15.03.2000-ci il tarixdən 05.02.2001-ci il tarixədək Şəki şəhəri üzrə Vergilər Şöbəsinin hüquqi şəxslərin vergiyə cəlb edilməsi bölməsinin dövlət vergi müfəttişi; 05.02.2001-ci il tarixdən 13.11.2002-ci il tarixədək Şəki şəhəri Vergilər Şöbəsinin Bəyannamələrin yoxlanılması və uçotunun təşkili bölməsinin baş dövlət vergi müfəttişi vəzifələrində işləmiş, “Sahibkarlığın inkişafına mane olan müdaxilələrin qarşısının alınması haqqında” Azərbaycan Respublikası Prezidentinin Fərmanına əsasən rayon vergilər şöbələri ləğv edildiyi üçün 13.11.2002-ci il tarixdə tutduğu vəzifədən azad edilmiş, işə qəbulla əlaqədar keçirilən müsabiqədən müvəffəqiyyətlə keçərək, 15.01.2003-cü il tarixdə Vergilər Nazirliyinin 11 saylı Ərazi Vergilər İdarəsinin Bəyannamələr şöbəsinin baş dövlət vergi müfəttişi vəzifəsinə təyin edilmiş və həmin vəzifədə 13.03.2003-cü il tarixədək işləmişdir. 13.03.2003-cü il tarixdən 26.08.2004-cü il tarixədək həmin şöbənin rəisi; 26.08.2004-cü il tarixdən 28.04.2006-cı il tarixədək 14 saylı Ərazi Vergilər İdarəsinin rəisi; 28.04.2006-cı il tarixdən 06.06.2008-ci il tarixədək 12 saylı Ərazi Vergilər İdarəsinin rəisi; 06.06.2008-ci il tarixdən 29.01.2010-cu il tarixədək Bakı şəhəri Vergilər Departamentinin 2 saylı filialının rəisi; 29.01.2010-cu il tarixdən 04.02.2010-cu il tarixədək Bakı şəhəri Vergilər Departamentinin rəis müavini vəzifələrində işləmişdir. 04.02.2010-cu il tarixdən Vergilər Nazirliyinin 14 saylı Ərazi Vergilər İdarəsinin rəisi vəzifəsində işləmişdir. Azərbaycan Respublikası Prezidentinin 11 fevral tarixli 738 nömrəli Sərəncamı ilə “Azərbaycan Respublikası Vergilər Nazirliyinin 10-illiyi (2000-2010)” Azərbaycan Respublikasının yubiley medalı ilə təltif edilmişdir. Ailəlidir, 3 övladı vardır.