Ramiz Yediyarovun “ağac əməliyyatı”
Gədəbəy RİH-nin başçısı bu əməliyyatla 150 min manat “yeyib”

Hörmətli oxucular onsuz da siz artıq bizim qəzetimizdən və kütləvi informasiya vasitələrindən oxuyursunuz ki, Gədəbəy RİH-nin başçısı Ramiz Yediyarov heç bir qanunlara məhəl qoymadan öz ağlasığmaz qaydalarına əsaslanaraq rayonu talamaqda davam edir. Ancaq özünü elə göstərir ki, tanımayan və bilməyən insanlar elə bilər ki, Ramiz Yediyarovdan yaxşı icra başçısı tapmaq mümkün deyildir. Bəlkə də R.Yediyarovun elə fikirləri var ki, heç bir icra başçısı belə bir maxinasiyaları törətməyi ağlına belə gətirmir. Ancaq vergi işçısı Ramiz Yediyarovun ağlına “hardan necə pul çıxartmaq lazımdır”, prinsipinə əsaslanan maxinasiyalar demək olar ki, hər gün gəlir. Hamınıza bəllidir ki, Gədəbəy rayonu dağlarla və meşə zolaqları, yaşıllıqlarla əhatə olunmuş dağ rayonudur. Yəni yaradan tanrı təbiətin gözəlliyini bu rayona bəxş etmişdir. R.Yediyarov tanrının gədəbəylilərə bəxş etdiyi təbiət gözəlliklərini, artıq iki ilə yaxındır ki, süni gözəlliklər yaratmaqla məhv etmək istəyir. Belə ki, 2013-ci ilin təxminən noyabr ayında Ramiz Yediyarovun Gədəbəydə yeni ağacəkmə kampaniyası yadına düşdü. R.Yediyarov burda da küllü miqdarda yeyintilərin olacağını və ondan da yaxşı yararlanacağını əvvəlcədən hesablamışdır.



Hörmətli oxucular axı Ramiz Yediyarov ixtisasca iqtisadçıdır. Harda gəlirin daha çox olduğunu yaxşı bilir. R.Yediyarov şəhərin abadlaşdırılmasına ayrılan pullardan ağac şitillərinin alınmasına daha çox vəsait ayırır. Və beləliklə Gədəbəyin iqlim qurşağına uyğun olmayan əsasən isti ölkələrdə yetişən ağac tinglərini ucuz qiymətə alıb çox baha qiyməti sənədlər üzərində göstərmişdir. Bizdə olan məlumata görə hər ağac şitilinin bir ədədini 10 manata alıb onu 100 manata sənədləşdiriblər. Düzdür gətirdikləri ağac şitilləri yol qıraqlarına basdırılmışdır. Amma Ramiz Yediyarov və onun yarıtmaz məmurları çox yaxşı bilirdilər ki, Gədəbəy rayonunda payız aylarında yeni ağac əkmək olmaz. Bilirdilər ki, həmin ağaclar qışın sərt soyuğuna davam gətirə bilməyəcəkdir. Bu da onlar üçün pul mənimsəmələrini həyata keçirmək üçün ən yaxşı vasitədir. Və həmin ağac şitilləri heç bir ay keçmədi ki, şaxta nəticəsində tamamilə məhv oldular. Deyilənə görə kağız üzərində bu ağacların alınmasına 150 min manatdan artıq vəsait yazılmış və mənimsənilmişdir. Ağacların quruduğunu görən Ramiz Yediyarov öz yeyintilərini ört-basdır etmək üçün 2014-ci ilin yazında Gədəbəyin öz meşəsindəki şam şitillərini çıxartdırıb yenidən həmin ağacların yerinə əkdirmişdir. Eşitdiyimizə görə “hörmətli” başçı deyəsən bu ilin noyabr ayında həmin ağac əməliyatlarını davam etdirir. R.Yediyarovdan soruşan lazımdır ki, ağac əkmək üçün niyə məhz yazda yox, payızda canfəşanlıq edir?! “Hörmətli” İcra başçısı əgər həqiqi elə gözəlliyi sevirsinizsə, bəs deyin görək nəyə görə Heydər Əliyev prospektindən İcra Hakimiyyətinə gedən yolda olan köhnə sağlam ağacları kəsdirmisiniz?Hörmətli oxucular, Ramiz Yediyarov İcra Hakimiyyətinə başçı seçiləndən sonra demək olar ki, Azərbaycan qanunları ilə yox, özünün fikirləşdiyi cəngəllik qanunları ilə işləyir. İclaslarda yalandan mən Gədəbəy rayonunu gözəlləşdirəcəm deyərək, əksinə rayonu bərbad hala gətirmişdir. Ötən saylarımızda qəzetimizdə ardıcıl gedən materiallardan da, şəkillərdən də görünür ki, icra başçısının dediklərinin hamısı yalandır. Əgər həqiqətən də bu rayonun gözəlləşməyi haqqında fikirləşirsə niyə Heydər Əliyev prospektindən başqa heç bir küçədə abaqlıq işləri aparılmayıb?! Axı Heydər Əliyev prospektindən başqa Gədəbəydə 18 küçə var. Ona sual edirik: Siz qorxmursunuzmu birdən Prezident cənab İlham Əliyev növbəti dəfə Gədəbəyə səfər edəndə başqa küçələrdən birinə gedər, onda sizin halınız necə olar?! Yəqin ki, bu sizin ağlınıza belə gəlməz. Sizin ağlınıza gələnlər danışdığınız yalanlara özünüzü və əlaltılarınızı inandırmaqdan başqa bir şey deyildir. Belə olmasaydı 24 saylı Yol İstismar İdarəsinin rəisi Firudin İbrahimovla, şəhər meri Şahbaz Bayramovla yalandan kağız üzərində 18 küçəyə asfalt örtüyü çəkib, dövlətin ayırdığı külli miqdarda maliyyə vəsaitlərini mənimsəməzdiniz.Ramiz Yediyarov rayonun girəcəyində qurduğunuz fontan o qədər də gərəkli deyil gədəbəylilərə. Ancaq sizə maraqlıdır. Çünki bu fontan olan mini parka külli miqdarda pul yazıb mənimsəmisiniz. Yediyiniz o pulun yarısını Gədəbəyin şəlalə deyilən yerinə xərcləsəydiniz, həmin yer dünyanın ən gözəl şəlalələrindən biri olardı. Deyə bilərsinizmi nəyə görə bu 2 il müddətində rayonun aşağı bazar adlanan ərazisinə gedən yolda heç bir təmir işləri görməmisiniz?! Niyə orda gözəlliklər yaratmamısınız?! Axı bu ərazi Gədəbəyin Simens qardaşları dövrünü xatırladır. Bu da bizim tariximizdir.Rayonun gözəlləşməyini istəyən rəhbər ilk öncə onun qədim yerlərini gözəlləşdirməlidir. Siz Gədəbəyin abadlaşmağı üçün yox, özünüzün həyat güzəranınızın daha da yaxşılaşması üçün çalışırsınız. Yadınıza bircə şeyi salın ki, Bakının yolu Bayıldan başlasa da, deyəsən sizin və əlaltılarınızın yolu Bakıya Şüvəlandan keçəcək.