Başçının haqsızlığına dözməyən şəhid anası vəfat edib.

“Gündəm” xəbərə ən çox şikayət göndərən bölgələrdən biri də Sumqayıtdır. Bu dəfə redaksiyamıza müraciət edən Sumqayıt şəhərində məskunlaşan, Laçın rayonundan məcburi köçkün, İsmayılov Məmmədnəbi Sədi oğlu bildirir ki, onun 3-cü mikrarayonda yerləşən 2 obyektini (10 m2 , 12 m2 sahəsi olan ) İH başçısı Eldar Əzizov dağıtdırıb.

“Qaçqınlara toxunmayın, məskunlaşdığı yerdən çıxarmayın!” (deyim H.Əliyevə məxsusdur) Deyimi artıq aktuallığını itirib. İnsanların şəxsi mülkiyyətini kimliyindən asılı olmayaraq buldozerin qabağına verərək dağıda-dağıda gedir. Vətəndaşların mülkiyyət hüquqları addım başı tapdağaltı olub.
İ.Məmmədnəbinin dediyinə görə anasının sağlığında Sumqayıtın sabiq İH başçısı Təvəkkül Məmmədova müraciətdən sonra onlara şəhid ailəsi kimi 12 m2 yer ayrılmışdır. Həmin yeri Sumqayıt Memarlıq İdarəsinin layihəsindən sonra tikib sənədləşdiriblər. Həmin sahəyə yaxın ayaqqabı təmiri sexini də alqı-satqı yolu ilə hər iki obyekti (o vatın pulu) 1000000 (bir milyon) manata alaraq özəlləşdiriblər. Həmin köşklərdə kiçik ticarətlə məşğul olan Məmmədnəbi 8 nəfərlik ailə üzvünün gündəlik təlabatını ödəyirmiş.
Bu azmış kimi həyat yoldaşı uzun illərdir ki, xəstəlikdən əziyyət çəkir. Ailə dərmanları almaq gücündə deyil. Apteklərə böyük məbləğdə borcları var.
“Eldar Əzizovun Sumqayıta təyinatından sonra məcburi köçkün olaraq ailəmiz gündəlik tələbatdan məhrum oldu. E. Əzizov Sumqayıta sanki özü ilə “sunami” gətirdi. O iş yerləri açmaq əvəzinə, bir çox ailələrin çörəyini kəsdi.”
Xatırladaq ki, E.Əzizovun rəhbərliyi altında Gəncədə “idarəçilik təcrübəsi” keçmiş çapoulçu dəstə Sumqayıtın küçə və parklarını alver predmetinə çevirdi. Başçının Gəncə kadrları: müavinlər- Rövşən Sadıqov, Sahib Quliyev, “memar Kamil” bu “trio” Sumqayıtda hakimi mütləqdir. E.Əzizov Sumqayıtın köklü problemlərini bilən kadrları işdən kənarlaşdırdı. Əvəzində yuxarıda adlarını qeyd etdiyimiz Gəncədən gətirdiyi dəstə üzvlərini öz ətrafında birləşdirə bildi.
Sumqayıta təşrif buyuran dəstə parkları səki və küçələri prospektlərə girərək sm-lə hərraca çıxardı. Parklardakı çoxillik ağaclar və dekorativ kolluqları qırdıraraq yerini sahibkarlara İAİŞƏ obyekti kimi satmağa başladı.
İ.Məmmədnəbi bildirir ki, “obyektimizi sökəndə İH başçısı E.Əzizov bildirdi: “Kimin sənədi varsa, ona başqa ərazidən yer veriləcək.” Biz də başçıya inanaraq gözlədik. Sonradan məlum oldu ki, E. Əzizov heç vaxt vədinə əməl etmir. İllərdir ki, döymədiyim qapı qalmayıb. Problemim həllini tapmır. E.Əzizovun qəbuluna yazılsam da məni qəbul etmir. Başçının bu haqsızlıqlarına dözməyən anam (şəhid anası) vəfat etdi.” .
“Dəfələrlə ölkə başçısı İ.Əliyevə, Qaçqın və Məcburi Köçkünlərlə İş Üzrə Dövlət Komitəsinin sədri Əli Həsənova müraciət etmişəm. Şikayətimlə maraqlanan yoxdur. Bu ölkədə şikayətə niyə baxılmır?
Prezident Aparatında Zeynal Nağdəliyevin rəhbərlik etdiyi şöbənin əməkdaşı İH başçılarının işi üzrə kurator Hüseyn Mövsümovun qəbulunda oldum. Bir çox təsəllidən sonra söz verdi ki, o İH başçısı E.Əzizova tapşırar və məsələ həllini tapar. Məsələ isə həllini tapmır ki, tapmır”.
Əlində qanuni sənədi olmasına baxmayaraq, Sumqayıt İH-i abadlıq işləri başa çatdıqdan sonra sizin şikayətinizə baxıla bilər cavabını veriblər. Şikayətçiyə şablon cavablarla təsəlli verirlər. “Abadlıq işlərinin” qurtaracağı vaxtsa, məlum deyil. Görünür şikayətçi sonsuzluğa qədər gözləməlidir.
Sumqayıtda minlərlə Məmmədnəbi kim hüquqları pozulmuş vətəndaşlarımız var ki, illərdir haqqına sahib çıxa bilmir. Abadlıq adı altında altı-üstünə çevrilən Sumqayıt sözün əsl mənasında bir obyekt kimi İH başçısı E.Əzizov üçün yaxşı qazanc məkanıdır.
Şikayətçinin əlində Azərbaycan Respublikası Dövlət Əmlakı Nazirliyi (o vaxt qurumun adı belə idi) tərəfindən Dövlət Əmlakının hüquqi və fiziki şəxslərə verilmiş şəhadətnaməsinin olmasına baxmayaraq hüquqlarını bərpa edə bilmir.
Xatırladaq ki, E.Əzizov Sumqayıta təyinatından sonra Əli Həsənovun Sumqayıt İH-da müavin işləyən qardaşı Ramiz Həsənovu işdən azad etmişdi. Bu səbəbdən də E.Əzizovla Ə.Həsənovun aralarında soyuq münasibət hökm sürürdü.
Araşdırmalarımız zamanı məlum oldu ki, bütün bu haqsızlıqlarla bağlı Qaçqın və Məcburi Köçkünlərlə İş Üzrə Dövlət Komitəsinin sədri Əli Həsənov (baş nazirin müavini) məlumatlıdır. Olaydan qəzəblənən sədr İ.Əliyevə məruzə edəcəyi bildirilir.
Indi isə başçıdan qisas almaq üçün münbit şərait yaranıb. Belə fürsəti isə indiki komanda heç vaxt fövtə vermir. Odur ki, E.Əzizov ciddi cəzlandırılacaq.
İ.Məmmədnəbi qəzetimiz vasitəsilə ölkə başçısı İ.Əliyevdən onun dağıdılmış obyektinin başqa ərazidə tikintisi üçün yer ayırmasını, Sumqayıt İH başçısı E.Əzizova göstəriş verməsini tələb edir.
Sonda İ.Məmmədnəbi tezliklə problemi həllini tapmasa, mülkiyyət hüququnun bərpası üçün, işi Avropa İnsan Haqqları Məhkəməsinə qaldıracağını bildirdi.

Şakir Həsənsu