Başçının haqsızlığına dözməyən şəhid anası vəfat edib.

Gündəm Xəbər-ə ən çox şikayət göndərən bölgələrdən biri də Sumqayıtdır. Bu dəfə qəzetimiz vasitəsi ilə prezident İ.Əliyevə müraciət edən Sumqayıt şəhərində məskunlaşan, Laçın rayonundan məcburi köçkün,qardaşı şəhid olmuş İsmayılov Məmmədnəbi Sədi oğlu bildirir ki, onun 3-cü mikrarayonda yerləşən 2 obyektini (10 m2 , 12 m2 sahəsi olan ) İH başçısı Eldar Əzizov dağıtdırıb.

“Qaçqınlara toxunmayın, məskunlaşdığı yerdən çıxarmayın!” (deyim mərhum H.Əliyevə məxsusdur) Deyimi artıq aktuallığını itirib. İnsanların şəxsi mülkiyyətini Sumqayıtda buldozer dağıda-dağıda gedir. Vətəndaşların mülkiyyət hüquqları bu şəhərdə addım-başı tapdağaltı olub.

İ.Məmmədnəbinin dediyinə görə anasının sağlığında Sumqayıtın sabiq İH başçısı Təvəkkül Məmmədova ailə vəziyyəti ilə əlaqədar müraciətdən sonra, onlara şəhid ailəsi kimi 12 m2 yer ayrılmışdır. Həmin yeri Sumqayıt Memarlıq İdarəsinin layihəsindən sonra tikib sənədləşdiriblər. Həmin sahəyə yaxın ayaqqabı təmiri sexini də alqı-satqı yolu ilə hər iki obyekti alaraq özəlləşdiriblər. Həmin köşklərdə kiçik ticarətlə məşğul olan Məmmədnəbi 8 nəfərlik ailə üzvünün gündəlik təlabatını ödəyirmiş.

Şikayətçi bildirir ki,“Eldar Əzizovun Sumqayıta təyinatından sonra məcburi köçkün olaraq ailəmiz gündəlik tələbatdan məhrum oldu. E. Əzizov Sumqayıta sanki özü ilə “sunami” gətirdi. O iş yerləri açmaq əvəzinə, bir çox ailələrin çörəyini kəsdi.”

Xatırladaq ki, E.Əzizovun rəhbərliyi altında Gəncədə “idarəçilik təcrübəsi” qazanmış dəstə Sumqayıtın küçə və parklarını alver predmetinə çevirib. Başçının Gəncə kadrları: müavinlər- Rövşən Sadıqov, Sahib Quliyev, “memar Kamil” bu “trio” Sumqayıtda hakimi mütləqdir. E.Əzizov Sumqayıtın köklü problemlərini bilən kadrları işdən kənarlaşdırdı. Əvəzində yuxarıda adlarını qeyd etdiyimiz Gəncədən gətirdiyi “dəstə” üzvlərini öz ətrafında birləşdirdi.

Yazıda adı birinci keçən müavin Rövşən Sadıqovun İsmayıllı rayonuna rəhbərliyi dönəmində qəzəblənmiş xalq tərəfindən onun xidməti maşınını yandırmışdı. Dağlar qoynunda yaşayan İsmayıllılar dağ havası,bulaq suyu qədər saf insanlardır.Bu bölgədə məmur əlləm-qəlləmliyi elə də çox uzağa gedə bilmir.Əslində İsmayıllıda “yanğın”ənənəsi Rövşən Sadıqova məxsusdur.

Sumqayıta əl qoyan “dəstə” səki və küçələri, hətta magistral yolu, bir saylı şəhər xəstəxanasına gedən yolu sataraq yerində “Bioloji Təbabət Klinikası” nın tikilməsinə icazə verib. Parklardakı çoxillik ağaclar və dekorativ kolluqları qırdıraraq yerini sahibkarlara İAİŞƏ obyekti kimi satmağa başladı.

İ.Məmmədnəbi bildirir ki, “obyektimizi sökəndə İH başçısı E.Əzizov bildirdi: “Kimin sənədi varsa, ona başqa ərazidən yer veriləcək.” Biz də başçıya inanaraq gözlədik. Sonradan məlum oldu ki, E. Əzizov heç vaxt vədinə əməl etmir. İllərdir ki, döymədiyim qapı qalmayıb. Problemim həllini tapmır. E.Əzizovun qəbuluna yazılsam da məni qəbul etmir.Laçındakı əmlakımı ermənilər,Sumqayıtda dövlət tərəfindən ayrılan obyektimi E.Əzizov dağıtdı.Erməni gülləboranından sağ-salamat çıxan (şəhid anası) anam, E.Əzizovun bu haqsızlıqlarına dözməyərək vəfat etdi.” .

“Cənab Prezident, dəfələrlə Sizə, Qaçqın və Məcburi Köçkünlərlə İş Üzrə Dövlət Komitəsinin sədri Əli Həsənova müraciət etmişəm. Şikayətimlə maraqlanan yoxdur. Bu ölkədə şikayətə niyə baxılmır?

Prezident Aparatında Zeynal Nağdəliyevin rəhbərlik etdiyi şöbənin əməkdaşı İH başçılarının işi üzrə kurator Hüseyn Mövsümovun qəbulunda oldum. Söz verdi ki, o İH başçısı E.Əzizova tapşırar və məsələ həllini tapar. Məsələ isə həllini tapmır ki, tapmır.

Əlimdə qanuni sənədlərim olmasına baxmayaraq, Sumqayıt İH-i abadlıq işləri başa çatdıqdan sonra sizin şikayətinizə baxıla bilər cavabını verir. Mənə şablon cavablarla təsəlli verirlər. “Abadlıq işlərinin” qurtaracağı vaxtsa, məlum deyil. Görünür mən sonsuzluğa qədər gözləməliyəm.

Sumqayıtda minlərlə mənim kimi hüquqları pozulmuş vətəndaşlarımız var ki, illərdir haqqına sahib çıxa bilmir. Abadlıq adı altında altı-üstünə çevrilən Sumqayıt sözün əsl mənasında bir obyekt kimi İH başçısı E.Əzizov üçün yaxşı qazanc məkanıdır.

Əlimdə Azərbaycan Respublikası Dövlət Əmlakı Nazirliyi (o vaxt qurumun adı belə idi) tərəfindən Dövlət Əmlakının hüquqi və fiziki şəxslərə verilmiş şəhadətnamə olmasına baxmayaraq mülkiyyət hüquqlarımı bərpa edə bilmirəm”.

Araşdırmalarımız zamanı məlum oldu ki, bütün bu haqsızlıqlarla bağlı Qaçqın və Məcburi Köçkünlərlə İş Üzrə Dövlət Komitəsinin sədri Əli Həsənov (baş nazirin müavini) məlumatlıdır. Olaydan qəzəblənən Ə.Həsənov, İ.Əliyevə məruzə edəcəyi bildirilir.

Xatırladaq ki, E.Əzizov Sumqayıta təyinatından sonra Əli Həsənovun Sumqayıt İH-da müavin işləyən qardaşı Ramiz Həsənovu işdən azad etmişdi. Bütün xahiş və minnəti başçı qulaqardına vurmuşdu. Bu səbəbdən də E.Əzizovla Ə.Həsənovun aralarında soyuq münasibət hökm sürür.

Çox güman ki,bu olaydan yararlanan Qaçqın və Məcburi Köçkünlərlə İş Üzrə Dövlət Komitəsinin sədri Əli Həsənov Sumqayıt Şəhər İcra Hakimiyyətinin başçısı E.Əzizova beş qat bədəlini ödətmiş olacaq.

Sonda İ.Məmmədnəbi “Gündəm”xəbər vasitəsi ilə ölkə başçısı İ.Əliyevdən günahkarların cəzalandırılmasını və onun dağıdılmış obyektinin Sumqayıt şəhəri ərazisində bərpa edilərək,özünə qaytarılması üçün, Sumqayıt İH başçısı E.Əzizova göstəriş verməsini xahiş edir.

Kənan

Gündəm Xəbər