Bakı Apelyasiya Məhkəməsində Dövlət Xəzər Dəniz Gəmiçiliyinə məxsus “İslam Səfərli” yük gəmisinin kapitanı Həşim Həsənovun, gəmi kapitanının köməkçiləri - Səyyad İbadullayev və Ayməddin Əmiraslanovun cinayət işi üzrə məhkəmə prosesi keçirilib.

“İslam Səfərli” yük gəmisinin kapitanı Həşim Həsənovun, gəmi kapitanının köməkçisi Səyyad İbadullayevin və gəmi heyətinin digər üzvü Ayməddin Əmiraslanovun 7 aprel 2013-cü ildə, Rusiya Federasiyasının bayrağı altında üzən “Kuban” gəmisinin kapitanı ilə aralarında şifahi razılaşmas olub.

Onlar həmin razılaşmaya əsasən, 3.800 ABŞ dollarına 40 ton xam neft və 18 ton mazutu "Kuban” gəmisinə yükləyiblər. Həmçinin gəminin saxlanc yerindəki 6 ton dizel yanacağı 1.800 ABŞ dollarına satıblar.

Təqsirləndirilən şəxslərin barəsində Cinayət Məcəlləsinin 179.3.2 (mənimsəmə və ya israf etmə), 206.3.2 (qaçaqmalçılıq) və 206.3.3-cü maddələri ilə ittiham elan edilib. Bakı Ağır Cinayətlər Məhkəməsinin hökmü ilə təqsirləndirilən şəxslərin hər biri 3 il müddətinə azadlıqdan məhrum olunublar.

Hökmdən narazı qalan təqsirləndirilən şəxslər apelyasiya şikayəti verərək, birinci instansiya məhkəməsi tərəfindən sərt cəza ilə cəzalandırıldıqlarını qeyd ediblər. Onlar barələrində olan hökmün ləğv edilməsini və bəraət hökmünün çıxarılmasını istəyiblər. Həmçinin Baş Prokurorluq apelyasiya protesti verib. Prokurorluq təqsirləndirilən şəxslərin cəzalarının sərtləşdirilməsini tələb edib.

Hakim Faiq Qasımovun sədrliyi ilə keçirilən prosesdə tərəflərin şikayəti üzrə dinləmə olub. Prosesdə təqsirləndirilən şəxslər apelyasiya şikayətlərinin dəlillərini müdafiə ediblər. Günahsız olduqlarını qeyd edən təqsirləndirilən şəxslərin barəsində bəraət hökmünün çıxarılmasını xahiş ediblər.

Məhkəmə iclası fevralın 10-da davam edəcək.

Qeyd edək ki, təqsirli bilinənlər Dövlət Xəzər Dəniz Gəmiçiliyinin sabiq rəisi Aydın Bəşirovun işçiləri olub.