Baş nazirin sabiq müavinin kampaniyası, əks effekt verməyə başlayıb

Abbas Abbasovun bir vaxtlar Ağsaqqallar Şurasının sədri olduğu «Azər Ros»da vəziyyət öz cığırıdan çıxıb.

Xatırladaq ki, Azərbaycanın baş nazirinin sabiq 1-ci müavini Abbas Abbasov və tərəfdarlarının Rusiyadakı nüfuzlu ziyalılara və Azərbaycan hakimiyyətinə qarşı gizli fəaliyyətləri, bu təşkilatdakı qarşıdurmanı gücləndirib.

«Gündəm Xəbər»in məlumatına görə, Abbas Abbasovun əleyhdarları qeyd edilən istiqamətdəki fəaliyyətlərinin qarşısının alınmaz olduğu gördükdə isə radikal addımlar atıblar: «Ötən ay «Azər Roos»da növbədənkənar qurultay keçirərək, Abbas Abbasovun tərəfdarı olan təşkilatın prezidentinin fəaliyyətinə xitam verildi. Bununla yanaşı, Abbas Abbasovun bir neçə tərəfdarı ilə bağlı dəyişiklik aparıldı. «Azər Roos»u yenidən qurmaq və bununla da Rusiyada monolit fəaliyyət göstərməklə, Azərbaycan dövlətinin maraqlarını qorumaq məqsədi güdən «çevirliş tərəfdarları»nın radikal qərarları isə, Abbas Abbasovun əsl mahiyyətini açdı. O, qurultayı pozmaqla yetinmədi, üstəlik, təşkilatın fəxri prezidenti, son aylar Azərbaycan iqtidarına qarşı loyallaşan Söyün Sadıqov və digər fəallarına qarşı basqılar təşkil etməkdən də çəkinmədi».

Baş verənləri qəzetimizə şərh edən Rusiyadakı soydaşlarımızdan birinin sözlərinə görə, Abbas Abbasov gün getdikcə daha da aqressivləşir: «O, təkcə «Azər Ross» fəallarına qarşı deyil, həm də Rusiyadakı səfirliyimizə qarşı açıq təbliğata başlayıb. Abbas Abbasovun «qara piar» kampaniyası, onun məkrli planlarını ifşa etməklə yanaşı, həm də soydaşlarımızın ona qarşı daha sıx birləşməyə sövq eləməkdədir. Təsadüfi deyil ki, Abbas Abbasovun səfir Polad Bülbülloğluna və və onun müavini Qüdsi Osmanova qarşı başlatdığı təhqirdolu kampaniya, artıq əks effekt verməyə başlayıb. Halbuki, səfirlik təşkilatda parçalanmanın dərinləşməməsi üçün qurultayın marta qədər fasilə götürüb, tərəflərə aradakı qırğınlığı barışıqla əvəzlənməsini tövsiyə edirdi. Ancaq görünür bu, Abbas Abbasov üçün yetərli olmayıb. Və bu səbəbdən də Polad Bülbüloğlu başda olmaqla, Azərbaycan diplomatlarına qarşı Rusiya saytlarında kapmaniyaya başladı. Ancaq bu kampaniya qeyd etdiyim kimi, indi onun öz əleyhinə çevirilib. Elə hazırda Rusiyanın müxtəlif vilayətlərində fəaliyyət göstərən Azərbaycan təşkilatlarının, ard-arda Abbas Abbasova qarşı bəyanatlar verməklə, onun bu kampaniyasının əleyhinə yönəldiyini göstərir».

Yeri gəlmişkən, Abbas Abbasova qarşı bu günlərdə daha bir bəyanat verilib. Ümumrusiya Azərbaycanlıları Konqresinin Şimali Osetiya-Alaniya Regional Mərkəzinin rəhbəri Şahin Məmmədovun redaksiyamıza daxil olan müraciətini təqdim edirik. Hesab edirik ki, bu bəyanat Rusiyada Abbas Abbasovun fəaliyyətinə daha bir işıq sala bilər:

"Biz Şimali Osetiyada-Alaniyada yaşayan azərbaycanlılar "AzərRos” ətrafında son zamanlar yaşananları çox böyük təəsüüf və narahatlıqla qarşılayırıq. Xüsusilə də, "Azər Ross”un rəsmi saytında Azərbaycanın Rusiyadakı səfiri Polad Bülbüloğlu haqqında yazılanları qətiyyətlə pisləyirik. Heç kimə sirr deyil ki, bütün bunların arxasında Azərbaycanın baş nazirinin keçmiş müavini Abbas Abbasov dayanır.

Abbas Abbasovun son 3 ildəki fəaliyyəti Rusiya azərbaycanlıları arasında nifaq salmağa, parçalamağa və onları bir-birinə qarşı qoymağa hesablanıb. Bu addım bizim tərəfimizdən Rusiyada yaşayan azərbaycanlıların imicinə zərbə vurmaq və Rusiya-Azərbaycan münasibətlərini soyutmağa hesablanmış bir bədniyyət cəhd kimi qiymətləndirilir. Rusiyadakı azərbaycanlılar həmişə prezident Putinin seçiciləri olublar və hər zaman onun yanında olublar və bundan sonra da olacaqlar. Biz eyni zamanda tarixi vətənimiz olan Azərbaycanın da prezidenti İlham Əliyevin, Rusiya-Azərbaycan münasibətlərinin inkişafına söykənən siyasətini dəstəkləyir və alqışlayırıq.

Bizim əsas vəzifəmiz Rusiya və Azərbaycan xalqlarının dostluğuna xidmət etmək və xalq diplomatiyasının xoşniyyət elçisi olmaqdır.

Azərbaycan vətəndaşı olan Abbas Abbasov anlamalıdır ki, zəbt etdiyi təşkilat onun əlində bizə Rusiya azərbaycanlılarına qarşı istifadə ediləcək alət ola bilməz. Bu təşkilat bizə-Rusiya azərbaycanlılarına məxsusdur və ilk növbədə iki xalqın dostluğuna xidmət etməlidir.



Şimali Osetiya-Alaniya azərbaycanlıları uzun illər boyu bu regionda yaşayaraq, Rusiya cəmiyyətinin inkişafına çöx böyük töhfə veriblər və həyatı əhəmiyyətli bütün sferalarda təmsil olunublar.

Abbas Abbasov və onun ətrafı isə, Rusiya azərbaycanlıları arasında dağıdıcılıq və birliyin pozulması siyasətini aparır. Ona görə də bizim sualımız yaranır ki, Abbas Abbasov kimin maraqlarına xidmət edir? Azərbaycanın Rusiyadakı səfirinin müavini Qüdsi Osmanovun timsalında səfirliyimiz hər zaman Rusiyada yaşayan azərbaycanlıları təxribatlara uymamağa və bütün diaspor nümayəndələrini dialoqa çağırıb.

Biz bütün Rusiya azərbaycanlılarını, o cümlədən Şimali Osetiya-Alaniyada yaşayan həmvətənlərimizi dostluğa, sülh və qarşılıqlı anlaşamaya dəvət edir, onları hər cür təxribatlardan çəkinməyə çağırırıq. Abbas Abbasovdan da Rusiya azərbaycanlılarının imicinə və nüfuzuna zərbə vurmağa son qoymağı xahiş edirik. Onları müxtəlif yollarla qorxutmağa, bizə qarşı qoymağa, Azərbaycanda vəzifədə işlədiyi dövrdə yaratdığı əlaqələrdən Rusiya azəraycanlılarına qarşı istifadə etməsinə son qoymağa çağırırıq”.

Cəfər MƏRDANOĞLU