Baş nazirin sabiq müavini səfirlik və dövlətə meydan oxudu; ayın 20-də son həmlə olacaq

Rusiyada soydaşlarımızın tanınmış təşkilatlarından sayılan “AzərRos”da baş verən qalmaqallar günü-gündən ortaya yeni mənzərə çıxarır. Belə ki, təşkilatda Azərbaycanın baş nazirinin sabiq müavini Abbas Abbasov və tərəfdarları ilə hazırkı rəhbərlik üz-üzə dayanıblar. Vəziyyət o həddə çatıb ki, «Azərros»un fəxri prezidenti Söyün Sadıqov yanvarın 17-də növbədənkənar qurultay çağıraraq, Abbas Abbasov və onun tərəfdarlarını rəhbərlikdən uzaqlaşdırıldığını elan etdi. Və o, Azərbaycanın Rusiyadakı səfirliyinin barışıq çağırışına əməl edərək, martın 4-dək fasilə götürüb, yeni rəhbərliyin formalaşdırılacağını bəyan etdi. Ancaq bilinən odur ki, Söyün Sadıqovun Abbas Abbasova verdiyi müddət boşuna olacaq. Belə ki, Abbas Abbasov yaranmış fasilədən istifadə edərək, təşkilatın fəallarına təzyiq edir, onların səsini indidən öz tərəfdarlarına yönəltməyə çalışır. Bununla kifayətlənməyərək, səfir Polad Bülbüloğlu və digərlərinin gözdənsalınması kampaniyasını da həyata keçirir. Ən diqqətçəkən məqam isə Abbas Abbasovun təşkilatı tam öz nəzarətinə keçirmək məqsədiylə son həmləyə hazırlaşmasını göstərmək olar.

«Gündəm Xəbər»i məlumatlandıran soydaşlarımızddan biri deyib ki, Abbas Abbasov Söyün Sadıqovun tərəfdarlarının əksəriyyətini kriminal qruplar və Rusiya hüquq-mühafizə orqanlarının əməkdaşlarının vasitəsilə qorxudaraq zərərsizləşdrib: «Elə bu fakta arxayın olan Abbaas Abbasov təşkilatın fəxri prezidenti Söyün Sadıqovun rəyini almadan növbədənkənar qurultay çağıraraq, «Azərros»un yeganə və faktiki sahibi olduğunu nümayiş etdirməyə başlayıb. O, fevralın 20-də qurultay keçirəcəklərini və təşkilatın yeni rəhbərliyini elan edəcəklərini bəyan edib. Bu isə Söyün Sadıqov və Azərbaycan dövlətinin maraqlarına birbaşa çıxmaqla yanaşı, həm də meydan oxuma kimi qiymətləndirilə bilər».

Məlumatlı şəxs deyir ki, Abbas Abbasovun meydan oxuma hərəkəti Azərbaycanın Rusiyadakı səfirliyində və Söyün Sadıqovda şok yaradıb: «Qarşı tərəf bütün gücü ilə Abbas Abbasov və onun tərəfdarlarını Rusiyanın bəzi qüvvələrin təsir dairəsindən çıxarıb, birgə fəaliyyətə yönləndirmək istəsələr də, görünən budur ki, bunlar nəticə verməyib. Abbas Abbasov nəzarətində olan saytlarda Polad Bülbüloğlunu təhqir edən yazılar yazdırmaqla, əslində, özünü məğlubedilməz güc kimi göstərirdi. İndisə onun fevralın 20-də qurultay çağırması, bu «əzələ nümayişi»nin davamıdır. Belə getsə, Rusiyanın bəzi qüvvələrinin gücünü arxasına alan Abbas Abbasov bu

təşkilatı tam nəzarətinə keçirərək, Azərbaycanı təhdid etməkdə davam edəcək».

Mənbə deyir ki, vəziyyətin kəskinləşməsi və Abbas Abbasovun gizli məqsədi Söyün Sadıqovu da narahat edir:

«Söyün Sadıqov Abbas Abbasovun son əməllərindən, xüsusilə onun nüfuzlu soydaşlarımızın biznes fəaliyyəti ilə bağlı Rusiya hüquq-mühafizə orqanlarına şikayətlər etməsi və nəzarətində mediada yazdırılan təhqirlərdəm həddən artıq narazıdır. Elə bir neçə gün əvvəl onun Rusiya mediasında yayımlanan müraciəti də, belə düşünməyə əsas verir. Həmin müraciətdə Söyün Sadıqov Rusiya mətbuatında təşkilatın üzvlərinə, bütün ictimai təşkilatlarının rəhbərlərinə müraciətində yanvarın 17-də Moskvada keçirilmiş müşavirədən söz açıb və martın 6-dək barışıb, birgə fəaliyyət üçün son mesajını verib. Söyün Sadıqov bu tarixə qədər gərginliyin dayandırılmasını və “AzərRos”un keçmiş rəhbərliyi və yeni prezidentin seçilməsinin tərəfdaşları bir masa arxasına əyləşərək, mövcud problemlərin həlli istiqamətində fikir mübadiləsi aparacaqlarına inamını dilə gətirsə də, bunun nəticə verməyəcəyini də dolayısı ilə etiraf edib: «Hamınız bilirsiniz ki, mən FNK AzərRos-a 12 il rəhbərlik etmişəm və bu müddət ərzində biz daima qarşılaşdığımız anlaşılmazlıqların və çətinliklərin öhdəsindən gəlmişik. Bizim təşkilatımızda daima demokratiya abuhavası mövcud olub. Siz, əziz həmvətənlərim öz fikirlərinizi azad ifadə etmək hüququna malik olmusunuz. Lakin son iki il ərzində bu ali işin davam etdirilməsi əvəzinə, AzərRos rəhbərliyi ən fəal etirazçılara qarşı onların sahibkarlıq fəaliyyətlərinin hüquq-mühafizə orqanları tərəfindən yoxlanılması məqsədi ilə polisə ərizələr veriblər. Bu gün AzərRos-un internet səhifəsinə nəzər salanda görürük ki, 2000-ci ildə Rusiya azərbaycanlılarının mədəni həyatını, tarixini, adət və ənənələrini işıqlandırmaq məqsədi ilə yaradılmış internet mənbəsi (http://fnkaa.ru) artıq AzərRos-un işinə qarşı çıxan fəallar barədə qərəzli və kirli məqalələrin yayımlanması məqsədi ilə istifadə olunur. Bu yaxınlarda hətta Azərbaycanın Rusiyadakı Səfiri Polad Bülbüloğlu və onun müavini Qüdsi Osmanova qarşı qərəzli məqalələr dərc olunmuşdur. Bu növ nəşrlər nəinki Rusiyadakı azərbaycanlı icmasına, o cümlədən Rusiya ilə Azərbaycan arasındakı siyasi əlaqələrə ciddi xələl yetirir.

Mən bu gün AzərRos-da bütün baş verənləri dərin kədər və urək ağrısı ilə izləyirəm, bizlərin bərabər əməyi ilə yaradılmış qurum dağıdılır. Bu vəziyyətdə mən susa bilmərəm. Narazılığın və qarşıdurmanın öhdəsindən gəlmək üçün etdiyim bütün çabalara rəğmən bəzi insanlar öz məkirli məqsədlərini güdməyə davam edir və bizim təşkilatımızı dərindən sarsıtmaq

fikrindən əl çəkmir. Azlıq təşkil etmələrinə baxmayaraq, məhz bu şəxslər bizim sıralarımıza ayrı-seçkilik salırlar».

Sonda S.Sadıqov daha sonra Abbas Abbasovun təsirinə düşənTver və Moskvadakı təşkilatlar, AzərRos-un Federal Şurasının bəzi üzvləri tərəfindən 20 fevral tarixində keçiriləcək qurultayın “AzərRos”un Nizamnaməsi və Rusiya qanunvericiliyinə zidd olduğunu bildirib və soydaşlaarımıza belə səslənib «Gözlərinizi açın, Sizi hara itələdiklərinə baxın, təxribatlara yol verməyin və Azərbaycan icmasının maraqlarından uzaq olan bir yığın insanın dəvət etdiyi 20 fevral “müşavirə”sində iştirak etməyin». Elə bu fakt da onu göstərir ki, artıq tərəflərin qarşıdurması açıq müstəviyə keçib və bu gözlənildiyi kimi, sakitliklə həll olunası məsələlər deyil».

Cəfər