Sakinlər başçının əli baltalılarına yox deyir

“Gündəm Xəbər”ə müraciət edən Sumqayıt şəhər 20-ci məhəllə sakinləri qəzetimizdən imdad diləyir.

Şikayətçilər bildirir ki, 20-ci məhəllə ərazisində rus mütəfəkkirləri Puskin və Qorki küçəsinin kəsişməsində yol qovşağı dairəsi mövcuddur.

Həmin ərazidə Sovetlər dönəmində (dairədə) eldar şamları əkilib. Ətraf məhəllələrin sakinləri də həmin parkda istirahət edir. Sakinlərin dediyinə görə, bir həftə öncə bir qrup “əli yaraq”lı parkda ölçmə işləri apararaq, nişanlama əməliyyatı aparıblar. Yaraqlıların birindən sakinlərə ötürülən məlumata görə, yol qovşağında yerləşən parkı qırıb yerində ticarət obyekti inşa etmək istəyirlər.

Analoqsuz ölkənin Sumqayıt şəhər 20-cı məhəllə sakinləri, ağla gəlməz vasitəyə əl atıblar. Belə ki, sakinlər dükanların birindən boya və fırça alaraq parkdakı bütün eldar şamlarını 1-dən 78-ə qədər nömrələyiblər. Bundan sonra bir neçə yerdən “park uşaqlarındır”, “parka dəymə” şüarları asıblar.

2011-ci ildən Sumqayıt şəhərinə İH başçısı yətin edilən Eldar Əzizov ümumiyyətlə adına adaş olan eldar şamlarına qənim kəsilib. Sumqayıta girərkən addımbaşı “yaşıl soyqrım”la üzləşirsən. Sumqayıtın daxilində meşəliyi xatırladan parklardan əsər-əlamət qalmayıb. Bir sözlə seyrəltmə işləri aparılıb. Sumqayıtla tanışlığı olmayan hər kəs şəhəri gəzərkən bunun şahidi ola bilər.

E.Əzizovun bir amalı var, parkların yerində bank, restoran, kafe, çayxana salmaq. Bu dırnaqarası abadlıqdan həm başçı, həm də işbazlar yaxşıca qazanc əldə edir. Sumqayıtda kimsə abırına qısılıb E.Əzizovdan 10 manat çörək pulu istəsə onu peşiman edərək, onda pul haradandır deyər. Yazılarımızdan birində qeyd etmişdik ki, Sumqayıt sakinlərindən biri İH başçısına ərizə ilə müraciət edərək E.Əzizovdan xəstəliyi ilə əlaqədar maddi yardım istəsə də, buna nail ola bilməmişdi.

“Gündəm Xəbər” olaraq ötən saylarımızda E.Əzizovun “əməllərini” silsilə yazılarla işıqlandırmışıq. Bizə sızdırılan məlumata görə, artıq E.Əzizova “işlərini” tamamlamaq, çomadanını yavaş-yavaş yığışdırmaq tapşırılıb. Haqqında Sumqayıt şəhər sakinləri tərəfindən PA-ya çoxsaylı şikayətlər edildiyindən etimadını itirmiş E.Əzizov, heç də xoş olmayan bədbin əhval-ruhiyyədədir.

Şakir