Başçı tərəfindən parklarda seyrəltmə

Eldar Əzizov Sumqayıt şəhərinə İH başçısı təyin olunanda sakinlərə söz vermişdi ki, onların bütün problemlərini tez bir zamanda həll edəcək. Sumqayıtlılar sevinmişdilər ki, keçmiş İH başçısı Vaqif Əliyevdən qalma problemlərini də tez bir zamanda E. Əzizov tərəfindən həll ediləcək. İşə başladığı ilk günlərdən şəhər sakinləri İH-nin qarşısına toplaşaraq E. Əzizovun qəbuluna yazılmağa başladılar. Xeyli zaman keçməsinə baxmayaraq qəbula yazılanların bir nəfərini belə E. Əzizov qəbul etmədi. Söz verdiyi vaxtdan 3 il keçməsinə baxmayaraq heç bir şəhər sakininin problemi həll olunmamış, əksinə insanlar əlavə problemlərlə baş-başa qalmışlar.
Xalqın problemlərini həll etmək əvəzinə Sumqayıtda başçı təyin olunandan sonra müxtəlif şoulara start verdi. Guya gələcək planları haqqında məhəllələrdə “açıq mikrafon” tədbiri keçirərək büdcə təşkilatlarını və “zəhmətkeşləri” həyətlərə toplatdıraraq əttökən musiqili şoular keçirirdi. Söz verirdi ki, sakinlər üçün qapıları həmişə açıq olacaq. Fürsətdən istifadə edən bəzi zirəng sakinlər həyətlərində mikrofon alaraq problemlərini başçıya çatdırırdılar.Başçı isə ətrafındakılara əmr edirdi ki, “protokola salın” (bu başçınının ən populyar sözlərindəndir). Şikayət protokola salınsa da sonda heç bir tədbir görülmürdü.
Hazırda E.Əzizovun qəbuluna düşmək müşkül məsələdir. Qapıda duran dəllalları vasitəsilə ancaq müavinləri Rövşən və Sahibin qəbuluna düşmək olar. Onlar da vətəndaşların problemlərinin həllindən dolayısı ilə yaxalarını kənara çəkərək “bu iş” bizlik deyil cavabını verirlər. Qeyd edək ki, hər iki şəxs E. Əzizov Gəncədə İH başçısı vəzifəsini icra edərkən başçının müavini vəzifəsində çalışıblar. Paradoksal haldır ki, başçı Sumqayıtı tanıyan, onun problemlərinin köklü həllini bilən Sumqayıt kadrlardan istifadə etmək belə istəmir. Əlbəttə ki, E. Əzizov “kadr siyasəti”ndə yanılmır. O, Gəncədən gətirdiyi kadrları ilə bir çox “qaranlıq” işlərə imza atıb. Belə ki, Gəncə şəhərində fəaliyyəti zamanı bir çox dövlət müəssisələrini su qiymətinə özününkiləşdirilməsi zamanı həmin “kadr”lar ona həmdəm olub. Bu səbəbdən başçı “etibarlı” kadrlarından əl çəkmir.
Deyilənə görə başçının qəbuluna düşmək üçün ümumi şöbənin müdiri Mövlan Babayevə 100 manat vermək lazımdır. Başçı Sumqayıt şəhərində elə bir abu-hava yaradıb ki, addım başı özbaşınalıqdır. Başçıya tabe olan sturukturlar onun “qaydalarına” uyğun olaraq şəhərin altını üstünə çevirirlər. Şəhər daxilində torpaqlar santimetrlə satılır. Artıq səkilər yox dərəcəsindədir. Sələfi V.Əliyevdən ona böyük torpaq sahəsi qalmasa da o “hərraca” çıxarmağa yer tapır. Heç kimin ağlına gəlməyən yerlərdən torpaq sahələri qamarlayır. Gözündən heç nə yayınmır. Onun üçün ən qazanclı prestijli yerlər parklardır. Gecənin birində yaşıllıq və parkların ortasında ağacları qırmaqla “talalar” açdırır. Yerini pullu müştəriyə istədiyi qiymətə sata bilir. Həmin “tala”da tikiləcək obyektin inşasını özünə məxsus (Gəncədən gətirmiş) briqadaya həvalə edir. Zarafat deyil, kişi bir güllə ilə iki dovşanı birdən vurur. Həm yer verir, həm tikinti materialını satır, həm də öz briqadası tikir. Bir sözlə kişi daşdan pul çıxarandır. Əvvəllər Sumqayıt parkları sıx meşəliyi xatırladırdı. Başçının göstərişinə əsasən “seyrəltmə” işləri aparıldığından parkların ortasında kafe və çayxanalar fəaliyyət göstərir. Son zamanlar başçının tapşırığına əsasən Sumqayıtda “əyri dom” kimi tanınan binanın qarşısındakı parka “hücum” çəkilib. Həmin ərazidə Eldar şamları, dekorativ kollar və yaşıllıqlar məhv edilərək Əmrahbankın yeni filialı inşa olunur. Ona yaxın başqa bir obyekt inşa olunur.
Sumqayıtda kosmetik gözəlləşdirilmədə istifadə edilən materiallar başçının Gəncədəki zavodlarından daşınır. Şəhərin abadlığına ayrılmış milyonlar özünəməxsus zavodlara köçürülür. Bu köçürmələrdə milyonlar başçı tərəfindən mənimsənilir.
E. Əzizov Sumqayıtda böyük sərvətə sahiblənsə də Sumqayıtı bəyənmir. O, gündəlik yaşadığı Bakı şəhərinə gedib gəlir. Bu da əlavə olaraq Dövlətə izafi xərc yükləmək deməkdir. Başçının xidməti maşını Almaniya istehsalı olan BMW 745 markalı avtomobildir. Həmin avtomobilin digər nəqliyyat vasitələrindən beş qat çox yanacaq işlətməsini nəzərə alsaq gündəlik yanacaq sərfiyatına böyük məbləğdə pul xərclənir. Əlbəttə ki, bu xərclər E. Əzizovu elə də qayğılandırmır.