Qulu Xəlilov Təhsil Nazirliyinin «görən gözünü» qapayıb, növbə icra başçısına çatıb

Ölkədə saxta diplom cinayətlərinin sayı artıqca diqqətlər barələrində daha çox şikayət olunan təhsil müəssisələrinə yönəlir.

Bu barədə «Gündəm Xəbər»ə verilən məlumata görə, Göyçay Dövlət İdarəetmə və Texnologiya Kolleci və bu təhsil müəssisəsinin direktoru Xəlil Orucov haqqında da saxta diplom satışı ilə bağlı məlumatlar yayılıb.

Redaksiyamıza daxil olan məlumatlar əsasında araşdırma apararkən aydın oldu ki, Göyçay İdarəetmə və Texnologiya Kolleci haqqında səslənən iddiaların kifayət qədər əsasları var:

«Maraqlı burasıdır ki, barəsində dövrü mətbuatda da çoxsaylı şikayətlərin dərc olunmasına baxmayaraq, kollecin direktoru Xəlil Orucovun yol verdiyi özbaşınalıqlar və qanun pozuntuları rəsmi dairələr tərəfindən araşdırılmayıb. Görünür, ya direktor Təhsil Nazirliyinin cavabdeh şəxslərinin gözlərini qapatmağın yolunu tapıb, ya da nazirlik rəsmiləri yerində deyillər».

İddialara görə, Yulu Xəlilov Tələbə Qəbulu üzrə Dövlət Komissiyasının səlahiyyətlərini mənimsəməklə, bu gün də qanunsuz tələbə qəbullarını reallaşdırmaqdan çəkinmir:

«Bizə təqdim olunan məlumatlarda belə bir fakt da vurğulanır ki, sessiya imtahanlarının vaxtı yaxınlaşdıqca kollecdə hökm sürən abu-hava əsil əmtəə birjasını xatırladır. Əslində, bu təhsil müəssisəsində imtahanların nəticələri əməlli-başlı bazar forması alıb. Müxtəlif fənlər üzrə imtahan qiymətləri məhz müəllimlərin, "prinsipiallığı" və tələbələrin "qiymət öldürmək" bacarıqlarına müvafiq olaraq individual qaydada müəyyən edilir. Təbii ki, müəllimlərin "prinsipiallığı" dedikdə onların təyin etdikləri ilkin qiymətlərdən aşağı düşməmək bacarıqları nəzərdə tutulur. İmtahanlarda uğursuzluğa düçar olan tələbələrdən hər kəsiri “düzəltmək” üçün 100 manat tələb olunur. Kollecdə tələbələrdən pul tələbi ildən-ilə yüksələn xətt üzrə artır. Əgər keçən il təhsil haqqı illik 250-300 manat civarında idisə, bu ildən həmin rəqəm 750 manatadək qalxıb. Kollecin təmiri adı altında hər tələbədan 50 manat yığıldığı bildirilir. Sinif jurnali müəllimələrə baha qiymətə satılır, müəllimlər isə öz növbələrində həmin pulu tələblərdən qoparırlar. Bir çox tələbələrin adı jurnalda getsə də, özlərinin dərslərdə iştirak etməməsi buna əyani sübutdur. Məlumatlarda qeyd olunur ki, dərslərdə iştirak etməməyin aylıq “xərci” 100 manatdır. Həmçinin bildirilir ki, kollecin bu cür məzuniyyətə buraxılmış tələbələri paytaxtın və başqa şəhərlərin inşaat meydançalarında fəhləliklə məşğul olurlar. Aydın məsələdir ki, belə halda bu gənclərin əmək hüquqları da qorunmur. Belə ki, onlar artıq işəgötürənlərlə əmək müqaviləsi bağlamaq imkanlarına da malik olmurlar. Bütün bunlar əlbəttə ki, ölkənin ümumilikdə təhsil sisteminə, bir vətəndaş kimi hələ tam formalaşmamış gənc nəslin təlim-tərbiyəsinə çox böyük ziyan vurur. Digər tərəfdən də saxta diplom və arayışların

verilməsi kimi hallar da X.Orucovun xüsusi rəğbət bəslədiyi əməllərə aid edilməlidir. Bu yarıtmaz siyasətin nəticəsidir ki, kollecin məzunları üz tutduqları idarə, müəssisə və təşkilatlarda məmnunluqla qarşılanmırlar və çox vaxt ixtisasları üzrə işlə təmin oluna bilmirlər».

«Gündəm Xəbər»ə daxil olan məlumata görə, Qulu Xəlilov Göyçaya yeni təyin olunan icra başçısı Mübariz Ağayevin də «könlünü fəth» etməyin yolunu tapıb: «Direktor Qulu Xəlilov «qəlbləri fəth» etməyin ustalıqla bacaran mahir adamdır. O, ilk gündən Mübariz Ağayevi «xüsusi təbrik» etməklə işini bitmiş saymadı, hətta onun yaxınlarına da «xod» edərək, tədbirli olduğunu nümayiş etdirdi».

Mənbə Qulu Xəlilovun digər əməlləri ilə yanaşı, onun rayonda və Bakıda qısa müddətdə sahib olduğu daşınmaz əmlaklar haqqında da söz açıb. Bununla bağlı dəqiqləşdirmələrimiz davam edir. Növbəti sayımızda bu araşdırmalarımızı təqdim edəcəyik...

Cəfər