Təkzibolunmaz dəlillər və məhkəmə qərarlarının olmasına rəğmən, Bakı şəhər İcra Hakimiyyətinin Tamara Həmidova ilə imzaladağı torpaq icarə müqaviləsini qüvvədə saxlaması heç bir hüquqi normaya uyğun gəlmir

Bəzən qanunlar onları qorumağa məsul olan şəxslər tərəfindən pozulur. Bu isə digərlərinin hüquqlarının tapdalanması ilə müşayiət olunur ki, nəticədə kimlərsə illərlə qanunsuz əməllərini davam etdirməyə müvəffəq olur. Ötən saylarımızda Tamara (Əliyevna) Həmidovanın illərlə davam edən qeyri-qanuni əməlləri barəsində məlumat vermişdik.

Qeyd edək ki, Həmidov Cəlal Əli oğlu qəyyumu Həmidova Tamara Əli qızı (Əliyevna) ilə birlikdə Bakı şəhəri, Çobanzadə küçəsi 30C ünvanında Bakı şəhərinin şərq zonasını içməli su ilə təchiz edən, diametri 1200-1400 mm olan magistral su kəmərlərinin üzərində qanunsuz olaraq fərdi yaşayış evi və digər tikililər inşa edib. Cinayət işi üzrə təyin edilmiş ekspertizalar üzrə 05 avqust 2014-cü il tarixli, 13667 nömrəli ekspert rəyinə və mütəxəssis araşdırması barədə 07 noyabr 2014-cü il tarixli 17-3/1473 saylı arayışa əsasən, qeyd olunan fərdi yaşayış evinin digər tikililərin həqiqətən magistral su kəmərinin üzərində tikilməsi tam sübuta yetirilib.

Bakı şəhəri Nizami rayon Məhkəməsinin hakimi Burcayev İmran Ramazan oğlunun sədrliyi ilə 17 yanvar 2013-cü il tarixində keçirilən açıq məhkəmə iclasında Azərbaycan Respublikası Mülki Prosessual Məcəlləsinin 216-220 və 360-cı maddələrini rəhbər tutaraq məhkəmə qeyd olunan qanunsuz tikilinin sökülməsi haqqında qərar qəbul edib. Uzun dirənişdən sonra T. Həmidova adıçəkilən tikilini sökməyə məcbur olsa da bütün bu illər ərzində onun qanunsuz əməllərinə rəvac verən və əlində əsas kimi götürdüyü, Bakı şəhər İcra Hakimiyyəti ilə 20 avqust 2010-cu il tarixli icarə müqaviləsi hələ də qüvvədədir. Baxmayaraq ki, T. Həmidovanın bütün qanunsuz əməlləri ifşa olunub, bu barədə məhkəmə qərarları mövcuddur. Ancaq, Bakı şəhər İcra Hakimiyyəti hələ də qanunsuz müqaviləni ləğv etmək istəmir.

“Torpaq sahəsinin icarəyə verilməsi haqqında” sözügedən müqaviləni 20 avqust 2010-cu ildə Bakı şəhər İcra Hakimiyyəti tərəfindən İH başçısı Hacıbala Abutalıbov və Tamara Həmidova imzalayıb. Müqavilədə göstərilir ki, “Bakı şəhər İcra Hakimiyyətinin 07. 03. 2003-cü il tarixli, 7-129/ 7g saylı, Bakı şəhər İH Memarlıq və Şəhərsalma Baş İdarəsinin 23.08. 2004-cü il tarixli 18/038/5435 saylı məktubları ilə razılaşdırılmış eskiz layihəsi, Bakı şəhər Səbail rayon Məhkəməsinin 2( 009)-2298/2010 saylı, 12.06. 2010- cu il tarixli qətnaməsi və bu qətnamə ilə təsdiq edilmiş memar İ. Ağayev tərəfindən tərtib olunan plan-sxemə uyğun olaraq mövcud istifadə vəziyyətində faktiki istifadəsində olan Çobanzadə küçəsi 30C ünvanında yerləşən torpaq sahəsinə icarə müqaviləsi bağlanır”. Göründüyü kimi, müqavilənin imzalanması zamanı Səbail rayon Məhkəməsinin 12 iyul 2010-cu il tarixli qətnaməsi əsas götürülmüşdür. Nəticədə Həmidov Cəlal Əli oğlunun Bakı şəhər İcra Hakimiyyətinə qarşı torpaq icarə müqaviləsinin bağlanması haqqında iddiası təmin edilərək, Nizami rayonu, Çobanzadə küçəsi 45

ünvanında yerləşən, lisenziya əsasında fəaliyyət göstərən İ. Ağayev tərəfindən tərtib edilmiş plan-sxemə əsasən mövcud vəziyyətdə faktiki istifadəsində olan 826,2 kv/m torpaq sahəsinə dair C. Həmidov ilə torpaq müqaviləsi imzalanıb. Səbail rayon Məhkəməsinin 16 mart 2011-ci il tarixli qərardadı ilə “Bakı şəhəri, Nizami rayonu, Çobanzadə küçəsi 45 ünvanı” “ Bakı şəhəri, Nizami rayonu, Çobanzadə küçəsi 30 C ünvanı” ilə əvəz edilib.

Tamara Həmidova yüksək gərginlikli işıq-naqil xəttləri, qaz, su, çirkab borularının və istilik təchizat xətlərinin, ən əsası isə şəhərin şərq zonasını su ilə təchiz edən magistral su kəmərlərinin keçdiyi xüsusi mühafizə zolağını və əlavə olaraq müəssisənin ümumi istifadəsində olan, fəaliyyəti üçün xüsusi önəm kəsb edən giriş-çıxış yolunun bir qismini, yəni 375 kv/m torpaq sahəsini ələ keçirmək, orada yaşayış evlərinin tikintisini reallaşdırmaq üçün Bakı şəhər İcra Hakimiyyəti ilə müqavilə imzalamağa müvəffəq olur. Bakı şəhər İH ilə sövdələşmə aparan T. Həmidova zəbt etdiyi ərazini ələ keçirmək məqsədilə formal olaraq iddia qaldıraraq zəbt etdiyi sahədən də artıq olan 826, 2 kv/m torpaq sahəsinə dair icarə müqaviləsinin bağlanmasını Bakı şəhər İH-nə həvalə edilməsi barədə qətnamə çıxartmağa müvəffəq olub. Məqsəd isə T. Həmidovanın qanunsuz əməllərinə, zəbt etdiyi torpaq sahələrinə nəyin bahasına olursa-olsun, hüquqi don geyindirməkdən ibarət olub. Nəticədə, Səbail rayon Məhkəməsi qeyd olunan qətnaməni qəbul edərək Bakı şəhər İcra Hakimiyyətinə T. Həmidova ilə icarə müqaviləsini imzalamağı “tövsiyyə edib”. Bu isə sonrakı bütün qanunsuzluqlara geniş rəvac verilməsi üçün bir növ yaşıl işıq olub. Tərəflər arasında 20 avqust 2010-cu ildə imzalanmış “Torpaq sahəsinin icarəyə verilməsi haqqında müqavilədə” torpaq sahəsinin məqsədli təyinatı kimi fərdi yaşayış evlərinin təyinatı göstərilib. Göründüyü kimi, sadaladığımız faktlara əsasən qeyd olunan sahə strateji əhəmiyyətli olduğu üçün burada heç bir tikinti işlərinin aparılması mümkün deyildir. Həmçinin, AR Su Məcəlləsinin 83-cü maddəsinə əsasən, su mühafizə zonalarında yerləşən torpaq sahələri fiziki və hüquqi şəxslərin istifadəsinə Torpaq Qanunvericiliyi və Su Məcəlləsi ilə müəyyən edilmiş qaydada müvafiq icra hakimiyyəti orqanları ilə razılaşdırılmaqla verilə bilər. Aydın görünür ki, məhkəmənin ona qanunla müəyyən edilmiş torpaq sahəsinin C. Həmidovun istifadəsinə verilməsinə dair qərarı bütün qanunverici aktlara zidd olmuşdur. O cümlədən, magistral su kəmərlərinin sanitar mühafizə zolağını təşkil edən həmin torpaq sahəsinin icarəyə verilməsi “Azərsu” ASC-nin qanunla qorunan maraqlarını pozmuşdur.

Lakin, T. Həmidovanın Bakı şəhər İcra Hakimiyyəti ilə imzaladığı müqavilə hələ də qüvvədədir.

Baxmayaraq ki, onun ərazidə inşa etdirdiyi tikililər qanunsuz hesab edilərək artıq sökülüb. Həmçinin Bakı şəhər Səbail rayon Məhkəməsinin 12 iyul 2010-cu il tarixli qətnaməsinin ləğv edilməsi barəsində Bakı Apellyasiya Məhkəməsinin 05 dekabr 2012-ci il tarixli qərarı da var. Bu qədər təkzibolunmaz dəlillər və məhkəmə qərarlarının olmasına rəğmən Bakı şəhər İcra Hakimiyyətinin Tamara Həmidova ilə imzaladağı torpaq icarə müqaviləsini qüvvədə saxlaması heç bir hüquqi normaya uyğun gəlmir.

Qeyd edək ki, məhz həmin icarə müqaviləsinin imzalanması nəticəsində Tamara Həmidova “Buxar” KM-nin ərazisini zəbt edərək əlində saxlayır. Yəqin ki, Bakı şəhər İcra Hakimiyyəti və şəxsən Hacıbala Abutalıbov uzun illər qanunsuzluqlara rəvac verən həmin müqavilənin tezliklə ləğv olunmasını təmin edəcəklər. Rəsmi dövlət qurumunun və şəhər merinin imzası olan belə bir müqavilənin hələ də qüvvədə qalması yolverilməzdir. İnanmaq istərdik ki, bu saxta müqavilə də tezliklə ləğv olunaraq tarixin arxivinə əlavə olunacaq.

Mustafa