Bəxtsiz Füzulinin icra başçılarından bəxti gətirməyinə gətirmir, amma olan Füzuli camaatına olur. Artıq çoxdandır ki, Füzuli camaatının icra başçısının başına yığdığı talayanlar komandası ilə birgə gördükləri əməllərindən danışmaqdan dilləri qabar tutub. Lakin nədənsə, heç kəs onları ya duymur, ya da duymazdan gəlir.

Çünki, bizimkilər də ATƏT-in 23 ildə “altı bəzək, üstü təzək” fəaliyyəti kimi yapmacıq “idarəetmə” ilə böyük ehtimalla yalnız öz ciblərini məmnun edirlər. Elə ona görə də, camaatı sözün əsl mənasında qarət etməklə məşğul olurlar. Məlum məsələdir ki, bu cür vəzifəli şəxslərin kirli çamaşırlarını açıb ictimailəşdirənlərin çoxu gec-tez “dələduzluq” adı ilə barmaqlıqlar arxasına tıxanır və həmin kürsülülər öz özbaşınalıqlarını davam etdirir. Amma, yenə də düşündük ki, bu cür əməllərə kimsə son qoymalıdır ki, ən azından mövcud problemi aidiyyatı orqanların qaçan nəzərlərində tutub saxlamaq olsun… Lakin bu günlərdə Füzuli icra başçısının rayonda əməlli-başlı diktatorluq etməsi bir yana, indi də rayon camaatına “iqtisadi divan” tutmağa başlayıb. Belə ki, əldə etdiyimiz məlumatlara görə, hazırda Füzuli rayonunun icra başçısı rayondakı dükanlarında məhsulların qiymətini artırmağa davam edir.

Bu məsələyə etiraz edən iş adamlarını isə «süni artım»la şərləyərək elə icranın əmri ilə saxlayırlar. Belə çıxır ki, Füzuli rayon icra başçısı Alı Alıyev onun etdiyi əməllərə etiraz edən iş adamlarnı sözün əsl mənasında təqib edir.

Fevralın 21-də dəyərdən düşən manatın fonunda Azərbaycan hökuməti mal və məhsulların qiymətinin artmayacağı barədə tədbirlər görməyə başlamasına baxmayaraq, Füzulidə qiymət artımına getmiş əksər dükan və marketlər ya bağlanılıb, ya

da külli miqdarda cərimə edilib. Baxmayaraq ki, Bakıda nəzarət funksiyasını məhz İqtisadi İnkişaf və Sənaye Nazirliyinin müvafiq qurumları tərəfindən həyata keçirilib, amma əfsuslar olsun ki, rayonda həmin məsələ yerli İcra Hakimiyyətlərinin ixtiyarına verilib.

Bu da, sözsüz ki, Alı Alıyevin rayondakı hökmranlığı üçün əlverişli şəraitin yaranması deməkdir. Bir çox icra başçılarının, o cümlədən Füzuli icra başçısı Alı Alıyevin qanunsuz və “təqdirə” layiq fəaliyyəti dövlət başçısının məlum tapşırığını açıq şəkildə inkar etdiyinin göstəricisi hesab olunmalıdır. Misal üçün, Alı Alıyev Fizulidə elə özü bildiyi tərzdə davranmağa və meydan sulamağa davam edir. Bunun da səbəbi odur ki, Füzulinin icra başçısı Alı Alıyev də manatın devalivasiyasından ciddi zərərə düşmüş məmurlardan biridir.

Elə ona görə də, bu gün Alı Alıyev özünün mebel biznesində və market işlətmə sahəsində geniş imkanları olan icra başçısı kimi, düşdüyü zərəri Füzuli camaatını və iş adamlarını soymaqla qarşılamaq niyyətindədir. Bunu açıq şəkildə görmək də mümkündür. Misal üçün, etibarlı mənbənin verdiyi məlumata görə, bu gün Alı Alıyevin Horadiz qəsəbəsi və bir neçə məntəqələrdə yaxın adamlarına verdiyi marketlərdə qiymətlər digərlərindən fərqlənir.

Belə ki, həmin obyektlərdə olan fərqli qiymətlər bütün ərzaq və qeyri-ərzaq mallarına tətbiq edilib. Bu isə ilk növbədə dövlət başçısının süni qiymət artımına qarşı verdiyi tövsiyə və göstərişlərinə qarşı saymamazlığın nümunəsidir. Dövlət başçısının sözünü qulaqardı edən icra başçısı, məlum məsələdir ki, "Meliorasiya və Su Təsərrüfatı" Açıq Tipli Səhmdar Cəmiyyətinin (ASC) sədri Əhməd Əhmədzadəyə güvənərək Füzulidə at oynadır. Hətta rayonda vəzifə təyinatı işinə Alı Alıyev xüsusi təyin edilmiş hərrac vasitəsi ilə şəxsən öz qərarı ilə müəyyənləşdirir. Amma bütün bunlar

ona dövlət başçısının qərarına zidd hərəkət göstərməyə və onun etibarından sui-istifadə etməyə zəmin yaratmır... Deməli, Alı Alıyev özü özünə məxsus obyektlərdə süni qiymət artımına yol versə də, digər sahibkarları gözümçıxdıya salaraq, onlardan bunun icazəsi üçün “hörmət” tələb olunduğu da iddia edilir. Yəni sözün əsl mənasında, Alı Alıyevin dükan işlədən biznesmenlərdən pul tələb edir. Yəni obyektin arenda və ya şəxsi olub-olmamasından asılı olmayarq, Füzulidə özünü feodal elan edən Alı Alıyevə bac verməlidir. Əks halda, həmin sahibkarın obyekti ya bağlanır, ya da təqibə məruz qalıb yenə də aylıq Alı Alıyevə ödəniş edirlər...

Digər bir mənbə isə bildirir ki, tapşırığa əməl etməyən sahibkarı «dükanda malların qiyməti süni bahalaşıb» ittihamı ilə saxlayıb, ağır şəkildə cəza kəsirlər. Yəni, həmin dükan sahibindən külli miqdarda pul alaraq, sərbəst buraxırlar. Buna etiraz edən Füzuli camaatı bildirir ki, Alı Alıyevin rayondakı fırıldaqlarından və doymaq bilməyən tamahından beziblər. Buna görə də, Prezident Administrasiyasına müraciət etmək və dərdlərinə əlac axtarmaq niyyətindədirlər. Lakin Alı Alıyev Füzuli camaatının gözünü necə qorxudubsa, rayon camaatı müraciət etməyə belə qorxur. Rayon camaatı bildirir ki, Alı Alıyev ondan şikayət edənə qarşı ciddi cəza tətbiq olunacağı ilə hədə-qorxu da gəlir... Elə ona görə də, aidiyyatı orqanlardan, yəni Alı Alıyev kimi "Meliorasiya və Su Təsərrüfatı" Açıq Tipli Səhmdar Cəmiyyətinin (ASC) sədri Əhməd Əhmədzadənin əlinin çatmadığı yerlər belə gərək ki, bu yazıdan sonra Füzuli camaatının halına acısın...

Camaata sözün əsl mənasında qan udduran icra başçısının devalvasiya nəticəsində zərərini ailələrini bir qarın ac, bir qarın tox dolandıran rayon dükannlarının sahibimi qarşılamalıdır? Bu hansı təfəkkürə və hansı məntiqə

uyğundur, anlamaq müşkil məsələdir... İcralıq etdiyi rayonda at oynatmaq, dövlət başçısının göstərişlərini qulaqardı etmək məmur özbaşınalığı deyil, bəs nədir? Rayondakı hərc-mərcliyə etiraz edənləri təqib etdirmək, onlardan zorla külli miqdarda pul ödəməsini tələb etmək cinayət deyil, bəs nədir? Sizcə, buna da göz yummaq olarmı? Bu günlərdə Sumqayıt icra başçısının və Bakı merinin yoxlamaları kimi Hesablama Palatası Füzuliyə də baş çəkməlidir...

Düzdür, rayon camaatının bu cür faktları ortaya qoyması yoxlamasız Alı Alıyevin məsuliyyətə cəlb olunması və rayon camaatının əlindən zorla alınan mal-mülkünün müsadirə olunmasına zəmin yaradır...

Ülkər